1A vosa vakaibalebale i Solomoni.
A gone vuku sa vu ni reki vei tamana,
ia na gone lialia sa vu ni rarawa vei tinana.
2Ai yau ni ca sa sega ni yaga,
ia na caka dodonu sa ka ni veivakabulai mai na mate.
3Ko Jiova ena sega ni laiva na yalona na yalododonu me viakana,
ia sa biuta tani na nodra i yau na tamata ca.
4Sa na dravudravua mai ko koya sa kuku ce,
ia ko koya sa kuku matua sa na vutuniyau kina.
5Ko koya sa kumuna e na vula i katakata sa gone vuku,
ia ko koya sa daumoce e na gauna ni tatamusuki sa gone e veivakamaduataki.
6A vosa ni veivakalougatataki sa na tau ki na uluna na yalododonu,
ia na gusudra na tamata ca ena tabonaki e nai valavala kaukauwa.
7A kedrai nanumi na yalododonu sa ka ni veivakalougatataki,
ia na yacadra nai valavala ca ena rusa ga.
8Ko koya sa lomavuku ena vakabauta na vunau,
ia na lialia dauvosa ena bale ga.
9Ko koya sa lako vakadodonu sa lako doudou,
ia ko koya sa vakavevetaka na nona i lakolako ena kilai.
10Ko koya sa katariva e na matana sa vakayaco ka rarawa,
ia na lialia dauvosa ena bale ga.
11A gusuna na yalododonu sa dua na mata-ni-wai bula,
ia na gusudra na tamata ca ena tabonaki e nai valavala kaukauwa.
12 Jeme 5.20; 1Pita 4.8 A veicati sa ka e tubu kina na veileti,
ia sa ubia nai valavala ca kecega na loloma.
13E na tebenigusuna na yalomatua sa kune kina na vuku,
ia ena tau na kuita ki na dakuna na yalowai.
14Era kuria tiko na vuku ko ira na yalomatua,
ia na gusuna na lialia sa volekata na rusa.
15A nona i yau na vutuniyau sa nona koro kaukauwa,
a nodra dravudravua na dravudravua sai koya era ca kina.
16A nona cakacaka na yalododonu sa ka ni bula,
a vu ni nona oca na tamata ca nai valavala ca.
17Sa lakova na sala ni bula ko koya sa vakabauta nai vakavuvuli;
ia ko koya sa bese ni vunauci sa lako sese tiko.
18Ko koya sa vunia na veicati e na tebenigusu lasu,
kei koya sa cavuta na kakase, erau sa tamata lialia.
19Ni sa levu na vosa ena sega ni yali na ka ca,
ia ko koya sa tarova na tebenigusuna sa vuku.
20Na yamena na yalododonu sa siliva talei,
ia na lomadra na tamata ca sa sega so ni yaga.
21Sa vakani ira na lewe vuqa na tebenigusu ni yalododonu,
ia ko ira na lialia era mate ga ni sa sega vei ira na vuku.
22Na veivakalougatataki mai vei Jiova sa ia na veivakavutuniyautaki,
ka sa sega ni kuria ko koya e na ka rarawa.
23Sa vaka na qito vua na lialia me kitaka na ka ca,
ia na tamata yalomatua sa taukena na vuku.
24Ena yaco ga vua na tamata ca na ka sa rerevaka ko koya,
ia ena soli vua na yalododonu na ka e gadreva.
25Ni sa lako tani yani na covulaca, sa qai yali vata talega na tamata ca,
ia sa nei koya na yalododonu na yavu e sega ni oti.
26Me vaka na wai wiwi ki na batida, kei na kubou ki na matada,
sa vakakina na vucesa vei ira sa talai koya.
27A rerevaki Jiova sa vakaikuritaki kina na siga,
ia na nodra gauna nai valavala ca ena vakalekalekataki.
28A ka era nuitaka na yalododonu era na rekitaka,
ia na ka era nuitaka nai valavala ca ena sega ni yaco.
29A sala i Jiova sa vu ni kaukauwa vei ira na yalododonu,
ia na rusa ga ena yaco vei ira na daucaka ca.
30Ena sega sara ni yavalati na yalododonu,
ia ko ira nai valavala ca era na sega ni vakatawai vuravura.
31A gusuna na yalododonu sa dautubura na ka vuku,
ia na yame sa vosa vakatani ena seledruti laivi.
32A tebenigusuna na yalododonu sa kila na ka e vinaka,
ia na gusudra nai valavala ca sa vosataka na ka vakatani.
Who We AreWhat We EelieveWhat We Do
2025 by iamachristian.org,Inc All rights reserved.
