Jope 10 - Ai Vola Tabu (Vakadewa Makawa Vakavoutaki 2021)（FRV21）

Vosa i Jope Vua na Kalou: Sa Ka ni Oca na Bula

1“Sa ka ni oca ki na lomaqu na noqu bula;

au na vosa e na galala me baleta na noqu kudru;

au na vosa ga e na rarawa ni yaloqu.

2Au na kaya vua na Kalou, ‘Mo ni kakua ni vakacalai au;

mo ni vakatakila vei au se cava ko ni sa veileti kina kei au.

3Sa vinaka beka vei kemuni mo ni ia na veivakararawataki,

mo ni beca talega na cakacaka ni ligamuni

ka tokona na nodra i tuvatuva na tamata ca?

4Sa tiko beka vei kemuni na mata vakatamata?

Ko ni sa dauraica beka na ka me vaka sa raica na tamata?

5Sa tautauvata beka na nomuni siga kei na nodra siga na tamata,

se tautauvata na nomuni veiyabaki kei na veiyabaki ni tamata,

6mo ni sa vakataroga kina na noqu cala,

ka vakaqaqa na noqu i valavala ca,

7ka dina ga ni ko ni sa kila ni'u sa sega ni cala koi au,

ka sa sega e dua me vakabulai au rawa mai na ligamuni?

8Sa ukucavutaki au ka buli au na ligamuni,

ia oqo ko ni sa qai vakarusai au ga.

9Mo ni nanuma ni kemuni sa buli au me vaka sa caka na tete;

ka ko ni na vakalesui au tale beka me'u kuvu-ni-soso?

10Ko ni sa sega beka ni livi au yani me vaka na sucu

ka buli au me vaka na uma jisi?

11Ko ni sa vakaisulutaki au e na kuliqu kei na lewequ,

ka viribaiti au e na suiqu kei na ua.

12Ko ni sa solia vei au na bula kei na loloma,

kei na nomuni dauraici au sa maroroi kina na yaloqu.

13Ia na ka kece oqo ko ni sa vunia e lomamuni;

ka'u sa kila ni sa tiki ni nomuni i naki na ka oqo.

14Kevaka ka'u sai valavala ca, mo ni dikevi au,

ka kakua ni vagalalataki au mai na noqu caka cala.

15Kevaka ka'u sai valavala ca, ka'u na ca ga kina!

Kevaka ka'u sa caka dodonu, ka'u sa sega ga ni ta cake rawa,

ni'u sa luvuci e na madua

ka'u sa raica tiko na noqu rarawa.

16Ni'u sa tubu ga, ko ni sa vakasasataki au me vaka na laione daukata;

ka ko ni sa cakacaka vakurabui tale mai vei au.

17Ko ni sa dau lesia eso nai vakadinadina vou me ra tukuni au vakaca,

ka vakalevutaka na nomuni cudru vei au;

ka kauta mai na mataivalu vou me ra mai saqati au.

18“A cava ko ni a kauti au kina mai na kete?

E vinaka ke'u a ciba ka sega ni kunei au e dua na tamata,

19me vaka ni'u a sega ni basika,

ka colati ga mai na kete ki nai bulubulu.

20Sa sega beka ni vica walega na noqu siga?

Mo ni kua mada, ka laivi au duadua, me'u vakacegu vakalailai mada,

21ni bera ni'u qai lako yani, ka sega ni lesu tale mai,

io ki na vanua butobuto kei na yaloyalo ni mate,

22e dua na vanua butobuto, me vaka na butobuto loaloa;

na yaloyalo ni mate, sa sega ni vakacokotaki vinaka,

ka sa vaka ga na butobuto na kena rarama.”