1Ia e na gauna ko ya, era sa dausoqona vata na nodra veimataivalu ko ira na kai Filisitia me ia nai valu, ka me ra veivala kei ira na Isireli. Ka sa kaya vei Tevita ko Akisa, “Mo kila sara tiko ni ko na lako vata kei au ki nai valu, o iko kei ira na nomu tamata.”
2A sa kaya vei Akisa ko Tevita, “Sa vinaka, ka o ni na kila vakaidina na veika e rawa ni cakava na nomuni tamata.” Ka sa kaya vei Tevita ko Akisa, “Sa vinaka, ka'u na lesi iko kina mo dauyadravi au e na vo ni nomu bula.”
3 1Samu 25.1 Vsoro 20.27; Vrua 18.10,11 Ia oqo, a sa mate ko Samuela, ka ra sa tagicaki koya oti ko ira kecega na Isireli ka buluta mai Rama, io e na nona koro ga. Ia ko Saula sa vakatalai ira tani oti na daucurumi kei ira na dauveinita mai na vanua.
4A ra sa soqoni vata ko ira na kai Filisitia ka ra sa lako yani ka tiko mai Sunemi. A sa soqoni ira vata kecega na Isireli ko Saula ka ra sa la'ki tiko mai Kilipoa.
5Ni sa raica ko Saula na nodra mataivalu na kai Filisitia, sa rere, ka sa taqaya vakalevu na lomana.
6Tiko 27.21Ni sa tarogi Jiova ko Saula, a sa sega ni vosa vua ko Jiova e na tadra, se e na Urimi, se e na gusudra na parofita.
7A sa qai kaya vei ira na nona tamata ko Saula, “Dou vakasaqara mada e dua na yalewa sa daucurumi, me'u lako vua, ka tarogi koya.” A ra sa kaya vua ko ira na nona tamata, “Raica, sa tiko mai Edoa e dua na yalewa sa daucurumi.”
8A sa qai lako vakavuni ko Saula ka sa sulumaka nai sulu tani, ka lako, ko koya kei na le rua tale na tamata. A ratou sa lako mai vua na yalewa e na bogi. A sa kaya ko koya, “Mo caka-i-sausau mada e na vukuqu ni ko sa daucurumi, ka kauti koya cake mai vei au ko koya ka'u na cavuta vei iko.”
9A sa kaya vua ko koya na yalewa, “Raica, ko sa kila vinaka tiko na ka sa cakava ko Saula, ni sa vakamatei ira laivi era sa daucurumi kei ira era sa dauveinita mai na vanua. Ia na cava ko sa via corita kina na noqu bula, me'u vakamatei?”
10Ia sa bubului ga vua ko Saula e na yaca i Jiova, ka vaka, “Me vaka sa bula ko Jiova, ena sega ni yacovi iko e dua na ka ca e na vuku ni ka oqo.”
11A sa kaya na yalewa, “O cei me'u kauta cake mai vei iko?” A sa kaya ko koya, “Mo kauti Samuela cake mai vei au.”
12Ia ni sa raici Samuela ko koya na yalewa, sa qoqolou vakadomoilevu. A sa vosa vei Saula na yalewa, ka kaya, “A cava ko sa vakaisini au kina? Ko iko ga o Saula!”
13A sa kaya vua ko koya na tui, “Mo kakua ni rere. A cava ko sa raica?” A sa kaya vei Saula na yalewa, “Au sa raica e dua na kalou ni sa lako cake tiko mai na loma ni qele.”
14A sa kaya vua ko koya, “E vakaevei tu na kena i rairai?” A sa kaya ko koya, “Sa lako cake mai oqo e dua na tamata qase, ka sa ubi voli e na dua nai tutuvi.” Sa qai kila ko Saula ni sai koya ga ko Samuela, ka sa cuva sobu ki na qele ka vakarokoroko.
15A sa qai kaya vei Saula ko Samuela, “A cava ko sa vakayavalati au kina, ka kauti au cake mai?” A sa kaya ko Saula, “Au sa leqa vakalevu, ni ra sa mai vala kei au na kai Filisitia, ka sa lako tani vei au na Kalou, ka sega tale ni vosa vei au, sa segai e na gusudra na parofita, se e na tadra. Ia ka'u a kacivi iko kina mo vakatakila vei au na ka me'u cakava.”
16A sa kaya ko Samuela, “Ia ka cava ko sa tarogi au kina, ni sa lako tani vei iko ko Jiova, ka sa vuki me nomu meca?
171Samu 15.28Sa vakayacora oqo vei iko ko Jiova me vaka na nona vosa ka'u a tukuna, ni sa kaliraka mai vei iko na matanitu ko Jiova ka sa solia vua na kai nomu, io vei Tevita.
181Samu 15.3-9Ni ko a sega ni vakarorogo ki na vosa i Jiova, ka sega ni kitaka vei ira na Amalekaiti me vaka na nona cudru waqawaqa, o koya oqo sa cakava kina vei iko ko Jiova edaidai na ka oqo.
19Ia ena soli ira na Isireli ko Jiova vata kei iko talega ki na ligadra na kai Filisitia; ia ko iko kei iratou na luvemu, dou na tiko vata kei au e na mataka. Ena solia talega ko Jiova na nodra mataivalu na Isireli ki na ligadra na kai Filisitia.”
20Sa qai bale vakasauri ko Saula ka dodo ki na qele, ka sa rere vakalevu e na vuku ni vosa i Samuela. A sa sega tale vua na kaukauwa, ni a sega tu ni kana e na siga taucoko kei na bogi taucoko ko ya.
21A sa toro vei Saula na yalewa, ka raica ni sa taqaya vakalevu ko koya, ka sa qai kaya vua, “Raica, sa vakarorogo na nomuni vada ki na nomuni vosa ka'u sa tauca ki ligaqu na noqu bula, ka'u sa talairawarawa ki na nomuni vosa ko a vosataka vei au.
22Ia mo ni qai muria na vosa ni nomuni vada, ka me'u vakarautaka mada e dua na kemuni kakana; ia mo ni kana, mo ni kaukauwa kina ni kemuni sa lako tale yani e na nomuni lakolako.”
23A sa bese ko koya, ka kaya, “Au na sega ni kana.” Ia eratou sa cikevi koya, koi rau na nona tamata kei koya na yalewa, ka sa qai muria ko koya na nodratou vosa. A sa duri cake mai na qele ko koya, ka dabe e nai mocemoce.
24A sa tiko vua na yalewa mai vale e dua na luve ni bulumakau yago vinaka, ka sa kusarawa ko koya, ka vakamatea, ka taura na madrai droka, ka natuka, ka vavia kina na madrai sa sega ni vakaleveni.
25A sa kauta kivei Saula, kivei rau talega na nona tamata, ka ratou sa kana. Eratou sa qai cavu tu ka lako yani e na bogi ko ya.
Who We AreWhat We EelieveWhat We Do
2025 by iamachristian.org,Inc All rights reserved.
