Jope 29 - Ai Vola Tabu (Vakadewa Makawa Vakavoutaki 2021)（FRV21）

Nai Otioti ni Vosa i Jope

1A sa tomana tale na nona vosa ko Jope, ka kaya:

2“Isa, ke sa vaka mada e na veivula eliu na noqu tiko oqo,

me vaka na gauna sa dauyadravi au voli kina na Kalou;

3ni sa daucilava na uluqu na nona cina,

ni'u sa daulako e loma ni butobuto e na nona rarama;

4e na gauna ka tu donu kina na noqu bula,

ni sa tiko e na noqu vale na veitokani ni Kalou;

5ni sa tiko vata ga kei au ko Koya sa Kaukauwa,

ka ratou sa vakavolivoliti au na luvequ;

6ni'u a vuya na noqu i lakolako e na uro ni wai-ni-sucu,

kei na vatu sa sova mai vei au na veiuciwai ni waiwai!

7Ni'u a lako yani e loma ni koro ki na matamata-ni-koro,

ni'u sa vakarautaka na noqu i tikotiko e na rara ni koro,

8era sa raici au na cauravou ka vunitaki ira,

ka ra sa tucake na qase ka wavu tu;

9era sa galu mada na turaga ni vanua,

ka tabonaka na gusudra e na ligadra;

10era sa tiko lo na turaga dokai,

ka sa kabita na loma ni gusudra e cake na yamedra.

11Ni sa rogoci au na daliga, sa qai vosavakalougatataki au,

ia ni sa raici au na mata, sa qai vakadonui au,

12baleta ni'u a vakabula na dravudravua ka sa tagi,

kei na luveniyali sa sega e dua me vukei koya.

13Sa vosavakalougatataki au ko koya sa voleka ni rusa,

ka'u a vakamarautaka na yalona na yada.

14Au a vakatikora na yalododonu, ka sa vakasulumi au voli;

na noqu lewa dodonu sa vaka nai sulu levu kei nai sala vakaturaga.

15Au sa matadra na mataboko,

ka yavadra na lokiloki.

16Au sa tamadra na dravudravua,

ka'u a vakatataro ni veivuke vua ka'u sa sega ni kila.

17Ka'u a vorolaka na galegaledra na tawa dodonu,

ka kaliraka mai na batidra na ka era kauta tani vakaukauwa.

18Au a qai vakananuma, ‘Au na mate e na noqu sova,

ka'u na vakavuqataka na noqu siga me tautauvata kei na nuku;

19sa teteva na wai na wakaqu,

ka sa tiko na tegu e na tabaqu e na bogi taucoko;

20sa vakavoui tikoga na noqu i ukuuku,

ka sa vakaukauwataki tu e ligaqu na noqu dakaititi.

21“Sa ra vakarorogo vei au ko ira na tamata ka wawa tiko,

ka tiko lo e na vuku ni noqu veivakasalataki.

22Ni'u a vosa oti era sa sega ni qai vosa tale,

ka sa lutuki ira na noqu vosa me vaka na tegu.

23Era sa waraki au me vaka era waraka na uca;

ka ra sa dalaga sara me vaka ki na uca taumuri.

24Ka'u a matadredredre vei ira ni sa yali na nodra yate dei;

ka sa sega na ka era kitaka me'u vakaveveku mata kina.

25Au a digitaka na nodra sala, ka'u a dabe sobu vakaturaga,

ka bula voli me vaka na tui kei ira na mataivalu,

me vaka e dua sa vakacegui ira era tagi.