1A sa cavuta vei Jiova ko Tevita na vosa ni sere oqo, e na siga sa vakabulai koya oti kina ko Jiova mai na liga ni nona meca kecega, kei na liga i Saula.
2A sa kaya ko koya:
“A noqu uluvatu ko Jiova, kei na noqu i drodro, na noqu i vakabula,
3na Kalou, o koya sa noqu kaukauwa, au na vakararavi vua,
a noqu i sasabai, kei na ka kaukauwa ka'u sa vakabulai kina,
a noqu vale ni valu cecere kei na noqu i drodro;
a noqu i vakabula; ni sa vakabulai au mai nai valavala kaukauwa.
4Au na kaci vei Jiova, o koya sa dodonu me vakavinavinakataki,
ia ka'u na sa vakabulai kina mai vei ira na noqu meca.
5“Ni sa vakavolivoliti au na biau ni mate,
sa vakarerei au na waluvu ni ca;
6sa voliti au na rarawa kei Eli,
sa yacovi au nai cori ni mate.
7“E na noqu rarawa ka'u a tagi vei Jiova;
ka'u sa tagi ga vua na noqu Kalou.
A sa rogoca na domoqu ko koya mai na nona vale,
a sa curuma na daligana na noqu tagi.
8“Sa qai yavala na vanua, ka sautaninini;
sa yavala talega na vu ni lomalagi
ka sa uneune, ni sa cudru ko koya.
9Sa kuvu cake na kubou mai na ucuna,
kei na bukawaqa mai na gusuna sa kana voli;
sa tutuvaki kina na qilaiso ni buka.
10Sa vakalolovirataka na lomalagi ko koya, ka lako sobu mai;
a sa tu e ruku ni yavana na butobuto loaloa.
11Sa vodoka na jerupi ko koya, ka vuka;
sa rairai lako e na veitaba ni cagi.
12Sa cakava na butobuto me nona vale me voliti koya,
na wai butobuto, na o loaloa ni lomalagi.
13Sa caudre na qilaiso ni buka
e na liva sa lako e matana.
14Sa kurukuru mai na lomalagi ko Jiova,
a sa tabalaka cake na domona ko Koya sa Cecere Sara.
15A sa vanataka na gasau ko koya, ka ra veiseyaki kina
—na livaliva, ka vakacicivaki ira.
16A sa rairai na dreke ni wai ni wasaliwa,
sa vakavotui mai na yavu ni vuravura,
ni sa vunauca ko Jiova,
ni sa liwa na cagi ni ucuna.
17“Sa talaki mai cake ko koya, ka tauri au,
ka vueti au cake mai na wai e vuqa.
18Sa vakabulai au mai na noqu meca kaukauwa,
mai vei ira era sa cati au, ni ra sa gumatua vei au.
19Era sa lako vakaca mai vei au e na siga ni noqu rarawa,
ia sa tokoni au ko Jiova.
20Sa kauti au yani talega ki na vanua rabailevu;
sa vakabulai au, ni sa vinakati au.
21“Sa sauma vei au ko Jiova na noqu yalododonu;
me vaka na savasava ni ligaqu, sa sauma vei au.
22Ni'u a muria na sala i Jiova,
ka sega ni lesu tani vakaca mai vua na noqu Kalou.
23Ni sa tu e mataqu na nona lewa kecega,
ia na nona vunau, ka'u a sega ni lesu tani mai kina.
24Ia ka'u a yalododonu vua,
ia ka'u a maroroi au mai na noqu i valavala ca.
25A sa sauma kina vei au ko Jiova na noqu i valavala dodonu,
me vaka na noqu yalosavasava e matana.
26“Vei koya sa yalololoma, ko ni na cakacaka vakayalololoma;
vei koya sa yalododonu, ko ni na cakacaka vakayalododonu.
27Vei koya sa yalosavasava, ko ni na cakacaka vakayalosavasava,
ia vei koya sa yalotakelo, ko ni na veivala kaya.
