Esiteri 6 - Ai Vola Tabu (Vakadewa Makawa Vakavoutaki 2021)（FRV21）

Sa Vakarokorokotaki ko Motekai

1Sa sega ni moce rawa na tui e na bogi ko ya, a sa kaya me kau mai nai vola ni tukutuku ni veika sa caka, a sa wili vua na tui.

2A sa kune ni sa volai kina, ni sa tukuni Pikicani kei Teresi ko Motekai, e le rua vei iratou na nona mata na tui, erau a dauvakatawana na katuba, koi rau ka segata me rau vakamatei Asuerosi na tui.

3A sa taroga na tui, “A vakarokoroko cava kei na ka vakaturaga cava sa caka vei Motekai e na vuku ni ka oqo?” Sa qai kaya ko iratou na tamata eratou sa dauqarava na tui, “Sa sega na ka e caka vua.”

4A sa taroga na tui, “Ko cei sa tiko mai na rara?” Ia sa qai curu mai ko Amani ki na rara ni vale-ni-tui e sau, me kaya vua na tui me lili ko Motekai e na kau sa vakarautaka vua ko koya.

5A sa kaya vua ko ira era sa dauqarava na tui, “Sa tu saka ko Amani mai na rara.” A sa kaya na tui, “Me curu mada mai ko koya.”

6A sa curu mai ko Amani. A sa taroga vua ko koya na tui, “A cava na ka me sa caka vua na tamata sa vinakata ko koya na tui me vakarokorokotaki?” A sa nanuma e lomana ko Amani, “Sa vinakati cei li ko koya na tui me vakarokorokotaki, koi au ga?”

7A sa kaya vua na tui ko Amani, “Me kau mada mai vua na tamata sa vinakata na tui me vakarokorokotaki,

8nai sulu sa dausulumaka na tui, kei na ose sa dauvodoka na tui, kei na sala vakatui sa toka e uluna.

9Ia me soli nai sulu oqo kei na ose vua e dua sa uasivi sara vei ira na nona tamata vakaturaga na tui, me ra vakaisulutaka kina na tamata sa vinakata na tui me vakarokorokotaki, ka kauti koya voli e na salatu ni koro ni sa vodo tiko e na ose, ka kacivaka tiko e matana, ‘Ena caka vakaoqo vua na tamata sa vinakata na tui me vakarokorokotaki.’ ”

10Sa qai kaya vei Amani na tui, “Mo kusarawa, mo kauta nai sulu kei na ose, me vaka na nomu vosa, ka kitaka vakakina vei Motekai na Jiu, ko koya sa dautiko mai na matamata-ni-koro ni tui. Me kakua ni yali e dua na ka e na ka kece ko sa cavuta.”

11Sa qai kauta nai sulu kei na ose ko Amani, ka vakaisulutaki Motekai, ka kauti koya voli e na salatu ni koro, ni sa vodo lako e na ose, a sa kacivaka e matana, “Ena caka vakaoqo vua na tamata sa vinakata na tui me vakarokorokotaki.”

12A sa lako tale mai ki na matamata ni koro ko Motekai. A sa lako vakusakusa ki na nona vale ko Amani, ka tagi lako, a sa sole i tutuvi.

13A sa tukuna ko Amani vei Seresi na watina kei ira kecega na wekana na ka kece sa yaco vua. Era sa qai kaya vua ko iratou na nona daunivakasala kei Seresi na watina, “Kevaka e kawa ni Jiu ko Motekai, ko sa qai vakatekivu mo bale e matana, ko na sega ni gumatua vua, ko na bale vakaidina ga e matana.”

Na Bale nei Amani kei na Laveti Cake nei Motekai

14Ia ni ratou sa veivosaki tiko kaya, sa lako mai ko ira na nona mata na tui, a ra sa mai vakatotolotaki Amani yani ki na magiti sa vakarautaka ko Esiteri.