Aisea 8 - Ai Vola Tabu (Vakadewa Makawa Vakavoutaki 2021)（FRV21）

Dusidusi vei Ira na Tamata na Luvei Aisea

1A sa kaya vei au ko Jiova, “Mo taura mada e dua na papa ni volavola levu, ka vola vakamacala kina, ‘E na vuku i Measalali-asi-pasi.’

2Ia ka'u na kauta vata kei au e le rua na tamata dina me rau vakadinadinataka, ko Uraia na bete, kei Sakaraia na luve i Jeperekaia.”

3Ia ka'u a lako vua na parofita yalewa, ka sa kunekune ko koya, ka vakasucuma e dua na gonetagane. Sa qai kaya vei au ko Jiova, “Mo vakayacani koya ko Measalali-asi-pasi;

4ka ni na sa sega ni vuku na gone me kaci, ‘Tamaqu,’ kei ‘Tinaqu’, ena kau tani nai yau mai Tamasiko, kei nai toki-ni-valu mai Samaria kivei tui Asiria.”

Sa Lako Tiko mai na Tui Asiria

5Sa qai vosa tale vei au ko Jiova, ka kaya:

6“Ni ra sa beca na wai ni Sailoa sa drodro malua ko ira na tamata oqo, ka ra marautaki Risina kei koya na luve i Rimalaia;

7raica, na Turaga ena vakauta cake mai vei ira na wai ni Uciwai, sa kaukauwa ka levu, io na tui Asiria, kei na nona kaukauwa vakaturaga kece. Ia na uciwai oqo ena tubu cake e na kena dreke-ni-wai kecega, ka vuabale e na batina kecega;

8ena dave yani ki Juta, ena luvuca voli ka yala ki domodra; ia ni sa vakatetaba ko koya, ena ubi kece sara kina na nomuni vanua, Imanueli.”

9Dou soqoni vata vakaivalu, na veimataqali, ka lomataqaya;

dou rogoca, na lewe ni veivanua vakayawa;

dou vauci kemudou, ka lomataqaya;

dou vauci kemudou, ia dou na vakabalei sobu ga.

10Dou bose vata mada, ia ena vukici ga;

dou tukuna na vosa, ia ena sega ga ni yaco,

ni sa tiko vata kei keimami na Kalou.

Sa Vakaroti Koya na Parofita ko Jiova

11Ni sa rawai au na kaukauwa i Jiova ka vosa vakaoqo vei au ko koya, ka vakasalataki au me'u kakua ni muria na nodra sala na tamata oqo, ka sa kaya,

121Pita 3.14,15“Dou kakua ni kaya sa dua na vere e na vuku ni ka kece era sa kaya kina na tamata oqo sa dua na vere; dou kakua talega ni rerevaka na ka era rerevaka, kakua talega ni kidroa kina.

13Ia ko Jiova-ni-lewevuqa, o koya ga mo dou doka; sai koya ga mo dou rerevaka, sai koya ga mo dou kidroa kina.

141Pita 2.8Ia sa na yaco ko koya me vale tabu; ka na yaco talega me vatu era na tarabe kina, kei na vatu era na bale kina na vale ruarua i Isireli—mei cori kei na ka ni tudai kivei ira na kai Jerusalemi.

15Ia ena tarabe kina na lewe vuqa. Era na bale ka ramusu; era na coriti ka tauri.”

Vakaroti me ra Kakua ni Vakatarogi na Mate

16Mo viviga nai vola ni tukutuku, dregata na vunau me nodra na noqu tisaipeli.

17Ipe 2.13Ia ka'u na waraki Jiova, ko koya sa tabonaka na matana mai na vale i Jekope, ka'u na waraki koya tiko.

18Ipe 2.13Raica, koi au kei ira na gone sa solia mai vei au ko Jiova, keitou sa solia mei vakatakilakila kei na ka e veivakurabuitaki vei ira na Isireli mai vei Jiova-ni-lewevuqa, ko koya sa tiko mai na Ulunivanua ko Saioni.

19Ia kevaka era na kaya vei kemudou, “Dou la'ki tarogi ira sa curumi kei ira na daurairai era sa tagi ka kudru; me ra kakua li ni ra tarogi ira na nodra kalou ko ira na tamata? Me ra lako li vei ira na mate e na vukudra na bula?

20Qara mada e nai vunau kei nai tukutuku ni Kalou! Ni kevaka era sa sega ni vosa me vaka na vosa oqo, sa ka ga ni sa sega dina vei ira na rarama.”

E Dua na Gauna Dredre

21A ra na lako voli yani, ka vakararawataki ka viakana. Ia ena yaco, ni ra sa viakana, era na nuinuica tiko, ka vosacataki rau na nodra tui kei na nodra Kalou, ka ra na rai ki cake.

22A ra na rai talega ki vuravura, ka kunea ga na ka rarawa kei na butobuto, na vakaturubuto ni yaluma; ka ra na vakasavi tani ki na butobuto loaloa.