2 Veigauna 15 - Ai Vola Tabu (Vakadewa Makawa Vakavoutaki 2021)（FRV21）

Na Veiveisau e Cakava ko Esa na Tui(1 Tui 15.13-15)

1A sa curumi Asaraia na luve i Oteti na yalo ni Kalou,

2ka sa curu yani me tavaki Esa, ka sa kaya vua, “Ni rogoci au mai, kemuni Esa, kei kemuni kecega na Juta kei na Penijamini: Sa na tiko kei kemuni ko Jiova, kevaka kemuni sa tiko kei koya. Kevaka kemuni sa vakasaqarai koya, ena kune vei kemuni ko koya, ia kevaka kemuni sa biuti koya, ena biuti kemuni ko koya.

3Ia, sa yali vakadede vei ira na Isireli na Kalou dina, ka sa yali na bete sai vakavuvuli, ka yali talega na vunau.

4Ia, ni ra a lesu tale vei Jiova na nodra Kalou na Isireli e na gauna ni nodra rarawa, ka vakasaqarai koya, era sa kunei koya.

5Ia e na gauna ko ya sa sega na vakacegu vua sa curu ki tautuba, se vua ka curu mai, ia na ka levu na rarawa ka yaco vei ira kecega na lewe ni veivanua.

6A sa vakarusa na matanitu e dua na matanitu kadua, kei na koro e dua na koro kadua, ni sa vakararawataki ira na Kalou e na ka rarawa kecega.

7Ia mo ni kaukauwa ga! Me kakua ni malumalumu na ligamuni, ni na saumi na nomuni cakacaka.”

8Ia ni sa rogoca ko Esa na vosa oqo, kei na parofisai i Oteti na parofita, sa yalodoudou mai, a sa biuta tani na matakau vakasisila mai na vanua taucoko i Juta kei Penijamini, mai na veikoro talega sa rawa ko koya mai na vanua veiulunivanua ko Ifereimi, ka sa vakavinavinakataka tale nai cabocabo-ni-soro i Jiova, oqori ka tu e na mata ni varada i Jiova.

9A sa vakasoqoni ira vata kecega na Juta kei ira na Penijamini, kei ira na vulagi mai Ifereimi kei Manasa, mai Simione talega, ni ra sa lewe vuqa vei ira na Isireli era vuki mai vua, ni ra raica sa tiko vata kaya ko Jiova na nona Kalou.

10A ra sa soqoni vata mai ki Jerusalemi e nai katolu ni vula, e na kenai katinikalima ni yabaki ni lewa i Esa.

11A ra sa vakacabora kivei Jiova e na gauna ko ya eso na ka ni valu era a tokitaka, e vitu na drau na bulumakau, ka vitu na udolu na sipi.

12A ra cakava na veiyalayalati me ra qaravi Jiova na Kalou ni nodra qase, e na lomadra taucoko, kei na yalodra taucoko;

13ka me sa vakamatei ko koya yadua sa bese ni qaravi Jiova na nodra Kalou na Isireli, ke sa tamata lailai se tamata levu, se tagane se yalewa.

14A ra sa bubului kivei Jiova e na domo levu, kei na qoqolou, kei na uvu davui dina kei na koneti.

15A ra sa marau ko ira kecega na Juta e na vuku ni bubului, ni ra sa bubului e na lomadra taucoko, ka ra sa golevi koya e na nodra gagadre kece; ka sa kune vei ira ko koya, a sa vakasaututaki ira ko Jiova e na veiyasana.

16A sa vakasivoi Meeka talega, na tinana ko Esa na tui, me kakua ni ranadi, ni sa cakava ko koya e dua na matakau ki na kalouyalewa ni veikau; ka sa taya sobu na nona matakau ko Esa, ka vurumemeataka, ka visa mai na soniwai ko Kitironi.

17Ia sa sega ni kau tani e Isireli na veitikina cecere. Ia sa dodonu ga na yalo i Esa e na veisiga kecega ni nona bula.

18A sa kauta ko koya ki loma ni vale ni Kalou na veika sa vakacabora ko tamana, kei na veika sa vakacabora ga ko koya vakai koya—na siliva, kei na koula, kei nai yaya.

19A sa sega tale nai valu ka yacova nai katolusagavulu ka lima ni yabaki ni lewa i Esa.