2 Veigauna 19 - Ai Vola Tabu (Vakadewa Makawa Vakavoutaki 2021)（FRV21）

Sa Vunauci Josefati ko Jeu

1A sa lesu tale e na vakacegu ko Josefati na tui Juta ki na nona vale mai Jerusalemi.

2A sa curu yani ko Jeu na luve i Anani na daurai, me la'ki tavaki koya, a sa kaya vei Josefati na tui, “E dodonu li mo ni vukea nai valavala ca, ka lomani ira era sa cati Jiova? E na vuku ni ka oqo sa tiko vei kemuni na cudru mai na mata i Jiova.

3Ia sa kune talega vei kemuni na ka vinaka eso, ni kemuni sa kauti ira tani na kalou yalewa ni veikau mai na vanua, ka ni kemuni sa vakarautaka na lomamuni mo ni vakasaqara na Kalou.”

Na Veiveisau e Cakava ko Josefati

4Sa tiko mai Jerusalemi ko Josefati. Ka sa lako tale ko koya e na kedra maliwa na tamata, mai Peri-sepa, ka yaco ki na vanua veiulunivanua ko Ifereimi, ka vakalesui ira tale vei Jiova na Kalou ni nodra qase.

5A sa lesia na turaganilewa eso e na vanua e na veikoro vakabai kecega e Juta, e na koro yadua.

6A sa kaya ko koya vei ira na turaganilewa, “Dou qarauni kemudou e na vuku ni ka dou cakava; ni dou sa sega ni lewa e na vuku ni tamata, e na vuku i Jiova ga, o koya sa tiko vata kei kemudou e na veilewai.

7E na vuku ni ka oqo me tiko kina vei kemudou na rerevaki Jiova; dou nanuma ka kitaka, ni sa sega e dua nai valavala ca vei Jiova na noda Kalou, ka sega ni doka vakailoa na tamata, ka sega ni taura nai solisoli ni veivaqumi ko koya.”

8A sa lesia talega ko Josefati mai Jerusalemi eso vei ira na Livai, vei ira talega na bete, vei ira talega na nodra qase turaga na Isireli, me ra ia na lewa i Jiova, kei na ka sa veiletitaki, ni ra a lesu tale mai ki Jerusalemi.

9A sa vakadreta vei ira, ka kaya, “Dou kitaka vakakina e na rerevaki Jiova, e na loma dina, e na loma dodonu talega;

10ia na ka kecega sa veiletitaki, ka sa kau mai vei kemudou mai vei ira na wekamudou era tiko e na nodra veikoro, e na vuku ni veivakamatei, e na vunau kei nai vakaro, e nai lesilesi kei na lewa, mo dou vunauci ira me ra kakua ni cala vei Jiova, de sa yacovi kemudou na cudru, vei ira talega na wekamudou. Dou cakava oqo, ka dou na qai sega ni cala.

11Ka raica, sa lewai kemudou e na ka sa qaravi kina ko Jiova ko Amaraia na bete levu; ia ko Sepataia na luve i Isimeli, o koya sa lewa na yavusa i Juta, sa na lewa e na ka kecega sa baleta na tui; ena veivuke ko ira talega na Livai e matamudou. Mo dou ia vakadoudou, ka na tiko vata ko Jiova kei koya sa vinaka.”