Josua 20 - Ai Vola Tabu (Vakadewa Makawa Vakavoutaki 2021)（FRV21）

Na Veikoro ni Drodro ni Valu

1 Tiko 35.9-34; Vrua 4.41-43; 19.1-13 A sa vosa vei Josua ko Jiova, ka kaya,

2“Mo vosa vei ira na Isireli, ka kaya, ‘Dou lesia me nomudou na veikoro ni drodro, ka'u a vosa kina vei kemudou e na gusu i Mosese,

3me dro kina ko koya sa vakamatea e dua ni sa sega ni nakita, se ni sa sega ni kila; ia dou na dro kina mai vei koya sa nona i tavi me sauma na mate.

4Ia ni sa dro ko koya ki na dua na koro oqo, ena tu ko koya e na matamata-ni-koro, ka tukuna vei ira na qase ni koro ko ya na ka sa cakava, a ra na kauti koya vei ira ki loma ni koro, a ra na lesia e dua na tikina, me tiko kina kei ira ko koya.

5Ia kevaka sa muri koya ko koya sa nona i tavi me sauma na mate, era na sega ni soli koya ka ia na veivakamatei ki na ligana; ni sa vakamatea na wekana ka sega ni kila, ka sega ni cati koya eliu.

6Ia ena tiko ga ko koya e na koro ko ya, ka yacova na siga e na tarogi kina e matadra nai soqosoqo me lewai, me yaco mada na nona mate ko koya sa bete levu e na gauna ko ya; me na qai lesu ko koya sa ia na veivakamatei, ki na nona koro, kei na nona vale, ki na koro ka dro mai kina.’ ”

7A ra sa lesi Ketesi mai Kalili e na vanua veiulunivanua ko Navitalai, kei Sikemi mai na vanua veiulunivanua ko Ifereimi, kei Kiriaci-aripa (ko ya ko Epironi) mai na vanua veiulunivanua ko Juta.

8Ia mai tai kadua ni Joritani, ka donui Jeriko vaka ki na tokalau, era lesi Peseri mai na vanua lala, mai na buca, e na yavusa i Rupeni, kei Remoci mai Kiliati, e na yavusa i Kata, kei Kolani mai Pasani, e na yavusa i Manasa.

9Oqo na veikoro sa lesi vei ira kecega na Isireli, kei ira na vulagi sa tiko vulagi kei ira, me dro kina na tamata kecega sa mokuta-mate e dua ni sa sega ni nakita, ka me kakua ni mate e na liga i koya sa nona i tavi me sauma na mate, ka me tarogi mada eliu e na matadra nai soqosoqo.