1A ra sa kaya vua ko ira na Ifereimi, “A cava na ka oqo ko sa cakava vei keimami, ni ko a sega ni kacivi keimami ni ko a la'ki vala kei ira na kai Mitiani?” A ra sa veileti kaya vakaukauwa.
2A sa kaya vei ira ko koya, “A cava ka'u a cakava me vakataki kemuni? Sa sega beka ni vinaka na tomitomika na vua-ni-vaini nei Ifereimi, ka ca na vetivetia na vua-ni-vaini nei Epieseri?
3Same 83.11Sa solia ki na ligamuni na Kalou na turaga ni Mitiani ko Orepi kei Siepi. Ia ka cava ka'u a cakava rawa me vakataki kemuni?” Sa qai malumu na nodra cudru vei koya, ni sa vosa oti vakaoqo ko koya.
4A sa lako ki na Joritani ko Kitione, ka vutokosova, ko koya kei ira na tamata e lewe tolu na drau era tiko vata kaya, era sa malumalumu, ka ra cici muri ga.
5A sa kaya ko koya vei ira na kai Sukoci, “Mo dou solia mada eso nai buli madrai vei ira na tamata sa muri au, ni ra sa malumalumu, ia ka'u sa cici muri rau tiko na tui Mitiani, ko Sepa kei Salimuna.”
6A ra sa kaya na turaga ni Sukoci, “Sa tiko beka oqo e ligamu na ligadrau ko Sepa kei Salimuna, me keitou soli madrai kina vei ira na nomu mataivalu?”
7A sa kaya ko Kitione, “E na vuku ni ka oqo, ni sa na soli rau oti ko Sepa kei Salimuna ki na ligaqu ko Jiova, ka'u na qai kadrulaka na yagomudou e na kau votovotoa kei na kau gadrogadroa ni vanua lala.”
8A sa lako cake mai kea ki Penueli, ka vosa vakakina vei ira; a ra sa vosa vua ko ira na kai Penueli me vaka na nodra vosa na kai Sukoci.
9A sa vosa ko koya vei ira talega na kai Penueli, ka kaya, “Ni'u sa lesu tale mai e na qaqa, ka'u na basuka sobu na vale-cecere oqo.”
10A sa tiko mai Karikori ko Sepa kei Salimuna, kei ira kece na nodrau i valu era le tinikalima beka na udolu, ko ira ga oqo era sa vo vei ira kecega na nodra i valu ko ira mai na tokalau, ni sa bale oti e le tinikarua na oba (120,000) na tamata sa vakaiyaragi e nai seleiwau.
11A sa lako cake ko Kitione vaka kivei ira era dautiko e na valelaca vaka ki na tokalau kei Nopa kei Jokipa, ka sa mokuti ira nai valu; ni ra sa tiko wele ga ko ira nai valu.
12Ia sa dro ko Sepa kei Salimuna, a sa cici muri rau ko koya, ka sa tauri rau na tui ni Mitiani, ko Sepa kei Salimuna, ka vakadomobulataki ira kecega nai valu.
13Ni sa lesu mai nai valu ko Kitione na luve i Joasa e na sala vaka ki nai cabecabe ko Eresi,
14a sa vesuka ko koya e dua na cauravou vei ira na kai Sukoci, ka sa vakatarogi koya. A sa tukuna ki vua ko koya na yacadra na turaga ni Sukoci kei ira na qase era tiko kina, e lewe vitusagavulu ka vitu na tamata.
15A sa lako mai vei ira na kai Sukoci ko koya, ka kaya, “Raici rau mada ko Sepa kei Salimuna, oi rau dou a vosavakacaca kina vei au, ni dou a kaya, ‘Sa tiko li e ligamu na ligadrau ko Sepa kei Salimuna, me keitou solia kina na madrai vei ira na nomu tamata sa malumalumu?’ ”
16A sa tauri ira na qase ni koro ko ya, kei na kau votovotoa, kei na kau gadrogadroa ni vanua lala, ka sa vakatavulici ira kina na kai Sukoci e na nodra lesoni.
17A sa basuka sobu talega na vale cecere mai Penueli, ka vakamatei ira na lewe ni koro.