28Ia ko ni na vakabulai ira na tamata sa vakararawataki,
ia sa vakaraici ira na viavialevu na matamuni, mo ni vakabalei ira.
29Ni sa noqu cina koi kemuni, i Jiova,
ia ena vakararamataka na noqu butobuto ko Jiova.
30Ni sai kemuni ka'u sa cici bula kina e na maliwa ni mataivalu,
ia sai koya na noqu Kalou ka'u sa ladeva kina na bai.
31Na Kalou oqo—sa ka taucoko na nona i valavala;
na vosa i Jiova sa vakadinati na kena dodonu;
sai sasabai ko koya vei ira kecega sa vakararavi vua.
32“Ko cei tale sa Kalou, ko Jiova duaduaga?
Ia ko cei tale sa kaukauwa, na noda Kalou duaduaga?
33Sa noqu koro-ni-valu na Kalou,
a sa vakadodonutaka na noqu i lakolako ko koya.
34 Apa 3.19 Sa cakava na yavaqu me tautauvata kei na yavadra na me kila,
a sa vakaturi au e na noqu tikina cecere.
35Sa vakavulica na ligaqu me ia nai valu,
a sa musuki kina e na ligaqu na dakai kaukamea.
36O sa solia talega vei au nai sasabai ko sa vakabulai au kina,
a sa vakalevutaki au na nomu yalomalua.
37O a vakalalagataka vei au na noqu sala,
a sa sega ni tidara kina na yavaqu.
38Au a vakasavi ira na noqu meca, ka vakarusai ira;
ka'u a sega ni lesu tale mai, ka'u a vakaoti ira mada eliu.
39Ia ka'u a vakaoti ira, ka vakamavoataki ira, a ra sa sega ni tucake tale rawa;
io, era sa bale sobu e ruku ni yavaqu.
40Ni kemuni a vauci au e na kaukauwa me ia nai valu,
ko ni a vakamalumalumutaki ira vei au era a tucake vakaivalu vei au.
41O ni a vakanadakuya talega vei au na noqu meca,
me'u vakarusai ira kina era sa cati au.
42Era a rai voli, ka sega e dua me vakabula;
io, vei Jiova, ka sa sega ni vosa vei ira.
43Ka'u sa qai vurumemeataki ira me vaka na kuvu ni qele,
ka'u a buturaki ira me vaka na oruoru e na salatu, ka dui biubiuti ira.
44“O ni a vakabulai au talega mai na nodra veileti na noqu tamata,
o ni a maroroi au me'u liu e na veimatanitu;
era na qaravi au na tamata ka'u a sega ni kila.
45Ena vakarokorokotaki au ko ira na kai tani;
ni ra sa rogoci au, era na talairawarawa vei au.
46Era na malai yani na kai tani,
a ra na lako ninini tu mai na nodra veitikina vuni.
47“Sa bula ko Jiova; ia me vakacaucautaki na noqu kaukauwa;
ia me vakalevulevui na Kalou, o koya na kaukauwa ka'u sa bula kina,
48a Kalou ga ko koya sa cudruvaki au,
ka vakamalumalumutaki ira na tamata vei au,
49ka kauti au tani mai vei ira na noqu meca;
o ni a laveti au me'u uasivi cake vei ira era tucake vakaivalu vei au,
ko ni a vakabulai au mai na tamata dauravuravu.
50 Roma 15.9 “O koya oqo ka'u na vakamolimoli kina vei kemuni, Jiova, e na kedra maliwa na lewe ni veivanua,
ka seretaka na yacamuni.
51O koya ga na vale cecere ni bula vei koya na nona tui,
ka sa ia na loloma vua ka lumuta ko koya;
io vei Tevita, kei na nona kawa, ka sega ni mudu.”
Who We AreWhat We EelieveWhat We Do
2025 by iamachristian.org,Inc All rights reserved.
