Same 9 - Ai Vola Tabu (Vakadewa Makawa Vakavoutaki 2021)（FRV21）

Na Kaukauwa kei na Cakacaka Dodonu ni Kalou Vua nai liuliu ni sere: me baleti Muce-lapeni. A Same i Tevita.

א Alefa

1Au na vakavinavinaka vei Jiova e na yaloqu taucoko;

au na tukuna kecega na nomuni cakacaka e veivakurabuitaki.

2Au na reki ka marautaki kemuni;

au na seretaka na yacamuni, oi kemuni sa cecere sara.

ב Beta

3Ni ra sa dro tani na noqu meca,

era na bale ka rusa mai na matamuni.

4Ni kemuni sa totaka e na vukuqu na ka dodonu kei na lewa;

o ni sa tiko e nai tikotiko vakaturaga, ka sa ia na lewa dodonu.

ג Qimela

5O ni sa vunauci ira na veimatanitu, ko ni sa vakarusa na tamata ca;

ko ni sa bokoca laivi sara na yacadra ka sega ni mudu.

6Ko iko na meca, sa mudu sara na veivakarusai;

ko ni a vaqeavutaka na veikoro;

sa takali vata kei ira na nodra vakananumi.

ה He

7Ia ko Jiova, ena tudei ga ka sega ni mudu;

sa vakarautaka ko koya na nona i tikotiko me ia na veilewai.

8Ena lewa na vuravura ko koya e na lewa dodonu;

ena lewai ira na lewe ni veivanua e na yalododonu sara.

ו Vau/Wau

9Ena yaco ko Jiova me nona uluvatu ko koya sa vakararawataki,

na uluvatu e na gauna ni veivakacacani.

10Era na vakararavi talega vei kemuni ko ira era sa kila na yacamuni,

ni ko ni sa sega ni biuti ira era sa vakasaqarai kemuni, i Jiova.

ז Saini

11Dou sere vei Jiova, vei koya sa tiko mai Saioni!

Tukuna vei ira na tamata na nona cakacaka!

12Ni sa taroga ko koya nai sau ni dra, sa nanumi ira;

sa sega ni guilecava na nodra tagi era sa yalomalumalumu.

ח Xeta

13I Jiova, mo ni yalololoma mai vei au.

Mo ni raica na ka rarawa sa yaco vei au mai vei ira era sa cati au;

oi kemuni ka kauti au cake mai na matamata-ni-koro ni mate,

14me'u tukuna kina na ka kecega ko ni sa vakacaucautaki kina,

e na matamata-ni-koro ni goneyalewa ni Saioni,

au na reki ni kemuni sa ia na veivakabulai.

ט Teca

15Sa sikalutu na veimatanitu ki nai keli era kelia;

e na lawa era sa vunia sa coriti kina na yavadra.

16Sa kilai ko Jiova e na lewa sa kitaka ko koya;

sa coriti na tamata ca e na cakacaka ni ligana. Sela

י Yota

17Ena vakasevi ki Eli ko ira na tamata ca,

kei ira na lewe ni veivanua kecega era sa guilecava na Kalou.

כ Kofa

18Ni na sega ni guilecavi tikoga na tamata dravudravua,

ena sega ni rusa laivi na ka era nuitaka na tamata yalomalumalumu.

19I Jiova, mo ni tucake! Me kakua ni gumatua na tamata;

me ra lewai e matamuni ko ira na veimatanitu.

20I Jiova, mo ni vakarerei ira;

me ra kilai ira na lewe ni veivanua ni ra sa tamata walega. Sela