Iperiu 9 - Ai Vola Tabu (Vakadewa Makawa Vakavoutaki 2021)（FRV21）

Na Sokalou Vakavuravura kei na Sokalou Vakalomalagi

1Sa dina ga sa tu kei na veiyalayalati ka taumada eso nai vakaro ni lotu, kei na vale-ni-soro vakavuravura.

2Lako 26.1-30; 25.31-40; 25.23-30Ni sa caka ga na vale tabu; o koya sa taumada, sa tu kina nai tutu-ni-cina, kei na tepeli, kei na madrai dauraici; a yacana oqo na tikina tabu.

3Lako 26.31-33Ia sa sivi nai karua ni lati, sa qai tu na vale tabu sa vakatokai na loqi tabu sara;

4Lako 30.1-6; 25.10-16; 16.33; Tiko 17.8-10; Lako 25.16; Vrua 10.3-5sa tu kina na miqa koula, kei na kato ni veiyalayalati sa botani na yasana kece e na koula, sa tu kina na bilo koula sa tawa e na mana, kei nai titoko talega i Eroni o koya sa kubu, kei na vatu raraba ni veiyalayalati;

5Lako 25.18-22sa tu ga e cake koi rau na jerupi vakaiukuuku sa vakaruruga nai cabocabo-ni-bulubulu; ia ka sa dredre edaidai me tukuni yadua na veika oqo.

6 Tiko 18.2-6 Ia ni sa vakarautaki oti na veika oqo, sa curu ko ira na bete e na veisiga ki nai matai ni vale tabu, ka ia kina na lotu;

7Vsoro 16.2-34ia sa curu ki na kenai karua na bete levu duaduaga ka vakadua ga e na veiyabaki, ka kauta na dra, a sa vakacabora e na vukuna, e na vuku talega ni nodra vakacalaka na tamata.

8A sa vakatakila na Yalo Tabu na ka oqo, ni sa sega ni vakarairaitaki mai na sala ki na loqi tabu sara, e na gauna sa tu ga kina na vale tabu ka taumada.

9Oqo nai dusidusi walega ni ka e na gauna oqo, ni sa vakacabori kina nai madrali kei nai soro ka sa sega ni vakataucokotaka rawa na nona lewa-e-loma ko koya sa mai lotu,

10ia sa baleta ga na kakana kei na ka-ni-gunu kei na veivakasavasavataki eso, kei na veivakaro ni yago sa lesi me yaco mada na gauna ni veivakadodonutaki.

Ko Karisito na Noda Bete Levu

11Ia sa lako mai na Karisito, a sa bete levu e na ka vinaka ena muri mai, e na vale tabu levu ka uasivi cake na kena vinaka, e sega ni tara e na liga, ni sa sega ni caka vakakina;

12e sega talega e na dra ni me kei na luve ni bulumakau, e na nona dra ga sa curu vakadua ki na loqi tabu sara, ni sa rawata me solia na bula tawa mudu.

13Vsoro 16.15-16; Tiko 19.9,17-19Ia kevaka sa yaga na dra ni bulumakau kei na me, kei na dravusa ni bulumakau yalewa ni sa kureitaki vei ira sa dukadukali, me savasava kina na yagodra,

14ena vakaevei na kena cecere cake na dra nei Karisito, o koya ka vakacabori koya vua na Kalou e na vuku ni Yalo Tabu tawa mudu ka sa sega vua na ca, ena sega beka ni rawarawa sara me vui laivi kina na nomudou lewa-e-loma mai na cakacaka sa ka ni mate, mo dou qarava na Kalou bula?

15O koya oqo sa yaco kina ko koya me dautataro e na veiyalayalati vou, me ra rawata kina ko ira ka kacivi nai votavota tawa mudu ka yalataki, e na vuku ni nona mate, sai soro ni valavala ca ka caka oti e na gauna ni veiyalayalati taumada.

16Ia kevaka sa dua na veiyalayalati, sa yaga me mate o koya sa ia kina na veiyalayalati.

17Ni sa mate, sa qai vakataudeitaki kina na veiyalayalati, ia ka sa sega ni yaga vakalailai ni sa bula tiko ko koya sa ia na veiyalayalati.

18O koya oqo sa sega kina ni vakatabui wale na veiyalayalati sa taumada, sa caka ga e na dra.

19Lako 24.6-8Io, ni sa cavuta oti ko Mosese nai vakavuvuli kecega ni vunau vei ira kecega na tamata, sa qai kauta ko koya na kedra dra na luve ni bulumakau kei na me, kei na wai, kei na vuti ni sipi sa vakadamudamutaki, kei na isopi, ka kureitaka ki nai vola, kivei ira kece talega na tamata,

20ka kaya, “Oqo na dra ni veiyalayalati sa kitaka vei kemudou na Kalou.”

21Vsoro 8.15Sa kureitaka vaka talega kina na dra ki na vale tabu, kei na bilo kecega ni lotu.

22Vsoro 17.11Ia ka vica na ka sa sega ni vakasavasavataki e na dra me vaka na vunau; ia kevaka sa sega ni vakadavei na dra, sa sega ni vosoti nai valavala ca.

Sa Kauta Tani nai Valavala Ca nai Soro i Karisito

23Ia sa dodonu kina me vakasavasavataki nai vakatakarakara ni veika mai lomalagi e na veika oqo; ia na veika dina sa vakalomalagi sa vakasavasavataki e nai soro e uasivi cake vei ira.

24Ni sa sega ni curu na Karisito ki na loqi tabu sa caka e na liga, oqori sai vakatakarakara ga ni ka dina; sa curu ki na lomalagi dina ga, me rairai edaidai e na mata ni Kalou e na vukuda;

25sa sega talega ni vakacabori koya vakavuqa, me vaka sa curu na bete levu ki na loqi tabu e na veiyabaki, ka kauta na dra ni ka tani;

26ia ke sa vakakina ke sa dodonu me mate vakavuqa mai nai vakatekivu kei vuravura. Ia me vaka na ka sa vakayacori, a sa vakarairaitaki vakadua ga ko koya e nai vakataotioti ni veigauna sa loku me kauta tani nai valavala ca ni sa vakacabori koya.

27Ia me vaka sa lesi me mate vakadua ko ira na tamata, ka me qai muri na siga ni lewa,

28Aisea 53.12sa vakacabori vakadua vaka talega kina na Karisito me cudruvi e na vuku ni valavala ca ni lewe vuqa, ka na rairai tale mai e nai karua ni gauna ko koya, ka segai e na vuku ni valavala ca, ia me vakabulai ira ga era sa waraki koya.