Vakatekivu 49 - Ai Vola Tabu (Vakadewa Makawa Vakavoutaki 2021)（FRV21）

Nai Otioti ni Vosa nei Jekope

1A sa kacivi ira na luvena tagane ko Jekope, ka kaya, “Dou soqoni vata mai, me'u tukuna vei kemudou na ka ena yacovi kemudou e na gauna mai muri.

2“Dou soqoni vata mai, ka vakarorogo kemudou na luve i Jekope;

ia dou rogoci Isireli na tamamudou.

3“I Rupeni, ko iko na noqu ulumatua,

na noqu qaqa kei nai vakatekivu ni noqu kaukauwa,

sa uasivi e na veika vakaturaga ka uasivi e na kaukauwa.

4Sa sega ni tarovi vaka na wai, ko na sega ni uasivi cake

e na vuku ni ko a davo e nai mocemoce i tamamu;

ko a qai vakadukadukalitaka, ni ko sa davora na noqu i davodavo!

5“Erau veitacini ko Simione kei Livai;

ai yaragi ni ravuravu na nodrau i seleiwau.

6Na yaloqu, mo kakua ni bose vata kei rau;

me kakua ni tiko vata kei na nodrau i soqosoqo na noqu lagilagi.

Ni rau a vakamatea na tamata e na nodrau cudru,

ka tularuataka na bulumakau e na nodrau lomaqa.

7Me cudruvi na nodrau cudru, ni sa kaukauwa,

kei na nodrau cudru waqawaqa, ni sa dauveitotogitaki;

au na tawasei rau e Jekope,

ka dui biubiuti rau e Isireli.

8“I Juta, ko iko era na vakavinavinaka kina na veitacini;

a ligamu ena taura na domodra na nomu meca;

era na cuva vei iko na luve i tamamu.

9 Tiko 24.9; Vtaki 5.5 A luve ni laione ko Juta;

ko sa lako cake, na luvequ, ni ko rawa na kemu.

Sa cuva ko koya, sa koto me vaka na laione,

ia ka vaka na laione yalewa—ko cei me vakacudruya?

10Ena sega ni lako tani vei Juta nai titoko vakaturaga,

se na turaganilewa mai vei ira na nona kawa,

ka me lako mada mai ko Sailo,

ko koya era na talairawarawa kina na veimataqali.

11Ena nokata ko koya na nona asa ki na vaini,

kei na nona luve ni asa ki na vaini talei;

ena sava na nona i tutuvi e na waini,

kei na nona i sulu e na dra ni vua-ni-vaini;

12ena damudamu na matana e na waini,

ka vulavula na batina e na wai-ni-sucu.

13“Ko Sevuloni, ena tiko mai na toba mai waitui;

ia ena tiko ko koya mai nai kelekele ni waqa,

ia ena yacovi Saitoni na nona i yalayala.

14“Ko Isakari, na asa kaukauwa,

sa koto sobu e na maliwa ni bai ni sipi;

15a sa kunea ko koya ni sa vinaka nai cegucegu,

ka ni sa ka me marautaki na vanua;

a sa solia na tabana me colacola,

a sa dausauta ki na nona i tavi cakacaka.

16“Ko Tani ena lewai ira na nona tamata

me vaka e dua vei ira na yavusa i Isireli.

17Ko Tani ena dua na gata e na bati ni sala,

a gata daukata e na bati ni salatu,

sa katia na bukubuku-ni-yava ni ose,

a sa lutu kina ki ra ko koya sa vodoka.

18Au sa waraka na bula mai vei kemuni, i Jiova!

19“Ko Kata, ena gumatua mada vua e dua na mataivalu,

ia e muri ena gumatua ko koya.

20“Ko Aseri, ena uro na magiti mai nona vanua,

ena vuataka talega ko koya na kakana vinaka vakaturaga.

21“Ko Navitalai, sa me kila ka tasere;

sa tukuna ko koya na vosa me marautaki.

22“Ko Josefa sa tabanikau dauvua,

io na tabanikau dauvua e na bati ni mata-ni-wai;

sa salava na dela ni bai-vatu na tabana.

23A ra sa dauvakararawataki koya na dauvavana;

ka vana, ka ra sagai koya.

24Ia sa kaukauwa tiko ga na nona dakai,

a sa vakaukauwataki na taba ni ligana,

e na ligana na Kaukauwa i Jekope,

sa vu mai kina nai Vakatawa, na Uluvatu i Isireli,

25io mai na Kalou i tamamu, ko koya ena vukei iko,

ko koya sa Kaukauwa talega ka na vakalougatataki iko

e na ka ni veivakalougatataki mai lomalagi e cake,

kei na ka ni veivakalougatataki mai na vanua titobu e ra,

kei na ka ni veivakalougatataki ni sucu kei na kete.

26Na vosa ni veivakalougatataki i tamamu

sa levu cake e na ka ni veivakalougatataki ni noqu qase,

ka yacova na veiulunivanua e sega ni oti rawa;

ena tauca na ulu i Josefa,

kei na buradelai koya ka tawase mai vei ira na tuakana.

27“Ko Penijamini, ena daukata me vaka na wolifa,

ena kania e na mataka na kena sa rawa,

ka na vota e na yakavi na veika e butakoci.”

28Ko ira kecega oqo na yavusa i Isireli e tinikarua, ia oqo na ka sa vosataka vei ira ko tamadra, ni sa vosavakalougatataki ira; sa vosavakalougatataki ira yadua me vaka na ka era dui kalougata kina.

Na Mate kei na Bulu nei Jekope

29A sa vakaroti ira, ka kaya vei ira, “Au sa vakarau toki yani kivei ira na wekaqu. Dou buluti au vata kei ira na tamaqu e na qara-vatu mai na tiki ni vanua nei Efironi na Itaiti,

30Vteki 23.3-20e na qara-vatu mai na tiki ni vanua ko Makipila ka sa voleka ki Mamire, mai na vanua ko Kenani, e na tiki ni vanua sa volia ko Eparaama vei Efironi na Itaiti me nona i bulubulu.

31Vteki 25.9-10; 35.29Mai kea era a buluti Eparaama kina kei Sera na watina. Mai kea era a buluti Aisake kina kei Repeka na watina; mai kea talega ka'u a buluti Lia kina—

32na tiki ni vanua ko ya kei na qara-vatu sa tu kina, a sa voli mai vei ira na Itaiti.”

33Caka 7.15Ia ni sa vakaroti ira oti na luvena ko Jekope, sa lokia cake na yavana ki nai mocemoce, ka solia nai otioti ni nonai cegu, ka sa toki yani vei ira na kai nona.