Tiko mai na Lekutu Nai Vakamacala Taumada - Ai Vola Tabu (Vakadewa Makawa Vakavoutaki 2021)（FRV21）

Nai Vakamacala Taumada Na Tiko mai na Lekutu e talanoataki kina na kedra i tukutuku na Isireli me volekata na vasagavulu na yabaki me tekivu mai na gauna era biuti Saineai kina me yacova ni ra sa tadu ki nai yalayala ena tokalau ni vanua sa yalataka na Kalou me solia vei ira. Ena so tale nai vakadewa ni Vola Tabu, e taurivaki me yaca ni vola oqo na Wiliwili, baleta ni a wilika kina ko Mosese na kedra i wiliwili taucoko ni bera ni ra cavutu mai Saineai, ka la'ki wiliki tale ni ra sa yaco ki Moapi ena tokalau ni Joritani ni oti e dua nai tabatamata e muri. E yaco na wiliwili oqo ni ra tiko voli mai na lekutu, ka vakatakilai nai balebale ni lekutu me “vanua lala” se “vanua dravuisiga” ena gauna ko ya. Ena maliwa ni gauna ni wili lewe-ni-vanua e rua oqori, era sa yaco kina na Isireli ki na vanua ko Ketesa-banea, ena i yalayala ena ceva ni vanua ko Kenani; ia era a sega ni curuma mai kea na vanua yalataki. E oti tale e vica na yabaki na nodra tiko voli e kea, era sa qai cavutu ka lako ki na tokalau ni uciwai na Joritani; era sa mai toka kina e dua nai wase, ka ra vakavakarau na kena vo me ra kosova na uciwai na Joritani ka lako ki Kenani. Na Tiko mai na Lekutu e volai kina na kedra i tukutuku e dua na kawa tamata ka dau basika vakalevu vei ira na yalolailai kei na rere vakawasoma ni ra sota kaya na veika dredre. Era dau vuki tani tikoga mai vua na Kalou ka vakacudrui Mosese, o koya sa lesia na Kalou me liutaki ira. E talanoataki e nai vola oqo na nona yalodina tikoga na Kalou ka dau nanumi ira tiko na nona tamata, ka dina ga ni ra dau malumalumu ka dautalaidredre. E dusimaki talega kina na yalodina i Mosese vua na Kalou kei ira na lewe-ni-vanua, ka dina ga ni sa dau vuturi ena so na gauna.Na Lewe ni VolaNa nodra vakavakarau na Isireli me ra biuti Saineai 1.1—9.23

a. Nai matai ni wili lewe-ni-vanua 1.1—4.49

b. Nai vakaro kei na vunau eso 5.1—8.26

c. Nai karua ni Lako-sivia 9.1-23

Mai na Ulunivanua ko Saineai ki Moapi 10.1—21.35

Na veika sa yaco mai Moapi 22.1—32.42

Na tukutuku lekaleka ni lakolako mai Ijipita ki Moapi 33.1-49

Nai vakaro ni bera ni kosovi na Joritani 33.50—36.13