Aisea 41 - Ai Vola Tabu (Vakadewa Makawa Vakavoutaki 2021)（FRV21）

Na Veivakadeitaki ni Kalou vei Isireli

1Dou vakadirorogo vei au, na veiyanuyanu;

ia me ra vakaukauwataki tale na veimatanitu;

me ra toro voleka mai, me ra qai vosa;

me da mai ia vata na veilewai.

2Ko cei ka vakauqeta e dua na tamata yalododonu mai na tokalau,

ka kacivi koya mai ki na yavana,

ka solia na veimatanitu vua,

ka lesi koya me lewai ira na tui?

Ko cei ka soli ira me vaka na kuvu-ni-soso ki na nona i seleiwau,

ka vaka na vu-ni-sila e cagina ki na nona dakai-titi?

3Sa muri ira ko koya ka sa lako vakavinaka yani,

e na sala sa sega ni butuka na yavana.

4Ko cei sa ia ka cakava oqori,

ka kaciva na veitabatamata mai liu sara?

Koi au ko Jiova, nai vakatekivu,

ka'u sa bula vata kei ira era sa muri sara;

sai au ga oqo.

5Sa kunea oqori na veiyanuyanu, ka sa rere;

sa sautaninini na veiyalayala kei vuravura;

era sa toro voleka, ka lako mai.

6Era sa dui vukea na kai nona,

ka ra sa dui kaya vua na kai nona, “Tou gumatua!”

7A rau sa veivagumatuataki vakataki rau na dauceuceu kei na matai ni koula,

kei rau na dauvakayagovinakataka e nai tukituki,

kei na dautukia e na drata kaukamea,

a rau sa veikayaka e na vuku ni drega,

“Sa drega vinaka oqo;”

ka rau sa vakadeitaka e nai vako, me kakua ni yavala.

8 2Vei 20.7; Jeme 2.23 Ia ko iko, Isireli, na noqu tamata;

ko iko Jekope ka'u sa digitaka,

na kawa i Eparaama na wekaqu;

9ko iko ka'u a kauta mai nai yalayala kei vuravura,

ka kaciva mai na saukana,

ka sa kaya vei iko, “Sai iko na noqu tamata,

ka'u a digitaki iko, ka sega ni biuti iko!”

10Kakua ni ko rere, ni'u sa tiko vata kei iko,

kakua ni ko taqaya, ni'u sa nomu Kalou;

ka'u na vakaukauwataki iko; io, ka'u na vukei iko;

io, ka'u na tokoni iko e na ligaqu i matau sa daudina.

11Raica, era na madua ka taqaya

ko ira kecega era sa yalo ca vei iko;

era na vaka na ka wale;

era na rusa ga ko ira era veileti kei iko.

12Ko na qarai ira era dauveicudruvi kei iko,

ka sega ni kunei ira;

ko ira era veivala kei iko

era na vaka na ka wale, kei na ka sa sega.

13Ni sai au ko Jiova na nomu Kalou,

ka'u na taura na ligamu i matau,

ka kaya vei iko, “Mo kakua ni rere,

ka'u na vukei iko.”

14Kakua ni rere, ko iko Jekope na baca-ni-qele,

kei kemudou na Isireli;

ka'u na vukei iko, sa kaya ko Jiova;

ka'u na nomu i Vakabula, na Yalosavasava ni Isireli.

15Raica, ka'u na qisi iko mo samu-yara

e gata ka vou ka vakabatina;

ko na samuta na veiulunivanua ka butuqaqia me matailalai,

ia na veiulu-ni-koro ko na cakava me tautauvata kei na qa ni sila.

16Ko na iriva, ena qai cagina tani e na cagi,

ka na veibiuyaka na covulaca;

ia ko iko ko na marautaki Jiova;

ko na vakacaucautaki Koya na Yalosavasava ni Isireli.

17 Ni ra sa qara wai na malumalumu kei na dravudravua,

ka sa sega;

ni sa mamaca na yamedra e na viagunu,

koi au ko Jiova, ka'u na rogoci ira,

koi au na nodra Kalou na Isireli,

ka'u na sega ni laivi ira.

18Ka'u na vakadavea na uciwai e na vanua talasiga,

kei na mata-ni-wai e na veibuca;

ka'u na cakava na vanua lala me drano,

kei na vanua mamaca mei vurevure ni wai.

19Ka'u na tea e na talasiga na sitari,

kei na sitimi, kei na mateli, kei na olive;

ka'u na tea vata mai na vanua dravuisiga na nokonoko,

kei na damanu, kei na dilo,

20me ra raica, ka kunea,

ka vakananuma, ka kila vata,

ni sa cakava na ka oqo na liga i Jiova,

ka sa vakatubura ko Koya na Yalosavasava ni Isireli.

Sa Bolei Ira na Kalou Tani ko Jiova

21Dou tukuna mai na nomudou ka e veiletitaki, sa kaya ko Jiova;

dou vakamacalataka mai, sa kaya na Tui Jekope.

22Me ra tukuna mada mai,

ka vakatakila vei keda na ka ena yaco.

Na ka eliu, se vakaevei oqori,

me ra tusanaka mai vei keda,

me da vakananuma, ka kila na kenai tinitini;

se na ka ena yaco mai muri, me ra vakatakila mai vei keda.

23Dou tukuna mai na ka ena yaco mai muri,

me keitou kila ni dou sa kalou;

io dou cakava na ka vinaka, se cakava na ka ca,

me keitou taqaya, ka vakaraica vata.

24Raica, dou sa ka walega,

ia na nomudou cakacaka sa sega ga;

sa ka vakasisila ko koya sa digitaki kemudou.

25Au a vakauqeta e dua mai na mata ni vualiku, ka sa lako mai;

mai na vanua sa cadra kina na mata-ni-siga ena masuta na yacaqu ko koya.

Ia ena lako mai vei ira na turaga me vaka ki na drega ni vale,

ka vaka na dautuli kuro ni sa butuka na tete.

26Ko cei ka tukuna mai nai vakatekivu, me keimami kila,

se na gauna eliu, me keimami kaya, “Sa dina?”

Ia sa sega e dua sa vakatakila, sa sega talega e dua sa tukuna,

sa sega talega e dua sa rogoca na nomudou vosa.

27Koi au ga ka kaya eliu ki Saioni, “Raica, raici ira;”

ia ka'u sa solia ki Jerusalemi nai talaki ni tukutuku vinaka.

28Ni'u a vakaraica, ka sa sega e dua na tamata;

io vei ira oqo, ka sa sega e dua sa tukuna rawa

e dua na ka ni'u sa taroga vei ira.

29Raica, era sa ka wale kecega;

sa ka wale talega na nodra cakacaka;

sa cagi wale ka lala walega na nodra matakau e vakawaicalataki.