Lako Yani 8 - Ai Vola Tabu (Vakadewa Makawa Vakavoutaki 2021)（FRV21）

Nai Karua ni Mate Ca: Manumanu na Boto

1A sa kaya vei Mosese ko Jiova, “Mo lako vei Fero, ka kaya vua, ‘Sa vosa vakaoqo ko Jiova: Mo laivi ira na noqu tamata me ra lako, me rawa ni ra mai qaravi au.

2Ia kevaka ko sa bese ni laivi ira me ra lako, raica, ka'u na yavita na nomu veiyasana kecega e na boto.

3Ia ena vakatubura vakalevu na boto na uciwai, a ra na lade cake ka curuma na nomu vale, kei na nomu vale ni moce, ka lade ki na nomu i mocemoce, ka curuma na nodra vale era qaravi iko, kivei ira na nomu tamata, ki na nomu lovo, kei na nomu sedre sa natuki kina na madrai.

4Ia na boto ena lakovi iko, kei ira na nomu tamata, kei ira kecega era qaravi iko.’ ”

5Sa kaya talega vei Mosese ko Jiova, “Mo kaya vei Eroni, ‘Mo dodoka na nomu i titoko ka tu e na ligamu vaka ki na uciwai lalai, kei na uciwai, kei na drano, ka vakayacora mai na boto me lakova na dela ni vanua ko Ijipita.’ ”

6A sa dodoka na ligana ko Eroni vaka ki na wai kecega mai Ijipita; a sa lako cake mai na boto ka robota na vanua ko Ijipita.

7Ia era sa kitaka talega vakakina na daucaka-mana e na nodra i valavala vuni, ka ra sa kauta cake mai na boto ki dela ni vanua ko Ijipita.

8Sa qai kacivi Mosese kei Eroni ko Fero, ka kaya, “Drau vakamasuti Jiova me kauta tani na boto vei au kei ira talega na noqu tamata, ka'u na qai laivi ira na tamata me ra la'ki vakacaboisoro vei Jiova.”

9A sa kaya vei Fero ko Mosese, “Mo ni qai tukuna mai vei au se me'u vakamamasu ninaica e na vukumuni, kei na vukudra era qaravi kemuni, kei ira na nomuni tamata, ka me qai kau tani kina na boto mai vei kemuni kei na nomuni veivale, ka me ra tiko ga e na uciwai na Naile.”

10A sa kaya ko koya, “E na mataka.” A sa kaya ko Mosese, “Ena vaka na nomuni vosa! Mo ni na kila kina ni sa sega tale e dua me tautauvata kei Jiova na neimami Kalou.

11Ena lako tani na boto mai vei kemuni kei na nomuni veivale, mai vei ira talega era sa qaravi kemuni kei ira na nomuni tamata; ka ra na tiko ga e na uciwai na Naile.”

12A rau sa lako tani vei Fero ko Mosese kei Eroni; a sa tagi vei Jiova ko Mosese e na vuku ni boto ka kauta ko koya vei Fero.

13A sa kitaka ko Jiova me vaka na vosa i Mosese; a sa mate yani na boto mai na veivale, mai na veirara, mai na veiwere talega.

14A ra sa dui binibinia vata, a sa bona sara na vanua.

15Ia ni sa raica ko Fero era sa vakacegu, a sa vakaukauwataka na lomana, ka sa sega ni vakarorogo vei rau, me vaka ga na ka sa kaya ko Jiova.

Nai Katolu ni Mate Ca: Na Kutu

16A sa vosa vei Mosese ko Jiova, “Mo kaya vei Eroni, ‘Mo dodoka na nomu i titoko, ka yavita na kuvu ni vanua, me vuki kina me kutu e na vanua taucoko ko Ijipita.’ ”

17A rau sa kitaka vakakina; a sa dodoka ko Eroni na nona i titoko ka tu e na ligana, ka yavita na kuvu ni vanua, ka sa lako mai na kutu e na tamata kei na manumanu; na kuvu ni vanua taucoko sa vukici me kutu e na vanua taucoko ko Ijipita.

