Aisea 59 - Ai Vola Tabu (Vakadewa Makawa Vakavoutaki 2021)（FRV21）

Sa Vunauca na Parofita na Ca ni Tamata

1Raica, sa sega ni lekaleka na liga i Jiova,

me dredre kina ni ia na veivakabulai,

ka sa sega ni bibi na daligana,

me dredre kina ni rogoca.

2Ia na nomudou caka cala ga sa tawasei kemudou tani

mai vua na nomudou Kalou,

ka sa nomudou i valavala ca sa tabonaka kina na matana

mai vei kemudou, me sega ni rogoca.

3Ni sa dukadukali na ligamudou e na dra,

kei nai qaqalo ni ligamudou e na caka cala;

a tebenigusumudou sa vosa lasu;

ka sa cavuta na ka ca na yamemudou.

4Sa sega e dua e tagica na veilewai e na yalododonu,

ka sa sega e dua sa vakadinadina e na yalodina;

Era sa vakararavi e nai lawaki, ka ra vosa lasu;

era sa kunekunetaka na ca, ka ra vakasucuma na caka cala.

5Na yaloka ni gata daukata era sa saulaka,

ka ra sa talia na viritalawalawa;

ko koya sa kania na kedra yaloka ena mate,

ia na ka sa butuvoroki sa saulaki mai me gata loa.

6A nodra viritalawalawa ena sega ni yaco mei sulu,

a ra na sega ni tutuvitaka na ka era sa cakava;

a nodra cakacaka na cakacaka ca,

ka sa tu ga e na ligadra nai valavala kaukauwa.

7 Roma 3.15-17 A yavadra sa ciciva na ka ca,

ka ra sa kusarawa me ra vakadavea na dra sa sega ni cala;

a nodra vakanananu na vakanananu ca,

na rusa kei na rarawa sa tu e na nodra sala.

8A sala ni veivakacegui era sa sega ni kila;

ka sa sega na ka dodonu e na nodra i lakolako.

Era sa vakavevetaka na nodra sala;

ko koya sa muria sa na lecava na veivakacegui.

Era sa Vakatusa na Nodra Cala na Tamata

9O koya oqo sa yawa kina vei keda na veilewai,

ka sa sega ni vauci keda na veivakadonui;

eda sa vakanananu ki na rarama, ka raica, sa butobuto;

ki na serau ni siga, ia eda sa lako tu e na butobuto loaloa.

10Eda sa vakayayamo voli ki na bai me vakataki ira na mataboko,

ka me vakataki ira sa sega na matadra eda sa vakayayamo ga;

eda sa tarabe e na siga levu me vaka e na bogi;

ka me vakataki ira na mate, e na bogi loaloa.

11Eda sa kudrukudru me vaka na bea koi keda kece,

ka vaka na ruve eda sa tagi ni vakaloloku.

Eda sa vakanananu ki na veilewai, ka sa sega;

ki na veivakabulai, ka sa yawa vei keda.

12Ni sa levu cake e matamuni na neimami talaidredre,

ia na neimami valavala ca sa tukuni keimami.

Ni sa tiko kei keimami na neimami talaidredre,

ia na neimami caka cala, keimami sa kila ga;

13keimami sa talaidredre ka lasu vei Jiova,

ka sa lesu tani me vakanadakui koya na neimami Kalou;

ka sa vosataka na veivakasaurarataki kei na vuki,

ka sa vakananuma ka cavuta mai na vu ni yalo i keimami na vosa lasu;

14ka sa vakasukai ki muri na lewa dodonu,

ka sa tu vakayawa nai valavala dodonu;

ni sa bale sobu na dina e na saqata ni koro,

a sa sega ni curu rawa na ka dodonu.

15Ia sa yali na dina,

ia ko koya sa lako tani mai na ca sa qai koveraki.

Ka sa raica ko Jiova, ka sa ca vua,

ni sa sega na lewa dodonu.

Sa Tu Vakarau ko Jiova me Veivueti

16 Aisea 63.5 A sa raica ko koya ni sa sega e dua na tamata,

ka sa kurabui sara ni sa sega e dua na dauveisorovi;

sa qai vakayacora vua na veivakabulai e na ligana dina;

ia na nona yalododonu, sa tokoni koya.

17 Efe 6.14,17; 1Cesa 5.8 A sa sulumaka ko koya nai valavala dodonu me vaka nai sasabai,

a sa vakaisala e nai sala ni veivakabulai;

ka sa vakaisulutaki koya e nai sulu ni veisausaumi,

ka sa tutuvitaki koya e na lomakatakata.

18Me vaka na nodra cakacaka, ena sauma vakakina ko koya;

na cudru vei ira na nona meca, nai sau dodonu vei ira sa cati koya;

ki na veiyanuyanu ena ia na veisausaumi.

19Ko ira mai na ra era na rerevaka na yaca i Jiova,

kei ira mai nai cadracadra ni mata-ni-siga na nona i ukuuku;

ni sa lako vakawaluvu mai na meca,

ena vakaduria na Yalo i Jiova na cagi me tarovi koya.

20 Roma 11.26 “Ia ena lako mai ki Saioni nai Vakabula,

io vei ira na Jekope era sa saumaki mai na talaidredre,” sa kaya ko Jiova.

21“Ia koi au, sa vakaoqo na noqu veiyalayalati kei ira,” sa kaya ko Jiova; “Na Yaloqu, o koya sa tu vei iko, kei na noqu vosa ka'u sa tauca ki na gusumu, ena sega ni lako tani e na gusumu, se na gusudra na nomu kawa, se na gusudra na kawa ni nomu kawa, mai na gauna oqo ka sega ni mudu,” sa kaya ko Jiova.