1 Veigauna 20 - Ai Vola Tabu (Vakadewa Makawa Vakavoutaki 2021)（FRV21）

Na Kabai kei na Tauri Vakavesu i Rapa(2 Samuela 12.26-31)

1 2Samu 11.1 Ia ni sa oti na yabaki, ka sa yaco na gauna era sa daulako kina na tui ki nai valu, sa liutaka ko Joape e dua na mataivalu kaukauwa, ka vakacacana na nodra vanua na luve i Amoni, a sa lako talega ka kabai Rapa. Ia sa tiko ga mai Jerusalemi ko Tevita. A sa samuti Rapa ko Joape, ka vaqeavutaka.

2A sa kauta ko Tevita nai sala vakaturaga mai na ulu ni nodra tui, a sa macala na kena bibi sa dua na taledi koula, a sa tu kina na vatu talei. A sa vakaisala kina ko Tevita. Sa ka levu talega nai toki-ni-valu sa kauta mai ko koya mai na koro.

3A sa kauti ira yani na tamata sa tiko kina, ka lesi ira me ra cudruvi e nai varo, kei na kadrukadru kaukamea ni were, kei na matau. A sa kitaka vakaoqo ko Tevita ki na nodra veikoro kece na luve i Amoni. A sa lesu ki Jerusalemi ko Tevita kei ira kecega na tamata.

Era Valuti na Tuwawa ni Filisitia(2 Samuela 21.15-22)

4Ia ni sa oti na ka oqo, sa qai tubu nai valu kei ira na kai Filisitia mai Keseri. E na gauna oqori sa mokuti Sipei ko Sipikei na luve i Usa, sa dua na luve ni tamata balavu sara, ka ra sa qai vakamalumalumutaki na kai Filisitia.

51Samu 17.4-7A sa qai tubu tale nai valu kei ira na kai Filisitia; a sa mokuti Lami na taci Koliaci na kai Kaca, ko Elanani na luve i Jairi ka tagane, ia na dia ni nona moto sa vaka na nodra kau na dautalitali.

6A sa qai tubu tale nai valu mai Kaca, ka sa tiko e dua na tamata balavu ka yagolevu, sa ruasagavulu-ka-va nai qaqalo ni ligana kei na yavana, sa tau yaono na ligana ruarua kei na yavana ruarua, ka sa kawa ni tamata balavu ka yagolevu.

7Ia ni sa bolei ira na Isireli ko koya, sa mokuti koya ko Jonacani na luve i Semea na tuakai Tevita.

8O iratou oqo eratou sa luve i koya na tamata balavu ka yagolevu mai Kaca; a ratou sa moku mate e na liga i Tevita, kei na ligadra na nona tamata.