Aisea 64 - Ai Vola Tabu (Vakadewa Makawa Vakavoutaki 2021)（FRV21）

1Mo ni dresulaka mada na lomalagi, ka lako sobu mai,

me yavala e matamuni na veiulunivanua—

2me vaka na bukawaqa sa tutuvaka na kau vuca,

ka vaka na bukawaqa sa kere kina na wai—

me vakarogoya kina na yacamuni vei ira na nomuni meca;

me ra sautaninini kina e matamuni ko ira na veimatanitu!

3Ni gauna ko ni a cakava kina na veika rerevaki keimami a sega ni namaka,

ko ni a lako sobu mai, ka sa yavala e matamuni na veiulunivanua.

4 1Kori 2.9 Ia mai nai vakatekivu era sa sega ni rogoca,

sa sega ni rogo ki na daliga,

ka sega na mata sa kunea e dua na Kalou, koi kemuni duaduaga,

ko koya sa cakacaka e na vukudra era sa waraki koya.

5Ko ni sa mai tavaki koya na tamata sa marau ka cakava nai valavala dodonu,

ko ira era sa vakananumi kemuni e na nomuni sala.

Raica, ko ni sa cudru, ni keimami sai valavala ca;

e na sala oqori sa tu na bula tawa mudu,

ia keimami na vakabulai.

6Ia keimami sa vaka na ka sa sega ni savasava koi keimami kecega;

ka sa vaka nai sulu qeleqelewa na neimami valavala dodonu kecega.

Keimami sa daumalai me vaka na drau-ni-kau kecega;

ia na neimami caka cala sa vaka na cagi sa kauti keimami tani.

7Sa sega e dua sa masuta na yacamuni,

se uqeti koya me tauri kemuni;

ni kemuni sa tabonaka na matamuni mai vei keimami,

ka sa vakawaicalataki keimami e na neimami valavala ca.

8Ia oqo, kemuni Jiova, ko ni sa tamai keimami;

koi keimami na tete, ia koi kemuni na neimami dautuli kuro;

ia koi keimami kecega na cakacaka ni ligamuni.

9Mo ni kakua ni cudru vakalevu, Jiova,

ia mo ni kakua ni nanuma ka tawa mudu na neimami caka cala.

Mo ni raica, ni kila mada, ni keimami sa nomuni tamata

koi keimami kecega.

10A nomuni veikoro tabu sa vuki me vanua lala,

ko Saioni sa vanua lala,

ko Jerusalemi sa lala.

11A neimami vale tabu ka vakaiukuuku,

sa ra dauia kina na vakavinavinaka vei kemuni ko ira na tamai keimami,

sa kama e na bukawaqa;

ia na neimami ka talei kecega sa vakarusai.

12Ko ni na vosota tiko li, i Jiova, ni sa yaco na ka kece oqo?

Ko ni na galu tiko beka, ka vakararawataki keimami vakalevu sara?