Kalatia 3 - Ai Vola Tabu (Vakadewa Makawa Vakavoutaki 2021)（FRV21）

Na Cakacaka ni Vunau se na Vakabauta

1Oi kemudou na kai Kalatia, dou sa sesewa! O cei beka sa lari kemudou? Ni sa vakaraitaki oti e na matamudou ko Jisu Karisito me vaka ni sa vakoti ki na kauveilatai.

2A ka ga oqo ka'u sa via kila vei kemudou: Dou sa rawata na Yalo Tabu e na cakacaka ni vunau, se ni dou rogoca na vakabauta?

3Dou sa sesewa vakaoqo ne? Ni dou sa vakatekivuna e na Yalo Tabu, dou sa qai tinia beka e na ka vakayago?

4Dou a vosota vakaoqo e vuqa na ka era sega ni yaga—kevaka sa sega ni yaga vakaidina?

5O koya oqo, sa vakayacora li oqo—ko koya sa dausolia vei kemudou na Yalo Tabu ka sa daucaka-mana e na kemudou maliwa—mai na cakacaka ni vunau, se mai na vakabauta na ka sa rogoci?

6 Vteki 15.6; Roma 4.3 Me vaka sa “vakadinata na Kalou ko Eparaama, a sa okati vua mei valavala dodonu.”

7Roma 4.16O koya mo dou kila, ko ira era sa muria na vakabauta, sai ira ga era sa luve i Eparaama.

8Vteki 12.3Ia nai Vola Tabu talega, ni sa kila makawa sa vakabauta sa dauvakadonui ira kina na veimatanitu tani na Kalou, sa vunautaka mada eliu vei Eparaama nai tukutuku-vinaka, “Ena vakalougatataki na veivanua kecega e na vukumu.”

9O koya oqo era sa vakalougatataki vata kei Eparaama na dauvakabauta ko ira sa muria na vakabauta.

10 Vrua 27.26 Ni sa lewai me cudruvi, o ira kecega era sa muria na cakacaka ni vunau; ni sa volai, “Ena cudruvi ko ira yadua sa sega ni tudei e na ka kecega sa volai e nai vola ni vunau me ra cakava.”

11Apa 2.4Ia sa macala sara sa sega ni vakadonui e nai vunau e dua e na mata ni Kalou; ni sa volai, “Ena bula na tamata dodonu e na vuku ni vakabauta.”

12Vsoro 18.5Ia sa sega ni ka ni vakabauta nai vunau; “ia ko koya ga sa cakava na veika oqo ena bula kina.”

13Vrua 21.23Sa voli keda na Karisito mai na veicudruvi ni vunau, ni sa cudruvi ga ko koya e na vukuda—ni sa volai, “Sa cudruvi ko ira yadua sa rube e na kau”—

14me yaco kina na ka ni veivakalougatataki nei Eparaama vei ira na veimatanitu tani e na vuku i Karisito Jisu, me da rawata kina na Yalo ka yalataki, ni da sa vakabauta.

Na Vunau kei na Vosa ni Yalayala

15Oi kemudou na veiwekani, au sa kaya mada e dua na kena i vakaraitaki vakatamata: ni kevaka sa tamata ga sa ia na veiyalayalati, ka sa vakadinadinataki, sa qai sega e dua sa vakatawayagataka se vakaikuritaka.

16Ia sa cavuti vei Eparaama na veiyalayalati, vei ira talega na nona kawa. Sa sega ni kaya ko koya, “Vei ira na veikawa,” me vaka sa vuqa na kawa; ia sa cavuti ga ki vua e dua bau, “Vua na nomu kawa,” o koya na Karisito.

17Lako 12.40Ia oqo ka'u sa kaya, a veiyalayalati ka vakadinadinataka eliu na Kalou, sa sega ni vakatawayagataka na vunau sa yaco ni sa oti mada e va na drau ka tolusagavulu na yabaki, me sega kina ni mana na vosa ni yalayala.

18Roma 4.14Io, kevaka sa yaco nai votavota e na vuku ni vunau, sa qai sega e na vuku ni yalayala, ia na vosa ni yalayala ga sa solia kina vei Eparaama na Kalou.

Nai Naki ni Vunau

19Sa qai mei cavai beka na vunau? Sa vakaikuritaki oqo e na vuku ni talaidredre, me yaco mada na kawa sa vosa kina na yalayala; a ra sa tukuna ko ira na agilosi e na gusu ni dua na dautataro.

20Ia na dautataro sa sega ni yaga ni sa dua bauga; ia na Kalou sa dua bauga.

21Erau sa qai duatani sara beka na vunau kei na vosa ni yalayala ni Kalou? E segai sara! Ia kevaka sa soli e dua na vunau sa rawa kina na veivakabulai, sa qai dina ena yaco na veivakadonui e na vuku ni vunau.

22Ia nai Vola Tabu sa sogolatia kecega, ka beitaka e na cala, me soli kina na ka sa yalataki, e na vuku ni vakabauti Jisu Karisito vei ira era sa vakabauta.

23Ia ni sa sega ni yaco na vakabauta, eda sa vakatawai me ia tiko na vunau, ni da sogolati tiko me yaco mada na gauna ni vakabauta ena vakaraitaki e muri.

24Sa qai yaco kina na vunau mei vakavuvuli me tuberi keda vei Karisito, me da vakadonui kina e na vuku ni vakabauta.

25Ia ni sa yaco na vakabauta, sa qai sega ni veitaliataki keda tiko nai vakavuvuli.

26Ni dou sa luve ni Kalou koi kemudou kecega ni dou sa vakabauti Karisito Jisu.

27Ni sai Karisito dou sa vakasulumi kemudou kina, oi kemudou yadua sa papitaisotaki vei Karisito.

28Sa qai sega na Jiu se na kai matanitu tani, sa sega na bobula se nai taukei, sa sega na tagane se na yalewa; ni dou sa dua bauga koi kemudou kecega e na vuku i Karisito Jisu.

29Roma 4.13Ia kevaka dou sa nei Karisito, dou sa qai kawa i Eparaama, kei nai taukei me vaka na vosa ni yalayala.