18A sa qai kaya ko koya vei Sepa kei Salimuna, “Era tamata vakacava ko ira drau a vakamatea mai Tepori?” A rau sa kaya, “Era sa vakataki iko sara ga; ko ira yadua sa vaka nai rairai ni luve ni tui.”
19A sa kaya ko koya, “Era sa taciqu, na luve i tinaqu. Me vaka sa bula ko Jiova, kevaka drau a vakabulai ira, ka'u sa qai sega ni vakamatei kemudrau.”
20A sa kaya vei Jica na nona ulumatua, “Mo ia mada, mo vakamatei rau.” A sa sega ni ucuna na nona i seleiwau na cauravou lailai, ni sa rere, ni sa gone ga ko koya.
21A sa kaya ko Sepa kei Salimuna, “Mo ia mada ko iko, ka yaviti keirau, ni sa vaka na matua ni tamata na nona kaukauwa.” A sa ia ko Kitione, ka vakamatei Sepa kei Salimuna; a sa taura talega na ka sa vakaiukuuku kina na domo ni nodrau kameli.
Na Efoti nei Kitione22A ra sa kaya vei Kitione ko ira na Isireli, “Mo lewai keimami, ko iko kei na luvemu kei na makubumu, ni ko sa vakabulai keimami mai na ligadra na kai Mitiani.”
23A sa kaya vei ira ko Kitione, “Au na sega ni lewai kemudou, ena sega talega ni lewai kemudou na luvequ; ena lewai kemudou ga ko Jiova.”
24Ka sa kaya tale vei ira ko Kitione, “E dua na ka ka'u na kerea vei kemudou: mo dou solia vei au na tamata yadua na sau mai na nona i toki-ni-valu.” (Ni sa nodra na sau koula, me vaka ni ra sa kawa i Isimeli).
25A ra sa kaya, “Keimami vinakata me keimami solia.” A ra sa tevuka e dua nai sulu, ka ra sa dui biuta kina na tamata yadua na sau mai na nona i toki-ni-valu.
26Ia na kena bibi ni sau koula sa kerea ko koya, sa dua na udolu ka vitu na drau na sikeli koula; ia ka sega ni wili kina na veika vakaiukuuku, kei na taube, kei nai sulu lokaloka erau sa vakaisulutaki kina na tui Mitiani, kei na sinucodo sa tu e na domo ni nodrau kameli.
27A sa cakava kina e dua na efoti ko Kitione, ka vakatikora e na nona koro ko Ofira. Era sa dau lako kina ka ia nai valavala vakatani ko ira kecega na Isireli, ka sa yaco mei cori vei Kitione kei ira na nona vuvale.
28A sa vakamalumalumutaki ko ira na kai Mitiani vei ira na Isireli, ka ra sa sega tale ni gumatua. A sa vakacegu na vanua ka yabaki vasagavulu e na gauna i Kitione.
Na Mate nei Kitione29A sa lako ko Jerupeali na luve i Joasa, ka tiko e na nona vale.
30A ra sa le vitusagavulu na luve i Kitione, era tagane sa vakatubura ko koya, ni sa lewe vuqa na watina.
31Ia na watina lailai, o koya ka tiko mai Sikemi, sa vakasucuma e dua na luvedrau tagane, ka sa vakayacani koya ko Apimeleki.
32A sa ciba ko Kitione na luve i Joasa, ni sa qase sara, a sa bulu e nai bulubulu i Joasa na tamana, mai Ofira sa nodra na luve i Epieseri.
33Ia ni sa mate ko Kitione, era sai valavala vakatani tale ko ira na Isireli, ka ni ra muri ira na Peali, ka vakabauti Peali-pirici me nodra kalou.
34Ia ko ira na Isireli era sa sega ni nanumi Jiova na nodra Kalou, o koya ka vakabulai ira mai na nodra meca kecega era tiko vakavolivoliti ira;
35a ra sega talega ni lomana na vale i Jerupeali, o koya ko Kitione, me vaka na ka vinaka kecega sa cakava ko koya vei ira na Isireli.
Who We AreWhat We EelieveWhat We Do
2025 by iamachristian.org,Inc All rights reserved.
