Josua 17 - Ai Vola Tabu (Vakadewa Makawa Vakavoutaki 2021)（FRV21）

Votavota ni Yavusa Veimama i Manasa Kadua (Ra ni Joritani)

1A sa dua nai votavota vei ira na yavusa i Manasa; ni sa ulumatua i Josefa ko koya; vei Mekiri na ulumatua i Manasa, na tama i Kiliati, ni sa tamata i valu ko koya, sa nona kina ko Kiliati kei Pasani.

2Ia ko ira na luve i Manasa sa vo, era sa tauyadua na nodra i votavota me vaka na nodra veivuvale; vei ira na luve i Epieseri, kei ira na luve i Eleki, kei ira na luve i Esirieli, kei ira na luve i Sikemi, kei ira na luve i Eferi, kei ira na luve i Simita; ko ira oqo na tagane na luve i Manasa na luve i Josefa, me vaka na nodra veivuvale.

3Ia ko Silofati, na luve i Eferi, na luve i Kiliati, na luve i Mekiri, na luve i Manasa, sa sega na luvena tagane, eso ga na luvena yalewa. Ia oqo na yacadratou na luvena yalewa: ko Mala, kei Noa, ko Okila, ko Milika, kei Tirisa.

4Tiko 27.1-7A ratou sa lako mai kivei Iliesa na bete, vei Josua talega na luve i Nuni, kei ira na turaga, ka kaya, “Sa vakarota vei Mosese ko Jiova me solia vei keitou nai votavota e na kedra maliwa na weka i keitou.” Sa qai solia kina vei ira ko koya e dua nai votavota e na kedra maliwa na weka i tamadratou, me vaka na vosa i Jiova.

5A sa votai vei ira na Manasa e tini na tikina, kei na vanua ko Kiliati kei Pasani talega, mai na tai kadua ni Joritani,

6baleta ni sa dua na nodra i votavota na luve i Manasa era yalewa e na kedra maliwa na luvena tagane. Ia ko ira na luve i Manasa sa vo, sa nodra na vanua ko Kiliati.

7Na nodra i yalayala na yavusa i Manasa sa tekivu mai Aseri ka yaco ki Mikimecaci, ko ya sa donui Sikemi; a sa lako nai yalayala ki nai matau kivei ira na kai Eni-tapua.

8Sa nodra na Manasa na vanua ko Tapua, ia ko Tapua e na nodra i yalayala na Manasa, sa nodra na Ifereimi;

9a sa lako sobu nai yalayala ki na uciwai ko Kana, mai na tai ni uciwai ki na ceva, sa nodra na Ifereimi na veikoro oqo, e na maliwa ni nodra veikoro na Manasa. Na nodra i yalayala talega na Manasa, sa koto e na tai ni uciwai ki na vualiku, ia sa kenai mudumudu na waitui.

10Sa nodra na Ifereimi na tai ki na ceva, ka nodra na Manasa na tai ki na vualiku, ia na kenai yalayala na waitui; a sa yaco ki Aseri mai na vualiku, ka yaco ki Isakari mai na tokalau.

11Ia sa nodra na Manasa, mai Isakari kei Aseri, ko Peci-siani kei na kena veikoro, kei Ipiliami kei na kena veikoro, kei ira na kai Doa kei na kena veikoro, kei ira na kai Edoa kei na kena veikoro, kei ira na kai Tenaki kei na kena veikoro, kei ira na kai Mikito kei na kena veikoro, sa tolu na vanua.

12Dvei 1.27,28Ia era sa sega ni vakasavi ira tani rawa na lewe ni veikoro ko ya ko ira na Manasa; ia era sa gu na kai Kenani me ra tiko e na vanua ko ya.

13Ia ni ra sa tubu me kaukauwa na Isireli, era sa vakasaurarataki ira na kai Kenani me ra qali; ka sega ni vakasavi ira tani sara.

Era Vosa Kudrukudru na Luve i Josefa

14A ra sa vosa vei Josua ko ira na luve i Josefa, ka kaya, “A cava ko sa solia kina vei au e dua bauga nai votavota ka dua bauga na tikina me'u taukena, ni keimami sa lewe vuqa, ka ni sa vakalougatataki au ko Jiova ka yaco ki na gauna oqo?”

15A sa kaya vei ira ko Josua, “Kevaka ko ni sa lewe vuqa, mo ni lako cake ki na veikau, ka caramaka na vanua me nomuni e na nodra vanua na Perisaiti kei na Refaimi, me vaka ni sa rui qiqo vei kemuni na vanua veiulunivanua mai Ifereimi.”

16A ra sa kaya na luve i Josefa, “Sa sega ni rauti keimami na vanua veiulunivanua; ia na kai Kenani sa tiko e na vanua buca era sa vakaqiqi-ni-valu kaukamea mai Peci-siani kei na kena veikoro, kei ira mai na buca ko Jesireli.”

17A sa vosa ko Josua ki na yavusa i Josefa, io vei ira na Ifereimi kei na Manasa, ka kaya, “Kemuni sa lewe vuqa, ka sa kaukauwa vakalevu. Ena sega ni dua bauga na nomuni votavota,

18ia e na nomuni na vanua veiulunivanua, ka dina ga ni se veikau tu, mo ni na qai caramaka ka taukena me yacova na kenai yalayala. Ia ko ira na kai Kenani, ka dina ga ni ra sa vakaqiqi-ni-valu kaukamea ka ra sa kaukauwa talega, ia ko ni na vakasavi ira tani ga.”