Isikeli 37 - Ai Vola Tabu (Vakadewa Makawa Vakavoutaki 2021)（FRV21）

Na Buca ni Sui Mamaca

1Sa tiko vei au na liga i Jiova, ka sa kauti au yani e na Yalo i Jiova, ka vakatikori au e na loma ni dua na buca sa sinai tu e na sui,

2ka sa vakalakovi au voli kina me'u vakavolivolita; ka raica, sa ka levu sara na sui e na dela ni buca; ka raica, sa ra mamaca sara.

3Sa qai kaya vei au ko koya, “Ko iko na luve ni tamata, sa na bula rawa li na sui oqo?” Au a qai kaya, “Kemuni na Turaga Jiova, ko ni sa kila ga.”

4Sa qai kaya tale vei au, “Mo ia na parofisai e na vuku ni sui oqo, ka kaya, Oi kemudou na sui mamaca, dou rogoca na vosa i Jiova.

5Sa kaya vakaoqo na Turaga ko Jiova ki na sui oqo: Raica, au na vakacuruma nai cegu vei kemudou, dou na qai bula.

6Ia ka'u na solia vei kemudou na ua, ka vakatubura cake na lewemudou, ka ubi kemudou e na kulimudou, ka vakacuruma vei kemudou na cegu, dou na qai bula; ia dou na kila ni sai au ko Jiova.”

7Au a qai ia na parofisai me vaka sa vakaroti vei au. Ia ni'u sa ia tiko na parofisai, sa dua mai na rorogo, ka raica, sa yavavala mai, ka ra sa dui veitorovi na sui ki na kenai sa.

8Ia ni'u a vakaraica tiko, raica, sa tubu cake mai na kena ua kei na lewena, ka sa vakasulumi taucoko e na kulina; ia sa sega na cegu vei ira.

9Sa qai kaya vei au ko koya, “Mo ia na parofisai ki nai cegu, mo ia na parofisai, ko iko na luve ni tamata, ka kaya ki nai cegu, Sa kaya vakaoqo na Turaga ko Jiova: Mai na mata ni cagi va-va mo lako mai kina, nai cegu, ka ceguvi ira sa mate tu oqo, me rawa ni ra bula tale.”

10Vtaki 11.11Au a qai ia na parofisai me vaka sa vakaroti vei au, ka sa qai curumi ira na cegu, ka ra sa bula, ka tucake mai e na yavadra, e dua na mataivalu levu sara.

11Sa qai kaya vei au ko koya, “Ko iko na luve ni tamata, na suidra oqo sai koya na lewe-ni-vuvale kecega i Isireli. Raica, era sa kaya, ‘Sa mamaca na suida, ka sa yali na ka eda a vakanuinui kina; eda sa muduki laivi sara koi keda.’

12O koya oqo mo ia kina na parofisai, ka kaya vei ira, Sa kaya vakaoqo na Turaga ko Jiova: Raica, au na dolava na nomudou i bulubulu, ka kauti kemudou cake na noqu tamata mai na nomudou i bulubulu, ka kauti kemudou ki na vanua ko Isireli.

13Ia dou na kila ni sai au ko Jiova, ni'u sa dolava na nomudou i bulubulu, ka vakaturi kemudou cake mai na nomudou i bulubulu, koi kemudou na noqu tamata.

14Ka'u na solia talega na Yaloqu vei kemudou, ka dou na bula kina, ka'u na vakatikori kemudou talega ki na nomudou vanua. Dou na qai kila ni sai au ko Jiova; ka'u sa tukuna, ka'u na cakava talega, sa kaya ko Jiova.”

Nai Titoko e Rua

15Sa yaco tale vei au na vosa i Jiova, ka vaka:

16“Ko iko, na luve ni tamata, mo taura e dua nai titoko, ka vola kina, ‘A nodra na Juta, ka nodra talega na Isireli era nona i tokani’; ka mo qai taura e dua tale nai titoko ka vola kina, ‘A nei Josefa (nai titoko i Ifereimi) kei ira kece na matavuvale i Isireli era nona i tokani.’

17Ia mo semati rau vata mei titoko e dua bau ga, me rawa ni yaco kina me rau sa duabau ga e ligamu.

18Ia ni ra sa vosa vei iko ko ira na luve ni kai nomu, ka kaya, ‘O na sega li ni vakatakila vei keitou se cava ko nakita e na ka oqori?’

19mo qai kaya vei ira, Sa kaya vakaoqo na Turaga ko Jiova: Raica, au na taura nai titoko i Josefa, o koya ka tu e na liga i Ifereimi, kei na veiyavusa i Isireli era nona i tokani, ka vakauturi ira vata kaya, io kei nai titoko i Juta, ka vakayacori ira me rai titoko e duavata ga, ka ra na yaco me ra dua bau ga e na ligaqu.

20Ia ni sa yaco nai titoko ko sa volavola kina me laki tu e na ligamu e matadra,

21mo qai kaya vei ira, Sa kaya vakaoqo na Turaga ko Jiova: Raica, au na kauti ira na Isireli mai vei ira na veimatanitu tani, era sa dui yaco yani kina, ka vakasoqoni ira mai na veiyasana, ka kauti ira ki na nodra vanua.

22Ka'u na qisi ira me ra dua bau ga na matanitu e na vanua, e na veiulunivanua i Isireli; ia ena dua bauga na tui vei ira kecega. Ka ra na sega tale ni rua na matanitu, io era na sega sara ni wase tale me rua na matanitu.

23Ka ra na sega ni vakadukadukalitaki ira tale e na nodra matakau, se na nodra ka vakasisila, se dua na nodra talaidredre. Ia ka'u na vakabulai ira mai na nodra i tikotiko kece, era sai valavala ca kina, ka vakasavasavataki ira. Ka ra na vakabau me ra noqu tamata, ia koi au talega ka'u na yaco me'u nodra Kalou.

24 Isi 34.24 “Ia ko Tevita na noqu tamata, ena sa nodra tui ko koya; io ena dua bau ga nai vakatawa vei ira kecega. Ka ra na muria talega na noqu lewa, era na vakabauta na noqu vunau ka cakava.

25A ra na tiko ga e na vanua ka'u a solia vua na noqu tamata ko Jekope, na vanua era sa tiko kina ko ira na nomudou qase; ka ra na tiko kina ko ira, kei ira na luvedra, kei na makubudra ka sega ni mudu; ia ko Tevita na noqu tamata, ena nodra turaga ko koya ka sega ni mudu.

26Ia ka'u na cakava na veiyalayalati ni veivinakati kei ira; sa na veiyalayalati ka sega ni mudu. Au na vakataukeni ira talega, ka vakalewevuqataki ira, ka solia na noqu vale tabu me tu ga e na kedra maliwa ka sega ni mudu.

272Kori 6.16; Vtaki 21.3Ena tu vata talega kei ira na noqu vale; io ka'u na yaco me'u nodra Kalou, ko ira talega era na vakabau me ra noqu tamata.

28Ka ra na kila na veimatanitu ni sai au ko Jiova ka vakatabui ira na Isireli, ka ni sa tu ga na noqu vale tabu e na kedra maliwa ka sega ni mudu.”