1 Korinica 4 - Ai Vola Tabu (Vakadewa Makawa Vakavoutaki 2021)（FRV21）

Na Nodra Veiqaravi nai Apositolo

1Dou daunanumi keitou vakaoqo, ni keitou sa nona dauveiqaravi na Karisito ka tuirara ni veika vuni ni Kalou.

2E na ka oqo, sa kilikili kina kei ira na tuirara me ra kunei ni ra tamata dina.

3Ia vei au, sa dua na ka lailai sara oqo mo dou lewai au se me ra lewai au e dua na tamata. Io, au sa sega mada ga ni daulewai au vakai au.

4Ni'u sa sega ni kila e dua na ka ka'u sa cala kina, ia ka'u sa sega ni vakadonui kina. Ia sai koya ga na Turaga sa lewai au.

5O koya mo dou kakua ni lewa e dua na ka ni se bera na kena gauna, dou wawa mada me lako mai na Turaga, o koya ena vakaraitaka na veika ni butobuto sa vuni tu, ena vakavotuya talega na nanuma ni yaloda. Ia ena qai dokai na tamata yadua mai vua na Kalou.

6Ia na veika oqo ka'u sa vakatovotovotaka vei keirau kei Apolosa e na vukumudou na veiwekani, mo dou vakatavulici kina mai vei keirau e nai balebale ni vosavosa oqo, “Mo kakua ni sivita na ka sa volai,” mo dou kakua kina ni doka cake e dua, ka beca e dua.

7Io, ko cei sa qisi iko mo uasivi cake? Se cava sa tu vei iko sa sega ni soli vei iko? Ia kevaka sa soli vei iko, ko sa dokai iko kina e na vuku ni cava, me vaka sa sega ni soli vei iko?

8Dou sa qai mamau! Dou sa qai vutuniyau! Dou sa lewa vaka na tui ni keitou sa takali; ia ka'u sa vinakata kevaka dou sa lewa dina, me da lewa vata talega kei kemudou.

9Ni ka'u sa nanuma sa lesi keitou nai apositolo na Kalou me keitou muri sara, me keitou vakataki ira era sa lesi me mate, ni keitou sa vakaraitaki ki vuravura, vei ira talega na agilosi, kei ira na tamata.

10Keitou sa lialia e na vuku i Karisito, ia koi kemudou dou sa vuku ni dou sa tu vata kei Karisito; keitou sa malumalumu, ia dou sa kaukauwa; dou sa vakarokorokotaki, ia keitou sa beci.

11Ka yacova na gauna oqo keitou sa viakana, ka viagunu, ka luvawale, ka sa vakamavoataki, ka sega na neitou i tikotiko;

12Caka 18.3keitou sa oca, ni keitou sa daucakacaka e na liga i keitou. Ni keitou sa vakasewasewani, keitou sa vosa vinaka; ni keitou sa vakacacani, keitou sa vosota;

13ni keitou sa vosavakacacataki, keitou sa vakamamasu ga. Keitou sa yaco me vaka na benu ni vuravura oqo, io, na duka sa quaraki mai na ka kece, ka yacova na siga edaidai.

Na Veivakadodonutaki Vakatama

14Au sa sega ni vola na veika oqo me'u vakamaduataki kemudou, ia ka'u sa vakatavulici kemudou ni dou sa vakataki ira na noqu gone ni toko.

15Ia kevaka sa udolu vakatini na nomudou i vakavuvuli vei Karisito, sa sega ni lewe vuqa na tamamudou. Ni'u sa vakatuburi kemudou mo dou nei Karisito Jisu e nai tukutuku-vinaka.

161Kori 11.1; Fpai 3.17O koya ka'u sa vakamasuti kemudou kina, mo dou vakadamurimuri au.

17Au sa talai Timoci vei kemudou e na vuku ni ka oqo, o koya na noqu gone ni toko ka yalodina e na Turaga, ia ena vakananumi kemudou ko koya e na noqu i valavala vei Karisito, me vaka na ka ka'u sa vakatavulica e na veiyasana kecega e na veisoqosoqo lewe ni lotu kecega.

18Sa viavialevu ko ira eso, me vaka ni'u na sega ni lako yani vei kemudou.

19Ia ka'u na lako vakatotolo vei kemudou, kevaka sa vinakata na Turaga, ia ka'u na sega ni kila na nodra vosa era sa viavialevu, na kena kaukauwa ga.

20Ni sa sega ni ka ni vosa walega na matanitu ni Kalou, sa ka ga ni kaukauwa.

21A cava dou sa vinakata? Me'u lako vei kemudou ni'u sa taura na kuita, se me'u lako e na loloma, kei na yalomalua?