Vunau ni Soro 16 - Ai Vola Tabu (Vakadewa Makawa Vakavoutaki 2021)（FRV21）

Na Siga ni Veibuluti

1A sa vosa vei Mosese ko Jiova, ni rau sa mate na luve i Eroni, ni rau a toro ki na mata i Jiova, ka mate kina.

2Ipe 6.19A sa qai kaya vei Mosese ko Jiova, “Mo vosa vei Eroni na tuakamu, me kakua ni curu e na veisiga kecega ki na tikina tabu, ki loma ni lati e na mata ni cabocabo-ni-bulubulu, sa tu e dela ni kato, me kakua ni mate kina ko koya. Ni'u na rairai mai e na o e na dela ni cabocabo-ni-bulubulu.

3Ipe 9.7Me vakaoqo na nona curu ko Eroni ki na tikina tabu: me kauta ko koya e dua na bulumakau sa gone mei soro ni valavala ca, ka dua na sipi tagane mei soro kama.

4Me curumaka ko koya nai curucuru balavu lineni sa tabu, ka daramaka na yagona e na tarausese lineni lekaleka, ka vau na tolona e nai vau lineni, ka vakaisala e nai sala lineni; oqo nai sulu tabu. Me sili mada ko koya e na wai, ka qai vakaisulu kina.

5Me qai taura mai vei ira nai soqosoqo na Isireli e rua na me mei soro ni valavala ca, ka dua na sipi tagane mei soro kama.

6“Me qai vakacabora ko Eroni na bulumakau mei soro ni valavala ca, e na vukuna ga, ka sorovaki koya, kei na nona lewe-ni-vuvale.

7Me qai kauta ko koya na me ruarua, ka vakatura e na mata i Jiova, ki na katuba ni vale ni veitavaki.

8Me qai vakawiri madigi ko Eroni e na vukudrau na me, e dua me nei Jiova, ka dua me nona ko Asasela.

9Me qai kauta ko Eroni na me ka qarava na madigi me nei Jiova, ka cabora mei soro ni valavala ca.

10Ia na me ka qarava na madigi me nona ko Asasela, me qai vakaturi bula e na mata i Jiova, me sorovaki ko koya, me qai vakatalai tani ki na vanua lala me nona ko Asasela.

11“Me qai kauta ko Eroni na bulumakau sa nodra i soro ni valavala ca, ko koya kei na nona lewe-ni-vuvale, ka vakamatea na bulumakau sai soro ni valavala ca e na vukuna.

12Me qai kauta ko koya na miqa sa sinai e na qilaiso ni bukawaqa, mai nai cabocabo-ni-soro sa tu e na mata i Jiova, ka yakuta vakarua na kau boi vinaka me vakamai sa qaqi vakamatailalai, ka kauta ki loma ni lati,

13ka me qai biuta na ka boi vinaka me vakamai ki na bukawaqa e na mata i Jiova, me ruguta nai cabocabo-ni-bulubulu sa tu e na dela ni kato ni vunau na o ni ka boi vinaka, me kakua ni mate kina ko koya.

14Me qai kauta na dra ni bulumakau ko koya, ka kureitaka e na nona i qaqalo ki dela ni cabocabo-ni-bulubulu vaka ki na tokalau; ka kureitaka vakavitu na dra e na mata ni cabocabo-ni-bulubulu e na nona i qaqalo.

15 Ipe 9.12 “Me qai vakamatea ko koya na me sai soro ni nodra i valavala ca, na tamata, ka kauta na kena dra ki loma ni lati, ka kitaka e na dra ko ya me vaka ka kitaka e na dra ni bulumakau, ka kureitaka ki dela ni cabocabo-ni-bulubulu, kei na mata ni cabocabo-ni-bulubulu.

16Ka sorovaka na tikina tabu, e na vuku ni nodra sega ni savasava na Isireli kei na nodra caka cala, io na nodra i valavala ca kecega. Ia me caka vakakina e na vuku ni vale ni veitavaki, sa tiko e na kedra maliwa, io e na maliwa ni nodra sega ni savasava.