18A ra sa via kitaka vakakina na daucaka-mana e na nodra i valavala vuni, ka me vakatubura na kutu, ia era sa sega ni rawata. A sa tiko na kutu e na tamata kei na manumanu.

19Luke 11.20Era sa qai kaya vei Fero na daucaka-mana, “Oqo na qaqalo-ni-liga ni Kalou!” Ia sa kaukauwa ga na loma i Fero, ka sa sega ni vakarorogo vei rau ko koya; me vaka sa kaya oti ko Jiova.

Nai Kava ni Mate Ca: Na Lago

20A sa kaya vei Mosese ko Jiova, “Mo sou e na mataka, ka la'ki tu e na mata i Fero, ni sa lako yani ki wai, ka mo kaya vua, ‘Sa kaya vakaoqo ko Jiova: Mo laivi ira na noqu tamata me ra lako, me ra la'ki qaravi au.

21Ni kevaka ko sa bese ni laivi ira na noqu tamata me ra lako, raica, ka'u na tala na qele ni lago vei iko, kei ira era qaravi iko, kei ira na nomu tamata, ki na nomu veivale talega; ia ena oso na nodra veivale na kai Ijipita e na qele ni lago, kei na vanua talega era tiko kina.

22Ia e na siga ko ya ka'u na wasea na vanua ko Koseni era tiko kina na noqu tamata, me kakua ni tiko kina na qele ni lago; mo kila kina ni sai au ko Jiova e vuravura;

23ia ka'u na wasei ira na noqu tamata kei na nomu tamata. Ena caka e na mataka nai vakatakilakila oqo.’ ”

24A sa cakacaka vakakina ko Jiova. A sa lako mai na qele ni lago e levu ki na vale i Fero, kei na nodra vale na nona tamata. A sa ca na vanua e na veiyasana kecega mai Ijipita ni sa ka levu na lago.

25A sa kacivi Mosese kei Eroni ko Fero, ka sa kaya, “Dou lako, mo dou la'ki vakacaboisoro vua na nomudou Kalou e na loma ni vanua oqo.”

26Ia sa kaya ko Mosese, “Sa sega ni dodonu me keimami kitaka vakaoqori; ni keimami na vakacabora vei Jiova na neimami Kalou na ka era vakatabuya na kai Ijipita. Raica, kevaka keimami sa vakacabora e matadra na ka era vakatabuya ko ira na kai Ijipita, era na sega beka ni vakaviriki keimami e na vatu?

27Keimami na lako ga ka bogi tolu ki na vanua lala, ka vakacaboisoro vei Jiova na neimami Kalou, me vaka sa vakarota vei keimami ko koya.”

28A sa kaya ko Fero, “Au na laivi kemudou mo dou la'ki vakacaboisoro vei Jiova na nomudou Kalou e na vanua lala, ia dou kakua ga ni lako vakayawa. Drau qai masulaki au mai.”

29A sa qai kaya ko Mosese, “Ena gauna ga ka'u sa lako tani kina mai vei kemuni, au na masuti Jiova me lako tani e na mataka na qele ni lago mai vei Fero, mai vei ira era qaravi koya kei ira na nona tamata; ia me kakua ga ni lasu tale ko Fero, ni sa sega ni laivi ira na tamata me ra la'ki vakacaboisoro vei Jiova.”

30A sa lako tani mai vei Fero ko Mosese, ka masuti Jiova.

31A sa cakava ko Jiova me vaka na vosa i Mosese: a sa kauta tani na qele ni lago mai vei Fero, mai vei ira era qaravi koya, kei ira na nona tamata; sa sega ni vo e dua.

32Ia sa vakaukauwataka na lomana ko Fero e na siga talega oqo, ka sa bese ni laivi ira na tamata me ra lako.