Vakatakila Nai Vakamacala Taumada - Ai Vola Tabu (Vakadewa Makawa Vakavoutaki 2021)（FRV21）

Nai Vakamacala Taumada Nai Vakatakila sa Vola ko Joni sa volai ena gauna era sa vakararawataki tiko kina na tamata lotu Vakarisito ena vuku ni nodra vakabauta ni sa Turaga ko Jisu Karisito. Nai naki levu ni kena volai nai vola oqo me solia nai nuinui kei na yaloqaqa vei ira era na wilika nai vola oqo, ka me ra yalodina tikoga ena gauna ni veivakararawataki kei na veivakacacani.E dua nai wase levu ni vola oqo e koto veitaravi kina na veika sa vakatakilai mai kei na raivotu eso sa vakamacalataki ena vosa vakaiyaloyalo ka sa rawa beka ni ra kila na kenai balebale o ira na lewe ni Lotu Vakarisito ena gauna o ya, ia sa dredre ga me ra na kila vakarawarawa na kena vo. Sa dau tokaruataki se tukuni vakavica nai ulutaga se vakasama lelevu eso ka volai tiko ena i vola oqo, ka sa duidui ga na sala era sa vakamacalataki kina mai na kedra duidui na raivotu se na veika sa vakaraitaki. E dina ga ni ra tiko na duidui eso me baleta na kena vakadewataki nai vola oqo edaidai, ia sa matata tikoga na kenai naki levu: ni na vakarusai ira kecega na nona meca na Kalou ena cakacaka i Jisu Karisito na noda Turaga ena i otioti ni gauna, ka okati talega kina ko Setani; ia ena qai vakaicocovitaki ira ga na nona tamata yalodina ena veivakalougatataki ni lomalagi vou kei na vuravura vou ni sa rawati vakavinaka sara na qaqa oqo.Na Lewe ni VolaNai vakamacala taumada 1.1-8

Ai matai ni raivotu kei nai vola e vitu 1.9—3.22

Nai vola vivigi e vitu na kena drega 4.1—8.1

Na davui e vitu 8.2—11.19

Na drakoni kei na manumanu rerevaki e rua 12.1—13.18

Eso na raivotu 14.1—15.8

Na bilo ni cudru ni Kalou e vitu 16.1-21

Na vakarusai nei Papiloni, na vakadrukai ni manumanu rerevaki, na parofita vakailasu, kei na tevoro 17.1—20.10

Nai otioti ni veilewai 20.11-15

Na lomalagi vou, na vuravura vou, kei Jerusalemi vou 21.1—22.5

Na kenai tinitini 22.6-21