Josua 1 - Ai Vola Tabu (Vakadewa Makawa Vakavoutaki 2021)（FRV21）

Sa Vakatabui Josua na Kalou

1Sa mate ko Mosese na tamata ni Kalou ko Jiova, sa qai vosa ko Jiova vei Josua na luve i Nuni, o koya ka dauqaravi Mosese, ka kaya,

2“Sa mate ko Mosese na noqu tamata. Ia oqo, mo cavu tu, mo takosova na Joritani oqo, ko iko kei ira kecega na tamata oqo, ki na vanua ka'u na solia vei ira, io vei ira na Isireli.

3Vrua 11.24,25Na vanua kecega ena butuka na qeteqete ni yavamuni, au sa solia vei kemuni, me vaka ka'u a kaya vei Mosese.

4Me vakatekivu mai na vanua lala, mai Lepanoni talega oqo, ka yacova na uciwai levu, na uciwai ko Uferetisi, na nodra vanua kecega na Itaiti, ka yacova na Wasa Levu talega sa donuya nai dromudromu ni mata-ni-siga, sa na kenai yalayala ni nomuni vanua.

5Vrua 31.6,8; Ipe 13.5Ena sega e dua me vorati iko rawa e na veisiga kecega ko na bula kina. Au na tiko vata kei iko, me vaka ka'u a tiko vata kei Mosese; au na sega ni weletaki iko, se biuti iko.

6Vrua 31.6,7,23Mo kaukauwa ka yaloqaqa; ni ko na vota vei ira na tamata oqo na vanua ka'u a bubului kina kivei ira na nodra qase me'u solia vei ira.

7Mo kaukauwa ka yaloqaqa sara, ka mo vakabauta mo cakava me vaka nai vakaro kecega sa vakarota vei iko ko Mosese na noqu tamata. Mo kakua ni gole tani ki nai matau se nai mawi, mo tamata yaco e na yasana kecega ko lako kina.

8Ai vola ni vunau oqo me kakua ni yali e na gusumu; ia mo vakanananu kina e na siga kei na bogi, mo vakabauta kina mo cakava me vaka na ka kecega sa volai kina. Ko na qai kalougata e na nomu i valavala, ia ko na qai tamata yaco.

9Au sa sega li ni vakaroti iko kina? Mo kaukauwa ka yaloqaqa; mo kakua ni rere, se yalolailai, ni sa tiko vata kei iko ko Jiova na nomu Kalou e na veivanua kecega ko sa lako kina.”

Na Vakavakarau ki na Kena Curumi Vakaukauwa na Vanua

10Ia ko Josua sa qai vakaroti ira na nodra vakailesilesi na tamata, ka kaya,

11“Dou lako voli e na maliwa ni tikotiko, ka vakaroti ira na tamata, ka kaya, ‘Ni vakarautaka na kemuni vaqa; ia sa bogi tolu kemuni na takosova kina na Joritani oqo, mo ni la'ki taukena na vanua sa solia vei kemuni ko Jiova na nomuni Kalou mo ni taukena.’ ”

12 Tiko 32.28-32; Vrua 3.18-20; Josua 22.1-6 A sa vosa ko Josua vei ira na yavusa i Rupeni, kei na yavusa i Kata, kei na yavusa-veimama i Manasa, ka kaya,

13“Mo ni nanuma na vosa sa vakarota vei kemuni ko Mosese na tamata ni Kalou ko Jiova, ni sa kaya, ‘Sa solia vei kemuni ko Jiova, na nomuni Kalou, na vakacegu, ka na solia vei kemuni na vanua oqo.’

14Ko ira na watimuni, ko ira na nomuni lalai, kei na nomuni manumanu e yavai va, era na tiko ga e na vanua sa solia vei kemuni ko Mosese e na tai ni Joritani oqo. Ia koi kemuni na tamata i valu qaqa kece, kemuni na vakarau tu ka liutaki ira na wekamuni ka vukei ira,

15me vakacegui ira mada ko Jiova na wekamuni, me vakataki kemuni, ka me ra taukena talega na vanua sa solia vei ira ko Jiova na nomuni Kalou. Kemuni na qai lesu ki na vanua kemuni sai taukei kina, ka taukena, o koya sa solia vei kemuni ko Mosese na tamata ni Kalou ko Jiova, e na tai ni Joritani oqo, sa donuya nai cadracadra ni mata-ni-siga.”

16A ra sa vosa vei Josua, ka kaya, “Na ka kecega ko sa vakarota vei keimami, keimami na kitaka, ia keimami na lako ki na yasana kecega ko na talai keimami kina.

17Me vaka keimami a vakarorogo vei Mosese e na ka kecega, keimami na vakarorogo vakakina vei iko. Ia me tiko vata ga kei iko ko Jiova na nomu Kalou, me vaka sa tiko vata kei Mosese ko koya!

18Ena vakamatei na tamata vakaaduaga sa talaidredre ki na nomu vunau, ka sega ni vakarorogo ki na nomu vosa e na ka kece ko sa vakaroti koya kina. Ia mo kaukauwa ga ka yaloqaqa.”