Aisea 53 - Ai Vola Tabu (Vakadewa Makawa Vakavoutaki 2021)（FRV21）

1 Roma 10.16; Joni 12.38 Ko cei sa vakabauta na neitou i tukutuku?

Ia sa vakatakilai vei cei na liga i Jiova?

2Ni sa tubu cake ko koya me vaka na coke e matana,

ka vaka na waka ni kau mai na qele mamaca;

sa sega ni vinaka na matana ka sa sega ni vatukai vinaka na yagona;

ia ni da sa raici koya, sa sega ni matavinaka ko koya me da qoroi koya kina.

3Sa beci koya ka biuta ko ira na tamata,

sa tamata e daurarawa na lomana, ka sa daukila na ka rarawa;

ka sa vaka e dua eda sa tabonaka na matada mai vua;

ka sa beci, ka da a sega ni dokai koya.

4 Maciu 8.17 E dina sa vosota ko koya na noda rarawa,

ka sa colata na rarawa ni lomada;

ia eda a vakalewa vua ni sa yaviti

ka cudruvi mai vua na Kalou, ka vakararawataki.

5 1Pita 2.24 Ia sa vakamavoataki ko koya e na vuku ni noda talaidredre,

ka sa qaqi e na vuku ni noda caka cala;

sa tau vua na cudruvi sa vu ni noda veivinakati tale,

ia e na we ni kena kuita eda sa vakabulai kina.

6 1Pita 2.25 Koi keda kece eda sa sese ga me vaka na sipi;

eda sa dui lesu tani ki na noda sala koi keda yadua;

ia ko Jiova sa vakatauca vei koya

na noda caka cala kecega.

7 Vtaki 5.6 Caka 8.32,33 Sa vakasaurarataki, ka sa vakamalumalumu ga ko koya,

ia sa sega ni vosa mai ko koya;

me vaka na lami sa tuberi me vakamatei,

ka vaka na sipi sa galu e na mata i koya sa kotiva,

sa galu vakakina ko koya.

8Na veivakararawataki kei na veilewai sa kau tani kina ko koya;

ia ko cei vei ira na nona i tabatamata me ra vakananuma kina?

Ni sa muduki tani ko koya mai na vanua ni bula,

ka sa yaviti e na vuku ni nodra talaidredre na noqu tamata.

9 1Pita 2.22 A ratou sa buluti koya vata kei ira na tamata ca,

kei ira na vutuniyau ni sa mate dina ko koya;

ka sega ga e na vuku ni sai valavala vakaukauwa,

ka sa sega na veivakaisini e na gusuna.

10Ia sa vinakata ko Jiova me qaqi koya,

ka sa vakararawataka ko koya;

ni sa cakava na yalona mei soro e na vuku ni valavala ca,

ena qai kunea na nona kawa, ena vakadedetaka na nona gauna,

ia na ka e vinakata ko Jiova ena vakayacora ga ko koya.

11E na kunea ko koya na vua ni veivakaocataki ni yalona,

ka na vakacegui ga.

Ni ra sa kilai koya na noqu tamata yalododonu,

ena vakadonui ira kina na lewe vuqa ko koya;

ni na colata ko koya na nodra caka cala.

12 Mari 15.28; Luke 22.37 O koya oqo ka'u na votai koya kina kei ira na lewe vuqa,

ia ena votai koya vata kei ira na qaqa e nai toki-ni-valu;

ka ni sa solia oti na nona bula ki na mate,

ka sa wili vata kei ira na dautalaidredre;

ka sa colata ko koya na nodra i valavala ca na lewe vuqa,

ia e na vukudra na dautalaidredre sa ia na veimasulaki.