Vakatekivu 34 - Ai Vola Tabu (Vakadewa Makawa Vakavoutaki 2021)（FRV21）

Ko Taina kei Ira na Kai Sikemi

1Ia ko Taina, e dua na goneyalewa, na luve i Lia, kei Jekope, sa lako voli yani me raici ira na goneyalewa ni vanua ko ya.

2A sa raica ko Sikemi na luve i Amori na Aivaiti, na turaga ni vanua ko ya, a sa kauta, ka moce vata kaya, ka vaqasea.

3A sa vinakati Taina vakalevu na luve i Jekope, a sa lomani koya na goneyalewa, ka vosa vakayalololoma vua na goneyalewa.

4A sa vosa vei Amori na tamana ko Sikemi, ka kaya, “Mo segata mada na goneyalewa oqo me watiqu.”

5Sa qai rogoca ko Jekope ni sa vaqaseni Taina na luvena ko koya; ia era sa tiko na luvena tagane kei na manumanu mai na veico, ka sa tiko lo ko Jekope ka yacova ni ra sa lesu tale mai.

6A sa lako yani vei Jekope ko Amori na tama i Sikemi me rau veivosaki kaya,

7ka donumaka na gauna era lesu kina mai na veico na luve i Jekope. Ni ra sa rogoca, era sa rarawa ka cudru vakalevu, ka ni sa kitaka ko koya na ka lialia e Isireli e na nona mocera na luve i Jekope yalewa, ni sa sega ni dodonu me caka na ka vakaoqo.

8Ia sa veivosaki kei ira ko Amori, ka kaya, “Sa guta na nomuni goneyalewa na yalona na luvequ; au masuti kemuni mo ni musuka vua me watina.

9Me da veimusumusukitaki ira na luveda me ra vakawati; mo ni musuka na nomuni goneyalewa vei keimami, ka kauta na neimami goneyalewa vei kemuni.

10Mo ni sa tiko ga kei keimami, ni sa tadola tu e matamuni na vanua mo ni tiko ka veivoli kina, ka rawata kina nai yau.”

11A sa kaya ko Sikemi vua na tama ni goneyalewa kei ira na ganena, “Me'u kune loloma mada e matamuni, ia na ka kemuni sa cavuta ka'u na solia.

12Me ka levu sara nai yau ni vakawati kei nai solisoli mo ni tukuna vei au, ia ka'u na solia na veika cava ga ko ni sa tukuna vei au; ia mo ni musuka ga na goneyalewa me watiqu.”

13Ia ko ira na luve i Jekope era sa vosa vaqaseqase vei Sikemi kei Amori na tamana, ni sa vaqaseni Taina na ganedra.

14A ra sa kaya vei rau, “E dredre ni keitou cakava na ka oqo, ka me musuka na ganei keitou ki na tamata sa sega ni cilivi; ni sa rogo ca vei keitou.

15E na ka duaduaga oqo keitou na rogoci kemudrau kina: kevaka kemuni na vakataki keitou, ka me cili na nomuni tagane kecega,

16keitou na qai musuka na neitou goneyalewa vei kemuni, ka kauta na nomuni goneyalewa vei keitou, keitou na tiko talega kei kemuni, ia eda na duavata ga.

17Ia kevaka kemuni na sega ni rogoci keitou mo ni cilivi, keitou na qai kauti koya na neitou goneyalewa ka lako.”

18A sa marautaka na nodra vosa ko Amori kei Sikemi na luve i Amori.

19A sa sega ni berabera na cauravou ni kitaka na ka ko ya, ka ni sa vinakati koya na luve i Jekope yalewa. A sa tamata yalovakaturaga ko koya vei ira kecega e na vuvale i tamana.

20A sa lako ko Amori kei Sikemi na luvena ki na nodrau matamata-ni-koro, ka vosa vei ira na lewe ni nodrau koro ka kaya,

21“Ko ira na tamata oqo era tiko veisaututaki ga kei keda; ka me ra tiko ga e na vanua ka veivoli kina; ka raica, sa levu na vanua me rauti ira; ka me da vakawati mada kei na nodra goneyalewa, me da musuka talega na noda goneyalewa vei ira.

22E na ka ga oqo era na vakadonuya kina me ra sa tiko ga kei keda, ka me da sa duabau ga tamata, kevaka sa cili na tagane kecega vei keda, me vaka ni ra sa cilivi.

23Ena qai sega li ni noda na nodra manumanu, kei na nodra i yau, kei na nodra bulumakau kecega? Me da vakadonuya ga vei ira, era na qai tiko kei keda.”

24A ra sa vakarorogo vei Amori kei Sikemi na luvena ko ira kecega era curu yani e na nona matamata-ni-koro; ka ra sa cili kecega na tagane, io ko ira kecega era curu yani e na nona matamata-ni-koro.

Ravuravu Lesu na Ganei Taina

25Ia e na kenai katolu ni siga, ni ra se rara tu, erau sa taura yadua na nona i seleiwau e lewe rua vei ira na luve i Jekope, ko Simione kei Livai, na gane i Taina, a rau sa lako vakadoudou ki na koro, ka vakamatei ira kecega na tagane.

26A rau sa vakamatei Amori kei Sikemi na luvena e nai seleiwau, ka kauti Taina yani mai na vale i Sikemi, ka lako yani.

27Era sa qai lako mai ki na koro ko ira na luve i Jekope, ka tokitaka nai yau ni koro, ni ra sa vaqasea na ganedra.

28Era sa kauta na nodra sipi, kei na nodra bulumakau, kei na nodra asa, kei na ka sa tiko e na koro, kei na ka sa tiko mai na were;

29kei na nodra i yau kecega, kei na nodra gone kecega, kei na nodra yalewa, era kauta vakabobula ka tokia, io, na ka kecega sa tiko e vale.

30A sa kaya ko Jekope kivei Simione kei Livai, “Drau sa vakararawataki au ni drau sa vakaboicataki au vei ira na lewe-ni-vanua e na kedra maliwa na kai Kenani kei na lewe ni veikoro lalai. Ia koi au, ka lewe lailai, ka kevaka era na soqoni vata ka mai valuti au, ia ka'u na rusa vata kei na noqu vuvale.”

31A rau sa kaya, “E dodonu li me vakayacora ki vua na gane i keirau nai tovo me vaka sa yalewa dautagane?”