Aisea 39 - Ai Vola Tabu (Vakadewa Makawa Vakavoutaki 2021)（FRV21）

Era sa Kidavaki nai Talaki mai Papiloni

1E na gauna ko ya ni sa rogoca ko Merotaki-paletani na tui Papiloni, na luve i Paletani, ni sa tauvi mate ko Esekaia, ka sa bula tale, sa qai vakauta vua nai vola kei na ka-ni-loloma.

2Ka sa rekitaki ira ko Esekaia, ka vakaraitaka vei ira na vale ni nona ka talei, na siliva, kei na koula, kei na ka boi vinaka, kei na waiwai vinaka, kei na vale taucoko ni nona i yaragi, kei na nona i yau kecega. Sa sega e dua na ka e nona vale kei na nona matanitu taucoko me sega ni vakaraitaka vei ira ko Esekaia.

3Sa qai lako mai kivei Esekaia na tui ko Aisea na parofita, ka sa kaya vua, “A cava era kaya ko ira na tamata oqo? Ka ra sa lako mai vei kivei iko?” Ka sa kaya ko Esekaia, “Era sa lako mai na vanua vakayawa, io mai Papiloni.”

4Sa qai kaya ko koya, “A cava era sa kunea mai nomu vale?” Ka sa kaya ko Esekaia, “Na ka kecega sa tu e na noqu vale era sa kunea. Sa sega ni dua na noqu i yau ka'u sa sega ni vakaraitaka vei ira.”

5A sa kaya vei Esekaia ko Aisea, “Mo rogoca mada na vosa i Jiova-ni-lewevuqa:

6Raica, sa lako mai na gauna ena kau tani kina ki Papiloni na ka kecega sa tu e na nomu vale, kei na ka era sa binia na nomu qase ka yacova na siga oqo. Ena sega ni vo e dua na ka, sa kaya ko Jiova.

7Tani 1.1-7; 2Tui 24.10-16; 2Vei 36.10Ia ko ira na luvemu era na tubu e muri mai vei iko, ko ira ko na vakatubura, era na kauta tani, ka ra na mata e na vale vakaturaga i koya na tui Papiloni.”

8A sa kaya vei Aisea ko Esekaia, “Sa vinaka na vosa i Jiova ko sa mai tukuna.” Sa kaya talega, “Sa na tiko na sautu kei na ka dina e na noqu gauna.”