Same 60 - Ai Vola Tabu (Vakadewa Makawa Vakavoutaki 2021)（FRV21）

A Masu ni Qaqa ni Oti na Druka Vua nai liuliu; me vaka Na Viavia ni Veiyalayalati. A Mikitami i Tevita, me i vakavuvuli; ni sa kabai o Arami Naraimi (Mesopotemia) kei Arami Soba (Siriasopa), ni sa lesu mai o Joape ka vakamatei ira na kai Itomi era lewe tinikarua na udolu ena Buca ni Masima.

1Oi kemuni na Kalou, ko ni sa biuti keimami, o ni sa dui vakasevi keimami;

ko ni a cudru; mo ni lesu tale mai vei keimami!

2O ni sa cakava me sautaninini na vuravura; ko ni sa basuka me tadola;

mo ni vakavinakataka na veitikina sa ca, ni sa veitosoyaki.

3O ni sa vakayacora na ka rarawa vei ira na nomuni tamata;

ko ni sa vagunuvi keimami e na waini keimami yatayata kina.

4O ni sa solia na kuila vei ira era sa rerevaki kemuni,

me cecebuya e na vuku ni nomuni yalodina. Sela

5Me vakabulai kina ko koya ko ni sa lomana;

mo ni vakabulai au e na ligamuni matau, ka rogoci au.

6Sa vosa oti na Kalou e nona yalosavasava:

“E na yalo ni reki ka'u na wasewasei Sikemi,

ka veivotayaka na buca mai Sukoci.

7Sa noqu ko Kiliati, ka sa noqu ko Manasa;

sai vakaruru ni uluqu ko Ifereimi;

ka noqu tamata daulewa ko Juta.

8Na noqu i vuivui ko Moapi;

kei Itomi, ka'u na viritaka vua na noqu i vava;

kivei Filisitia, ka'u na kaila e na qaqa.”

9O cei ena kauti au ki na koro kaukauwa?

O cei ena tuberi au cake ki Itomi?

10Oi kemuni na Kalou, se segai, oi kemuni ka sa biuti keimami?

Ia koi kemuni na Kalou, ko ni sa sega ni lako vata kei ira na neimami valu?

11Mo ni vukei keimami mai me oti na ka rarawa,

ni sa ka walega na nodra veivuke na tamata.

12E na vuku ni Kalou eda na gugumatua;

ni sai koya ga ena buturaka sobu na noda meca.