Sefanaia 2 - Ai Vola Tabu (Vakadewa Makawa Vakavoutaki 2021)（FRV21）

Sa Vakaroti na Veivutuni

1Dou soqoni kemudou vata, io, dou soqoni vata,

na matanitu sa sega ni domoni,

2ni se bera ni yaco dina na ka sa lesi,

ni se bera ni oti yani na siga me vaka na qa ni sila;

ka ni se bera ni yacovi kemudou na cudru waqawaqa i Jiova,

ni se bera ni yacovi kemudou na siga ni cudru i Jiova.

3Dou vakasaqarai Jiova, oi kemudou kece sa yalomalumalumu e na vanua,

oi kemudou sa cakava na nona lewa;

dou qara mada na yalododonu, vakasaqara na yalomalumalumu;

dou na vuni beka kina e na siga ni cudru i Jiova.

Na Vakarusai ni Veivanua e Vakavolivoliti Isireli

4 Aisea 14.29-31; Jere 47.1-7; Isi 25.15-17; Joeli 3.4-8; Emo 1.6-8; Saka 9.5-7 Ia ko Qasa ena biu laivi,

ko Asikiloni talega ena rusa;

ko Asitoti, era na vakasava tani e na siga levu,

ena cavuivuvu talega ko Ekironi.

5E ca vei ira sa tiko mai baravi,

na matanitu vaka-Kireci!

A vosa i Jiova sa tau vei kemudou,

I Kenani, na vanua ni kai Filisitia;

ka'u na vakarusai iko, me kakua e dua me tiko kina.

6Ia na baravi ena yaco me nodra i tikotiko

kei na nodra vale ni tiko nai vakatawa,

kei na kedra bai na qele ni sipi.

7Ia na baravi ena yaco me nodra vanua

na vo-ni-bula ni vale i Juta,

ka ra na vakania kina na sipi;

era na koto sobu e na yakavi

e na veivale mai Asikiloni.

Ni na talevi ira ko Jiova na nodra Kalou,

ka vakalesui ira tale mai na nodra veivakabobulataki.

8 Aisea 15.1—16.14; 25.10-12; Jere 48.1—49.6; Isi 21.28-32; 25.1-11; Emo 1.13-15 “Au a rogoca na nodra veivakalialiai ko ira na Moapi

kei na nodra vosa vakacaca na Amoni,

era vakalialiai ira kina na noqu tamata

ka vakalevulevui ira ki na nodra i yalayala.

9 Vteki 19.24 O koya oqo, me vaka ni'u sa bula,” sa kaya ko Jiova-ni-lewevuqa,

na nodra Kalou na Isireli,

“Ena yaco dina kina ko Moapi me tautauvata kei Sotoma,

ka na yaco ko ira na Amoni me ra tautauvata kei Komora,

me vanua ni kau votovotoa, kei nai keli masima,

io, me vanua lala tu ga, ka tawa mudu.

A kena vo ni noqu tamata ena vakacacani ira,

io, na kena vo ni noqu matanitu ena taukeni ira.”

10Na ka oqo ena kedra e na vuku ni nodra viavialevu,

e na vuku ni nodra ia na veivakalialiai

kei na nodra vakalevulevui ira vei ira na tamata i Jiova-ni-lewevuqa.

11Sa na daurerevaki vei ira ko Jiova;

ni na vakawaletaki ira kecega na kalou kei vuravura,

ka ra na dui cuva vua ko ira na tamata yadua mai na nona yasana, io,

na lewe ni veiyanuyanu kecega e na veimatanitu.

12 Aisea 18.1-7 Oi kemudou talega na kai Eciopea,

dou na vakamatei e na noqu i seleiwau.

13 Aisea 10.5-34; 14.24-27; Neumi 1.1—3.19 Ena dodoka talega na ligana me tauca na mata ni vualiku,

ka vakarusai Asiria;

ena vakayacori Ninive talega me vanua lala,

me mamaca me vaka na vanua dravuisiga.

14Ia na qele ni manumanu ena koto kina,

io na manumanu kecega ni veivanua;

ia na pelikani kei na belo

ena mai ro ki na domodomo ni kena duru;

e dua na domo ena tagi mai na katuba;

ena rusa nai lago ni katuba;

io, nai botani sitari sa vakarairaitaka mai ko koya.

15Sai koya oqo na koro daumarau ka dautiko wele,

ka kaya e lomana, “Sai au ga, ka sega tale e dua.”

Sa vakaevei oqo na kena yaco me koro lala,

mei davodavo ni manumanu kila!

Ko ira kece era lako volekata era na vakasiusiu

ka ra na kurea na ligadra.