Vosa Vakaibalebale 17 - Ai Vola Tabu (Vakadewa Makawa Vakavoutaki 2021)（FRV21）

1Sa vinaka e dua na tiki ni madrai wale kei na vakacegu,

ka ca ni oso na vale e na solevu ka tiko vata kina na veileti.

2A dauveiqaravi vuku ena turaga vua na gone vakaturaga sa ia na veivakamaduataki,

ka na votai vata talega kei ira na veitacini.

3A kuro sa yaga me vakatovolei kina na siliva, kei na lovo me vakatovolei kina na koula,

ia sa vakatovolea na yalo ko Jiova.

4A tamata ca sa vakarorogo ki na tebenigusu lasu;

ka sa vakatu daligana na daulasu ki na yame ca.

5O koya sa vakalialia na dravudravua sa beitaki Koya ka Buli koya;

ko koya talega sa rekitaka na ca ena sega ga ni donu.

6Sa nodra i sala vakaturaga na qase na makubudra,

ka sa nodra i ukuuku na gone na tamadra.

7Sa sega ni kilikili kaya na lialia na vosa vakaturaga;

ka sega sara ni kilikili kaya na turaga na tebenigusu daulasu.

8Na veivaqumi sa vaka na vatu caka mana e mata i koya sa solia;

a yasana kece e gole kina, sa vakayaco-ka kina.

9O koya sa vosota na caka cala sa segata na loloma,

ia ko koya sa dautokona na veileti sa tawasei ira era veiwekani dina.

10Sa coba vakalevu na vunau vua na yalomatua,

ka vakalailai ni tau vakadrau na kuita vua na lialia.

11Sa gumatua tiko na tamata ca me talaidredre,

o koya ena talai kina vua nai talaki lomakaukauwa.

12E vinaka vua na tamata ni rau sota kaya na bea sa kovei na luvena,

ka ca vua ni rau sota kaya na lialia ni sa lialia mai.

13O koya sa sauma na vinaka e na ca,

ena sega ni yali mai na nona vale na ca.

14Sa vaka ni dola wai e dua nai vakatekivu ni veileti,

ia ni se bera ni tubu cake na veileti, mo tarova rawa.

15Ko koya sa vakadonuya na tamata ca, kei koya sa vakacalai koya na caka dodonu,

erau sa vakasisila ruarua vei Jiova.

16A cava na betena na kenai voli vua na lialia

me voli vuku kina, ni sa sega ni lomana kina?

17Sa loloma tiko e na veigauna kece nai tokani vinaka,

ka sa sucu na tacina me dau wasea vata na gauna ni rarawa.

18A tamata sa sega ni vakayalo sa veitauri liga,

ka veiyalayalatitaki koya mei sosomi ni kai nona.

19O koya sa vinakata na veileti sa vinakata na caka cala;

ko koya sa vakaceceretaka na nona katuba sa qara na mate.

20Ko koya sa lomatakelo ena sega ni kune ka vinaka,

ko koya talega sa yame vakatani ena lutu ki na ca.

21O koya sa sucu na luvena ka tamata lialia ena dau kune rarawa;

ka na sega na marau vua na tama i koya sa sesewa.

22A loma daumarau sa wainimate yaga,

ia na yalo sa mavoa sai vakamamaca ni sui.

23Na tamata ca sa ciqoma vakavuni nai solisoli ni veivaqumi,

me vakatanitaka kina na nodra lewa na mataveilewai.

24Sa tu ga vua na yalomatua na vuku,

ia na matana na lialia sa rai ki nai yalayala kei vuravura.

25Sa ka ni rarawa vei tamana na gone sesewa,

kei na ka gaga vua ka vakasucuma.

26Sa sega talega ni vinaka me cudruvi koya sa yalododonu,

se me yaviti ira na turaga mei sau ni ka dodonu.

27Ko koya sa kila vuku sa tarova na nona vosa;

kei koya sa dauyalovinaka sa tamata yalomatua.

28O koya li na tamata lialia ka sa tiko lo sa nanumi me tamata vuku;

ka ni sa qamuta na gusuna, sa nanumi ni tamata yaloqaseqase.