Roma 2 - Ai Vola Tabu (Vakadewa Makawa Vakavoutaki 2021)（FRV21）

Na Cudru ni Kalou

1 Maciu 7.1; Luke 6.37 O koya oqo sa sega kina na nomu ulubale, o iko na tamata yadua sa dauvakalelewa; ni ko sa beitaki iko e na nomu vakalewa na tani, ni ko sai valavala tiko vakakina ko iko sa dauvakalelewa.

2Ia eda sa kila ni sa dina na lewa ni Kalou vei ira era sa kitaka na veika vakaoqo.

3Ia ko iko na tamata, sa vakalewai ira era sa kitaka na veika vakaoqo, ka sai valavala vakakina, ko sa nanuma beka ko na dro rawa mai na lewa ni Kalou?

4Se ko sa beca beka na nona loloma levu, kei na nona vosota vakadede, kei na nona cudru vakamalua; ka ko sa sega ni kila ni sa tuberi iko ki na veivutuni na yalovinaka ni Kalou?

5Ia ko iko, me vaka na nomu yalokaukauwa kei na lomamu sa sega ni veivutuni, ko sa binia tikoga vei iko na cudru ki na siga ni cudruvi, ena vakaraitaki kina na lewa dodonu ni Kalou;

6Same 62.12; Vbale 24.12o koya ena sauma na tamata yadua me vaka na nona i valavala:

7na bula tawa-mudu, vei ira era sa gumatua tiko e nai valavala vinaka ka vakasaqara nai ukuuku kei na vakarokoroko kei na tawa mate rawa;

8ia na cudru kei na lesavi vei ira era sa dauveileti, ka talaidredre ki nai vakavuvuli dina, ia ka talairawarawa ki nai vakavuvuli tawa dodonu.

9Na rarawa kei na yaluma, vei ira na tamata kecega sai valavala ca tiko, sa liu vua na Jiu, vei koya talega sa kai matanitu tani,

10ia nai ukuuku, kei na vakarokoroko, kei na vakacegu, vei ira kecega sai valavala vinaka, sa liu vua na Jiu, vei koya talega sa kai matanitu tani.

11Vrua 10.17Ni sa sega ni dau vakaduiduitaka na tamata na Kalou.

12Ni na rusa me vaka sa sega na vunau ko ira kecega sai valavala ca ka sega vei ira na vunau, ka na lewai e na vunau ko ira kecega sai valavala ca ka sa tu vei ira na vunau.

13Ni ra sa sega ni dodonu e na mata ni Kalou ko ira era sa rogoca walega na vunau, o ira ga era sa muria na vunau era na vakadonui.

14Ni ra sa kitaka vakai ira ga na ka ni vunau ko ira na veimatanitu tani, sa sega vei ira na vunau, era sa qai nodra vunau vakai ira ga, ka dina ga ni sa sega vei ira na vunau.

15O ira era sa vakatakila sara ni sa volai e na yalodra nai valavala ni vunau, ka ni sa vakadinadina tiko na nodra lewa-e-loma talega, ka ra sa dui lewa ni sa cala, se sa dodonu na nodra i valavala

16e na siga ena lesi Jisu Karisito kina na Kalou me lewa na nodra veika e vuni tu na tamata, me vaka na noqu i tukutuku-vinaka.

Ko Ira na Jiu kei na Vunau

17Ia kevaka ko sa vakatokai mo Jiu, ka ko sa vakararavi e na vunau, ka sa dokadokai iko e na vuku ni Kalou,

18ka ko sa kila na lomana, ka vinakata na veika sa vinaka sara, ni ko sa vakatavulici mai na vunau;

19o sa vakararavi talega vei iko mo tuberi ira na mataboko, mo nodra rarama era sa tiko e na butobuto,

20mo nodra i vakavuvuli era sa sesewa, mo nodra i vakavuvuli na gone lalai, ni sa nomu e na vunau nai vakatakarakara ni vuku dina;

21ia ko iko ko sa dauvakatavulica na tani, o sa sega li ni vakatavulici iko? O iko ko sa dauvunau me kakua na butako, o sa bau butako ko iko?

22O iko ko sa dau kaya me kakua na veibutakoci, o sa bau veibutakoci ko iko? O iko ko sa daucata na veimatakau, o sa bau butako mai na vale-ni-soro?

23O iko ko sa dokadokai iko e na vuku ni vunau, o sa bau vakalialiai koya na Kalou ni ko sa talaidredre ki na vunau ko ya?

24Aisea 52.5“Ni sa dauvosavakacacataki na yaca ni Kalou vei ira na veimatanitu e na vukumudou,” me vaka sa volai.

25Ni sa yaga vakaidina na veicili kevaka ko sa talairawarawa ki na vunau; ia kevaka ko sa talaidredre ki na vunau, sa yaco kina na nomu cili me tawa-cili.

26E na ka oqo, ni kevaka e dua sa sega ni cili ka sa muria nai valavala dodonu ni vunau, ena sega li ni wili na nona tawa-cili me cili?

27Ia ko koya sa sega ni cili vakayago, ke sa muria na vunau, ena sega li ni lewai iko, o iko sa talaidredre ki na vunau, ka sa tu vei iko nai vola kei na veicili?

28Ni sa sega ni Jiu ko koya sa vakakina walega e taudaku, ka sa sega ni veicili na ka sa rairai walega e na yago.

29Vrua 30.6Ia sa Jiu ko koya sa vakakina e loma, kei na veicilivi dina sa ka ni yalo—ni sa ka vakayalo ka sega ni ka e toqai vakaivola. Ko koya oqo sa sega ni dokai mai vei ira na tamata, ia mai vua ga na Kalou.