2 Veigauna 8 - Ai Vola Tabu (Vakadewa Makawa Vakavoutaki 2021)（FRV21）

Na Veika e Cakava ko Solomoni(1 Tui 9.10-28)

1Ni sa oti e ruasagavulu na yabaki, sa tara tiko kina ko Solomoni na vale i Jiova, kei na nona vale,

2sa qai tara ko Solomoni na veikoro sa vakasuka ko Irami kivei Solomoni, a sa vakaitaukeitaki ira kina na Isireli.

3A sa lako ki Emaci-sopa ko Solomoni, ka sa rawa.

4A sa tarai Tatimoa mai na vanua lala, kei na veikoro ni yau, sa tara ko koya mai Emaci.

5A sa tarai Peci-oroni mai cake, kei Peci-oroni mai ra, sa rau koro-ni-valu, sa vakabai, sa vakamatamata-ni-koro, ka vakaisogo-lawalawa;

6kei Pealaci, kei na veikoro kecega ni yau i Solomoni, kei na veikoro kecega ni qiqi-ni-valu, kei na veikoro ni tamata dauvodo ose, kei na ka kecega sa via tara ko Solomoni mai Jerusalemi, kei Lepanoni, kei na veivanua kecega ni nona matanitu.

7Ko ira kecega na tamata sa vo mai vei ira na Itaiti, kei ira na Amoraiti, kei ira na Perisaiti, kei ira na Aivaiti, kei ira na Jepusaiti, era sa sega ni Isireli,

8ia na luvedra sa vo me taravi ira e na vanua, ko ira era a sega ni vakarusa ko ira na Isireli—vei ira oqori sa lavaka ko Solomoni me ra nona tamata bobula, ka yacova na siga oqo.

9Ia sa sega ni vakasaurarataka e dua vei ira na Isireli ko Solomoni; era sa nona sotia ga, ka nona vakailesilesi, ka turaga ni nona qiqi-ni-valu kei ira na nona tamata dauvodo ose.

10Ia ko ira oqo era sa liu vei ira na nona tamata turaga i Solomoni na tui, era sa le rua na drau ka limasagavulu era sa lewai ira na tamata.

11A sa kauta ko Solomoni na luve i Fero ka yalewa mai na koro i Tevita, ki na vale sa tara oti me nona, ni sa kaya, “Me kakua mada ni tiko na watiqu e na vale i Tevita na tui Isireli, ni sa tabu tu, na tikina sa yaco kina na kato i Jiova.”

12Sa qai vakacabora ko Solomoni nai soro kama vei Jiova e dela ni cabocabo-ni-soro i Jiova, sa cakava ko koya e na mata ni varada,

13Lako 23.14-17; 34.22-23; Tiko 28.9; 29.39; Vrua 16.16ia me vaka sa rauta na siga yadua, sa vakacabori tiko me vaka nai vakaro i Mosese, e na veisiga ni vakacecegu, kei na veivula vou, kei na solevu sa lokuci e tolu e na yabaki—na solevu ni madrai sa sega ni vakaleveni, kei na solevu ni veiwiki, kei na solevu ni vale tabanikau.

14A sa lesia ko koya na veimatabete ki na nodra cakacaka, me vaka sa vakarota ko Tevita na tamana, kei ira na Livai ki na nodra i tavi, me lagata na sere ka veiqaravi e matadra na bete, me vaka sa rauta na siga yadua, ko ira talega nai vakatawa-ni-katuba e na nodra veimata, ki na matamata-ni-koro kecega, ni sa vakarota vakaoqo ko Tevita na tamata ni Kalou.

15A ra sega ni biuta e dua nai vakaro ni tui vei ira na bete kei ira na Livai e na vuku ni veika, se e na vuku ni yau.

16A sa vakarautaki oti na cakacaka i Solomoni ki na siga sa tauyavutaki kina na vale i Jiova, ka yacova na siga sa oti kina. Sa vakaoti vakavinaka na vale i Jiova.

17Sa qai lako ko Solomoni ki Esi-oni-keperi, kei Eloci, mai na matasawa e na vanua ko Itomi.

18A sa tala ko Irami na nona tamata eso, me ra kauta vua na waqa eso, eso talega vei ira era kai wai; a ra sa lako vata kei ira na tamata nei Solomoni ki Ofa, ka ra kauta mai kea e va na drau ka limasagavulu na taledi koula, ka kauta vei Solomoni na tui.