Esera 3 - Ai Vola Tabu (Vakadewa Makawa Vakavoutaki 2021)（FRV21）

Sa Qaravi Tale na Sokalou e Jerusalemi

1Ia ni sa yaco nai kavitu ni vula, a ra sa tiko e na veikoro ko ira na Isireli, era sa soqoni vata ko ira na tamata ki Jerusalemi me vaka era le dua ga na tamata.

2Lako 27.1Sa qai tucake ko Jesua na luve i Josateki ka tagane, kei iratou na bete na tacina, kei Serupepeli na luve i Sialitieli ka tagane, kei iratou na tacina, ka cakava nai cabocabo-ni-soro ni Kalou i Isireli, me vakacabora kina nai soro kama, me vaka sa volai e na vunau i Mosese na tamata ni Kalou.

3 Tiko 28.1-8 A ra sa cakava nai cabocabo-ni-soro e na kenai tutu; ni ra sa rere e na vuku ni lewe ni veivanua oqori, ka ra sa vakacabora kina nai soro kama vei Jiova, io nai soro kama e na mataka kei na yakavi.

4Tiko 29.12-38Ka ra sa ia na solevu ni vale tabanikau, me vaka sa volai, ka vakacabora na kenai soro kama, io, na kenai wiliwili, me vaka na kenai valavala, ka me vaka na kenai cakacaka ni veisiga;

5Tiko 28.11—29.39ia e muri nai soro kama sa daucaka e na veivula vou talega, kei na solevu sa vakatabui me nei Jiova sa loku tu, kei na nodra yadua era via vakacabora e na yalovinaka vei Jiova.

6Sa vakatekivu e nai matai ni siga ni kenai kavitu ni vula na nodra vakacabora nai soro kama vei Jiova. Ia sa bera ni tauyavutaki na vale i Jiova.

7Era a solia talega nai lavo vei ira na matai ni vatu, kei ira na matai ni kau; kei na kakana, kei na medra, kei na waiwai, vei ira na kai Saitoni, kei ira na kai Taia, me ra kauta mai na vu ni sitari mai Lepanoni ki na wasawasa mai Jopa, me vaka na ka sa solia vei ira ko Sairusi na tui Perisia.

Sa Tauyavutaki na Vale ni Kalou

8Ia e nai karua ni yabaki ni nodra lako mai ki na vale ni Kalou mai Jerusalemi, e nai karua ni vula, sa vakatekivu ko Serupepeli na luve i Sialitieli ka tagane, kei Jesua na luve i Josateki ka tagane, kei na wekadra sa vo ko ira na bete kei ira na Livai, kei ira kece era sa lesu mai ki Jerusalemi mai na veivakabobulataki; a ra sa lesi ira na Livai, sa ruasagavulu na nodra yabaki ka qase cake, me vakaraica na cakacaka ni vale i Jiova.

9Era sa qai tu vata ko Jesua kei iratou na luvena tagane kei iratou na wekana, ko Katimieli kei iratou na luvena tagane, ko iratou na luve i Juta era tagane, me vakaroti ira na matai e na vale ni Kalou, kei iratou na luvei Enatati ka tagane, kei ira na luvedra tagane kei ira na tacidra na Livai.

10 1Vei 25.1 Ia ni ra sa tauyavutaka na vale i Jiova ko ira na matai, sa lesi ko ira na bete me ra tu e na nodra i sulu vakabete ka taura na davui, kei ira na Livai na luve i Esava ka tagane ka taura na sibali, me ia na vakavinavinaka vei Jiova, me vaka ka vakarota ko Tevita na tui Isireli.

111Vei 16.34; 2Vei 5.13; 7.3; Same 100.5; 106.1; 107.1; 118.1; 136.1; Jere 33.11A ra sa sere vata ka veisausau e na vakavinavinaka kei na vakamolimoli vei Jiova,

“Ni sa yalovinaka ko koya,

ni sa sega ni mudu na nona yalololoma vei ira na Isireli.”

A ra sa kailavaka e na domo levu ko ira kecega na tamata, ni ra vakavinavinaka vei Jiova, ka ni sa tauyavutaki na vale i Jiova.

12Ia ka lewe vuqa vei ira na bete, kei ira na Livai, kei ira sa liu vei ira na qase, era tamata qase, era a kunea na vale eliu, ni sa tauyavutaki e matadra na vale oqo, era tagi vakadomoilevu; ka lewe vuqa era kaila vakadomoilevu e na marau.

13A ra sa sega ni kila rawa kina ko ira na tamata, na kena duidui na domo ni kaila e na marau, kei na domo ni nodra tagi na tamata, ni ra sa kailavaka e na domo levu ko ira na tamata, a sa rogo vakayawa na kena rorogo.