17Ia me kakua na tamata me tiko e na vale ni veitavaki, ni sa curu ko koya ki na tikina tabu me vakacabora nai soro, ka me curu tale mada mai, ni sa sorovaki koya oti, kei na nona lewe-ni-vuvale, kei nai soqosoqo taucoko ni Isireli.

18Ia me curu yani ko koya nai cabocabo-ni-soro sa tu e na mata i Jiova, ka sorovaka; ka kauta e dua na dra ni bulumakau, kei na dra ni me, ka boroya kina na tutuna sa balavu cake e nai cabocabo-ni-soro.

19Me qai kureitaka vakavitu na dra ki delana e na nona i qaqalo, ka me vakasavasavataka, ka vakatabuya mai na nodra sega ni savasava na Isireli.

Na Manumanu me Colata nai Valavala Ca

20“Ia ni sa oti na nona sorovaka na tikina tabu, kei na vale ni veitavaki, kei nai cabocabo-ni-soro, me qai kauta mai na me sa bula.

21Me qai tabaka na ulu ni me bula ko Eroni e na ligana ruarua, ka vakatusa kina na nodra caka ca kecega na Isireli, kei na nodra caka cala kecega, io na nodra i valavala ca kecega, ka tauca ki na ulu ni me, ka vakatala tani ki na vanua lala, ni sa tubera yani e dua na tamata sa lesi kina.

22Ia na me ena colata na nodra cala kecega ki na vanua sa sega ni tawani; me qai sereka na me e na vanua lala ko koya.

23 Isi 44.19 “Me qai curu ki na vale ni veitavaki ko Eroni, ka luvata tani nai sulu lineni ka sulu kina ko koya ni sa curu ki na tikina tabu, ka laiva tu mai kea.

24Me qai sili ko koya e na wai e na dua na tikina tabu, ka sulumaka na nona i sulu, ka curu mai, ka vakacabora na nona i soro kama, kei na nodra i soro kama na tamata, ka sorovaki koya, kei ira na tamata.

25Ia me vakama ko koya na uro ni soro ni valavala ca e na dela ni cabocabo-ni-soro.

26Ia ko koya ka sereka na me sa nona ko Asasela, me sava na nona i sulu, ka sili ko koya e na wai, a sa oti, me qai curu mai ki nai tikotiko.

27Ipe 13.11Ia na bulumakau sai soro ni valavala ca, kei na me sai soro ni valavala ca, sa kau na kedrau dra ki na tikina tabu mei soro, me kau tani ki nai bili ni tikotiko; ia me vakamai e na bukawaqa na kulidrau, kei na lewedrau, kei na dedrau.

28Ia ko koya sa vakamai rau, me sava na nona i sulu ka sili ko koya e na wai, a sa oti, me qai lako mai ki nai tikotiko.

Na Vakarokorokotaki ni Siga ni Veibuluti se Veisorovaki

29 Vsoro 23.26-32; Tiko 29.7-11 “Ia oqo me kenai lesilesi ka tawa mudu vei kemudou: mo dou vakamalumalumutaki kemudou e na kenai kavitu ni vula, e na kenai katini ni siga ni vula, ia mo dou kakua ni cakava kina e dua na cakacaka, e dua na kai nomudou, se na kai tani sa tiko vulagi kei kemudou.

30Ni dou na sorovaki e na siga ko ya, mo dou vakasavasavataki. Dou na savasava kina mai na nomudou i valavala ca kecega e na mata i Jiova.

31Ena Siga ni Vakacecegu mo dou vakacegu kina, ia mo dou vakamalumalumutaki kemudou, oqo sai lesilesi vei kemudou ka tawa mudu.

32Ia na bete sa na lumuti, ka buli me bete mei sosomi kei tamana, ena vakacabora nai soro, ka sulumaka nai sulu lineni, io nai sulu tabu.

33Ia me sorovaka ko koya na vale tabu, ka sorovaka na vale ni veitavaki, kei nai cabocabo-ni-soro. Me sorovaki ira talega na bete ko koya, kei ira kecega nai soqosoqo.

34Ia oqo sai lesilesi vei kemudou ka tawa mudu, ka me sorovaki ira na Isireli vakadua e na veiyabaki e na vuku ni nodra i valavala ca kecega.” A sa cakava ko koya me vaka ka vakarota vei Mosese ko Jiova.