Jeremaia Nai Vakamacala Taumada - Ai Vola Tabu (Vakadewa Makawa Vakavoutaki 2021)（FRV21）

Nai Vakamacala TaumadaA sa bula voli ko Jeremaia na parofita e nai otioti ni kavitu ni senitiuri se yabaki drau kei nai tekivu ni kaono ni senitiuri. A sa vakasalataki ira na tamata ni Kalou e na gauna balavu ni nona vunau voli ni ra na sotava na leqa levu baleta na nodra sa qarava na kalou tani kei na nodra i valavala ca. A sa bula tiko ka raica ni sa yaco na veika oqori: a sa bale ko Jerusalemi ki na liga i Nepukanesa na tui Papiloni, a sa vakarusai na koro kei na Valenisoro, ka sa kau vakabobula na tui Juta kei na vuqa na tamata ki Papilonia. A sa parofisaitaka talega ni ra na vakalesui tale mai na tamata ka na vakabulai tale na nodra vanua. Nai Vola i Jeremaia e rawa ni wasewasei me vakaoqo: (1) Na kacivi nei Jeremaia; (2) Nai tukutuku ni Kalou eso ki na vanua o Juta kei ira na kena dauveiliutaki ena gauna ni veiliutaki vakatui nei Josaia, kei Jioiakimi, kei Jioiakini, vata kei Setekaia; (3) Na veika eso mai nai tukutuku i Baruki na vunivola i Jeremaia, ka okati talega kina na parofisai eso kei na veika bibi ka bula donumaka ko Jeremaia; (4) Nai tukutuku eso mai vei Jiova me baleta na veimatanitu tani eso; (5) E dua nai kuri ni tukutuku, ka sa tukuni kina na rusa i Jerusalemi kei na nodra kau vakabobula ki Papiloni.A sa tamata dauveikauwaitaki ko Jeremaia ka sa daulomani ira vakalevu na kai nona, ka sa cata vakaukauwa sara me dau vakadewataka nai tukutuku ni veicudruvi vei ira. E vuqa na tikina e nai vola oqo sa dau tukuna o koya e na yalobibi na veika dredre ka mosimosi e curuma na nona bula ena vuku ni nona sa kacivi mai vua na Kalou me parofita. A sa vaka na bukawaqa e lomana na vosa ni Turaga, ka sa sega ni rawa vua me tarova.Eso na vosa talei dina e nai vola oqo sa dusia na veika sa tu mai na taudaku ni gauna dredre ka bula donuya ko Jeremaia e na kena yacovi yani na siga sa vakataudeitaki kina na veiyalayalati vou, e dua na veiyalayalati me ra na maroroya na tamata ni Kalou ka segai tale ni ra vakananumi kina, baleta ni sa na volai sara tu ga e vu ni yalodra (31.31-34).Na Lewe ni VolaNa kacivi nei Jeremaia 1.1-19

Na veiparofisai e na dela ni gauna i Josaia, Jioiakimi, Jioiakini kei Setekaia 2.1—25.38

Na veika ka yaco ena bula i Jeremaia 26.1—45.5

Na veiparofisai era vunauci kina na veivanua 46.1—51.64

Na bale nei Jerusalemi 52.1-34