1A vosa vakayalovinaka sai vakamalumu ni cudru,
ia na vosa kaukauwa sa vakatubura na cudru.
2A yamena na vuku sa vakayagataka na ka era kila,
ia mai na gusudra na lialia sa tovure tu na ka lialia.
3Sa tiko ga na mata i Jiova e na veiyasana kecega,
ka sa vakaraici ira tiko na ca kei ira na vinaka.
4Sa kau ni bula na yame dauveivakabulai,
ia ni sa tu kina na ka vakatani, sa mavoa kina na yalo.
5O koya sa lialia sa beca nai vakavuvuli i tamana,
ia ko koya sa vakabauta na vunau sa yalomatua.
6Sa tu nai yau levu e na nona vale na yalododonu,
ia na nodra i yau nai valavala ca sa tu vata kei na rarawa.
7A tebenigusudra na vuku sa kaburaka na vuku,
ia na lomadra na lialia sa sega ni vakakina.
8Sa ka vakasisila vei Jiova na nodra i soro nai valavala ca,
ia na nodra masu na yalododonu sa vinakata ko koya.
9Sa ka vakasisila vei Jiova na nona i valavala na tamata ca,
ia sa lomani koya sa muria na ka dodonu.
10Ai vakavuvuli sa ka ca vua sa biuta na sala,
ia ko koya sa cata ni vunauci ena mate.
11Ko Etesi kei na rusa sa tu ga e na mata i Jiova,
ena vakalevu cake sara na lomadra na luve ni tamata!
12Na dauveivakalialiai sa sega ni vinakata ni vunauci;
ena sega talega ni via lako ko koya vei ira na vuku.
13Ni sa marau na loma ni tamata, sa vinaka kina na matana,
ia ni sa rarawa na lomana, sa ramusu kina na yalona.
14Na lomana na yalomatua sa gu tiko me vuku,
ia na gusudra na lialia sa kania na ka lialia.
15Sa ka ca na nodra siga kecega era rarawa tiko,
ia ko koya sa reki na lomana, sa kana magiti tikoga.
16Sa vinaka na taukeni ni ka lailai ka tu vata kei na rerevaki Jiova,
ka ca na taukeni ni i yau levu ka tu vata kei na rarawa.
17Sa vinaka me da kana rourou ka veilomani ga,
ka ca me da kana bulumakau uro ka veicati tiko.
18A tamata daucudru sa dauvakatubura na veileti,
ia ko koya sa berabera ni cudru sa tarova na veileti.
19A nona sala na vucesa sa vaka na bai soni,
ia na nodra sala na yalododonu sa caramaki tu.
20A gone vuku sa marau kina ko tamana,
ia na tamata lialia sa beci tinana.
21Sa ka ni marau na lialia vei koya sa sega ni vakayalo,
ia na tamata lomavuku sa vakadodonutaka na nona i lakolako.
22Ni sa sega na bose, sa sega ni yaco na ka e nanumi,
ia ni ra sa lewe vuqa na daubose, sa vakataudeitaki.
23Sa na marau na tamata e na vuku ni vosa ni gusuna,
ia na kena vinaka na vosa e na gauna e yaga kina!
24A nona sala ni bula na vuku sa koto ki cake,
me lako tani kina ko koya mai Eli sa koto ki ra.
25Ena vakarusa ga ko Jiova na nona vale na viavialevu,
ia ena vakataudeitaka nai yalayala ni nona vanua na yada.
26A ka vakasisila vei Jiova na ka era nanuma ko ira nai valavala ca,
ia sa vosa kamikamica na nodra vosa na yalosavasava.
27E dauvakararawataka na nona vale ko koya na daukocokoco,
ia ko koya sa cata nai solisoli ni veivaqumi ena bula.
28A lomana na yalododonu sa daunanuma na ka me kaya,
ia mai na gusudra na tamata ca sa tovure tu na ka ca.
29Sa yawa tiko ko Jiova vei ira nai valavala ca,
ia na nodra masu na yalododonu ena rogoca ko koya.
30A rarama ni mata sa marau kina na loma ni tamata,
ia nai tukutuku vinaka sa uro kina na suina.
31A daliga sa dauvakarogoca na vunau ni bula
sa na dautiko vata kei ira na vuku.
32O koya sa bese ni vunauci sa cata na yalona,
ia ko koya sa vakarorogo ki na vunau ena lomavuku mai.
33A rerevaki Jiova sai vakavuvuli vuku,
a sa muri na vakarokorokotaki ka liu na yalomalumalumu.
Who We AreWhat We EelieveWhat We Do
2025 by iamachristian.org,Inc All rights reserved.
