1 1Tui 12.16; 2Vei 10.16 A sa tiko mai kea e dua na tamata ca, na yacana ko Sipa, na luve i Pikiri, e na yavusa i Penijamini. A sa uvuca ko koya e dua na davui, ka kaya,
“Sa sega na noda tikina vei Tevita,
ka sega na noda i votavota vua na luve i Jese!
Oi kemudou na Isireli, ni lesu na tamata yadua ki na nona valelaca!”
2A sa lako tani kina ko ira kecega na Isireli mai vei Tevita, me ra muri Sipa na luve i Pikiri. Ia ko ira na Juta era sa kabita matua ga na nodra tui, mai na Joritani ka yacovi Jerusalemi.
3 2Samu 16.22 A sa lako ko Tevita ki na nona vale mai Jerusalemi. Ka sa kauta ko koya na tui na yalewa ka watina lalai eratou lewe tini, o iratou ka biuta tu mai ko koya me vakatawa na vale, ka kauti iratou ki na dua na vale me ratou yadravi kina, ka sa vakani iratou, ka sega tale ni curu vei iratou. A ratou sa sogolati ga ka yacova na siga eratou sa mate kina, ka ratou sa bula voli ga me vaka na yada.
4A sa kaya vei Amasa ko koya na tui, “Mo soqoni ira vata vei au na Juta e na bogi tolu, ia mo tiko talega e ke ko iko.”
5A sa lako ko Amasa me soqoni ira vata na Juta, ia sa berabera ko koya ka sa oti na siga ka lokuca vua ko koya.
6A sa kaya vei Apisai ko Tevita, “Ena levu cake na ka ca ena kitaka vei keda oqo ko Sipa na luve i Pikiri, ka lailai ka kitaka ko Apisalome. Mo kauti ira na tamata ni nomu turaga, ka cicimuri koya, de curuma eso na koro vakabai, ka sa dro tani kina vei keda.”
7A ra sa muri koya yani na tamata i Joape, kei ira na Kireci, kei ira na Pileci, kei ira na tamata qaqa kecega. A ra sa lako tani e Jerusalemi me cicimuri Sipa na luve i Pikiri.
8Ia ni ra sa voleka ki na vatu levu mai Kipioni, sa mai sota kei ira ko Amasa. Ia sa sulumaka ko Joape na nona i sulu ni valu, ka sa tu e nai vau ni tolona e dua nai seleiwau e na kena taga; ia ni sa lako yani ki liu ko koya, sa lutu mai na kena taga.
9A sa kaya vei Amasa ko Joape, “O sa bula vinaka li, na wekaqu?” Ka sa taura na kumi i Amasa ko Joape e na ligana i matau me reguci koya.
10Ia sa sega ni raica ko Amasa nai seleiwau e na liga i Joape, ka sa cokai koya kina e na ketena, ka sa kasabura na nona wawa ki na qele, ka sa mate. A sa sega tale ni qai cokai koya vakarua.
Erau sa qai cicimuri Sipa na luve i Pikiri ko Joape kei Apisai na tacina.
11A sa tu vakadua mai kea e dua na tamata i Joape, ka kaya, “O koya sa vinakati Joape, kei koya sa totaki Tevita, me muri Joape ko koya.”
12A sa davo no e na nona dra ko Amasa e na salatu. Ia ni sa raica na tamata ko ya ni ra sa tu vakadua na tamata kecega, sa qai kauti Amasa tani mai na salatu ki na were, a sa ubia e na dua nai sulu, ni sa raica ko koya era sa tu vakadua ko ira kece ka mai donui koya.
13Ni sa kau tani mai na salatu, era sa qai lako yani na tamata kecega me muri Joape, me cicimuri Sipa na luve i Pikiri.
14A sa lakovi ira yani ko koya na nodra yavusa kecega na Isireli, ka yaco ki Epeli, kei Peci-maka, kivei ira kece talega na Peri; a ra sa soqoni vata, ka la'ki muri koya.
15A ra sa lako ka buku na druadrua vei koya mai Epeli ni Peci-maka. A ra sa viria ki na koro e dua na suva, a sa tu e na kele; ia ko ira na tamata kecega era tiko vata kei Joape, era sa tukitukia na bai, me vakabalea.
16Sa qai kaci mai na koro e dua na yalewa vuku, “Dou rogoca! Dou rogoca! Dou kaya mada vei Joape, ‘Mo toro mada mai ki ke, me'u vosa vei iko.’ ”
17A sa toro vua ko koya, ka sa kaya na yalewa, “O iko li ko Joape, se segai?” A sa kaya ko koya, “Oi au ga.” A sa kaya vua ko koya, “Mo rogoca na vosa ni nomu vada.” A sa kaya ko koya, “Au sa vakarorogo tiko.”
18A sa vosa ko koya, ka kaya, “Era a dau kaya eliu, ‘Me ra ia ka dautaro vakasala ga mai Epeli’; ka ra kunea kina na kena i wali.
19Oi au e dua vei ira na Isireli sa cata nai valu, ka sa yalodina. Ko iko, ko sa segata mo vakarusa e dua na koro ka sa vaka e dua na marama tina vei ira na Isireli. A cava ko via tiloma kina nai votavota i Jiova?”
20A sa vosa ko Joape, ka kaya, “Me yawa sara, me yawa sara vei au, me'u tiloma se vakarusa!
21Sa sega ni vakaoqo! Ia sa dua ga na tamata mai na vanua veiulunivanua i Ifereimi, ko Sipa na yacana, na luve i Pikiri, sa dodoka na ligana vua na tui, io vei Tevita. Dou soli koya duaduaga mai, ka'u na qai lako tani mai na koro.” A sa kaya vei Joape na yalewa, “Raica, ena viritaki yani vei iko na uluna ki daku ni bai.”
22A sa qai lako na yalewa e na nona vuku vei ira kecega na tamata. A ra sa tamusuka na ulu i Sipa na luve i Pikiri, ka viritaka yani vei Joape. A sa uvuca na davui ko koya, ka ra sa lesu yani mai na koro, na tamata yadua ki na nona vale, ka sa lesu ki Jerusalemi ko Joape vei koya na tui.
Ko Ira na Vakailesilesi nei Tevita23A sa nodra turaga na tamata i valu kecega ni Isireli ko Joape; ka sa nodra turaga na Kireci kei ira na Pileci ko Penaia, na luve i Jioiata;
24ka sa turaga ni tamata cakacaka kaukauwa ko Etorami; ka sa dauvola na ka ni matanitu ko Josefati na luve i Eilute;
25ia sa vunivola ko Siva; ka rau sa bete ko Setoki kei Epaiaca;
26ia ka sa bete talega i Tevita ko Ira na luve i Jairi.
Who We AreWhat We EelieveWhat We Do
2025 by iamachristian.org,Inc All rights reserved.
