Same 139 - Ai Vola Tabu (Vakadewa Makawa Vakavoutaki 2021)（FRV21）

Na Vuku kei na Veikauwaitaki ni Kalou Vua nai liuliu ni sere. A nei Tevita. A Same.

1I Jiova, ko ni sa dikevi au, ka kilai au.

2O ni sa kila na noqu tiko sobu kei na noqu tucake;

o ni sa kila na nanuma ni lomaqu ni sa yawa tiko.

3O ni sa vakatovolea na noqu i lakolako kei na noqu i kotokoto,

a sa kila deivaki na noqu i valavala kecega.

4Ni sa sega e dua na vosa e na gusuqu,

sa sega ni kilai deivaki kece sara ga vei kemuni Jiova.

5O ni sa vakalati au ki muri, ki liu talega,

ka sa tabaki au e na ligamuni.

6A vuku vakakoya sa dredre sara vei au ni sa veivakurabuitaki;

sa cecere, au sa sega ni rawata.

7Me'u lako tani kivei me'u yali kina mai na yalomuni?

Se me'u dro kivei me'u kakua ni tiko e matamuni?

8Kevaka ka'u cabe ki lomalagi, ko ni sa tiko mai kina;

kevaka ka'u vakarautaka na noqu i mocemoce mai bulu, raica, ko ni sa tiko mai kina.

9Kevaka ka'u sa taura na taba ni mataka,

ka la'ki tiko mai na sauka ni wasawasa,

10ena tuberi au ga mai kea na ligamuni,

ka tauri au na ligamuni matau.

11Kevaka ka'u sa kaya, “Io, me tabonaki au mada ga na butobuto,

kei na rarama sa tu e mataqu me vuki me bogi”,

12ia sa sega ni buto vei kemuni na butobuto;

na bogi sa rarama ga me vaka na siga,

ni sa tautauvata ga vei kemuni na butobuto kei na rarama.

13Ni kemuni a bulia na noqu ivi;

ko ni a ubi au e na kete i tinaqu.

14Au na vakavinavinaka vei kemuni, ni sa ka rerevaki ka vakurabui na noqu i bulibuli.

A ka veivakurabuitaki na nomuni cakacaka;

a ka oqo sa kila vakavinaka na yaloqu.

15Sa sega ni vuni vei kemuni na suiqu,

e na gauna ka'u a caka vakavuni kina,

ka vakamataitaki e ruku i vuravura.

16Ni'u sa vaka na vulovulo wale sa kunei au na matamuni.

Ia sa volai kece sara na tikiqu e na nomuni vola,

me caka tiko e na veisiga,

ni sa sega ni caka oti e dua.

17Sa ka talei vei au na nanuma ni lomamuni na Kalou!

A ka levu na kenai wiliwili!

18Kevaka au na wilika, ena ka levu sara ka lailai na mata ni nuku;

ni ka'u sa yadra, edaru sa tiko vata ga.

19Kemuni na Kalou, e dina ko ni na vakamatei ira nai valavala ca!

O koya dou lako tani kina vei au, na tamata liga ca!

20Ni ra sa vosavakacacataki kemuni;

ka ra sa cavuta walega na yacamuni ko ira na nomuni meca.

21Au sa sega beka ni cati ira era sa cati kemuni, i Jiova?

Au sa sega li ni vakasisilataki ira era sa tu me veimecaki kei kemuni?

22Au sa cati ira vakaidina sara;

era sa noqu meca.

23Mo ni dikevi au, na Kalou, ka kila na yaloqu!

Mo ni vakatovolei au ka kila na nanuma ni lomaqu.

24Ka raica se sa dua nai tovo ca vei au,

ka tuberi au e na sala ni bula tawa mudu.