Osea 6 - Ai Vola Tabu (Vakadewa Makawa Vakavoutaki 2021)（FRV21）

Ai Vakaro me ra Veivutuni

1“Me da mai lesu vei Jiova;

ni sa ia na veidresulaki, ka sa na vakabulai keda talega ko koya;

sa ia oti na veiyaviti, ia ena vauca talega ko koya na noda mavoa.

2Ena vakabulai keda e na bogi rua;

e na bogi tolu ena vakaturi keda tale,

eda na qai bula e matana.

3Eda na qai kila, kevaka eda na gumatua me kilai Jiova;

sa vakarau tu na nona lako mai me vaka na mataka;

io, ena lako mai vei keda me vaka na uca,

me vaka sa tau na uca,

io, na uca taumuri sa vakasuasuataka na vuravura.”

Era sa Vunauci na Isireli kei na Juta

4A cava me'u cakava vei kemudou, na Ifereimi?

A cava me'u cakava vei kemudou, na Juta?

Ni sa vaka na o ni mataka na nomudou yalololoma

ka vaka na tegu sa yali sara e na mataka caca.

5O koya oqo ka'u sa tamusuki ira kina vei ira na parofita,

ka'u sa vakamatei ira e na vosa ni gusuqu,

ia na nomudou cudruvi sa vaka na rarama sa lako voli yani.

6 Maciu 9.13; 12.7 Na yalololoma ga ka'u sa vinakata, ka segai nai madrali,

kei na kila na Kalou, ka segai nai soro kama.

7Ia ko ira, era sa vaka na tamata sa vakacacataka na veiyalayalati;

ia mai kea era sa ia na veivakaisini vei au.

8Ko Kiliati, na koro ni tamata daucaka cala,

sa vakadukadukalitaki ki na dra.

9Ia me vaka era sa lawavaka na tamata na matadaubutako,

sa vakakina era sa ia na veilabati ko ira nai lawalawa bete,

e na sala vaka ki Sikemi;

io, era sa cakava na ka vakasisila.

10Ka'u a raica e dua na ka velavela e na vale i Isireli;

sa tu mai kina na nodra veibutakoci na Ifereimi,

sa vakadukadukalitaki ko ira na Isireli.

11Oi kemudou talega na Juta,

sa lesi oti vei kemudou na vula i matua,

ni'u a kauti ira tale mai na noqu tamata era sa vakabobulataki.