Dauvunau 8 - Ai Vola Tabu (Vakadewa Makawa Vakavoutaki 2021)（FRV21）

Talairawarawa Vua na Tui ka Marau e Lomamu

1Ko cei me vakataki koya na vuku?

Ia ko cei sa kila na kenai balebale ni ka?

A nona vuku na tamata sa serau kina na matana,

ia na kaukauwa ni matana ena malumu mai.

2Au sa vakavulici iko mo muria nai vakaro ni tui, io e na vuku ni bubului vua na Kalou.

3Mo kakua ni lako tani vakusakusa e matana. Kakua ni ko ia tiko e dua na ka ca, ni sa kitaka ga ko koya na ka sa vinaka vua.

4A tikina sa tu kina na vosa ni tui, sa tu talega kina na kaukauwa, ia ko cei me kaya vua, “A cava ko sa cakava?”

5Ko koya sa muria na vunau ena sega ni kunea e dua na ka ca, ia sa macala ki na yalona sa vuku na gauna kei na lewa dodonu.

6Ni sa dua na kena gauna kei na kena lewa dodonu ni cakacaka kecega, o koya sa levu kina vua na tamata na nona rarawa.

7Ni sa sega ni kila ko koya na ka ena yaco, ia ko cei sa tukuna rawa vua, se na yaco ninaica?

8Sa sega na tamata sa rawata na yalona me tarova na yalona; sa sega talega na ka e rawata e na siga ni mate. Ka sa sega na suka e nai valu ko ya, ia nai valavala ca ena sega ni vakabulai ira era sa daukitaka.

Na Tamata Ca kei na Tamata Yalododonu

9A ka kecega oqo ka'u sa kunea, ka vakasara na lomaqu ki na cakacaka kece sa caka e ruku ni mata-ni-siga, ia sa dua na gauna sa lewa kina na tamata vua na tamata tani ka sa mani ca kina.

10Ia ka'u a kunea ni ra sa bulu na tamata ca, era a daulako mai ki na yasana tabu ka ra suka tale, ka ra guileca e na koro era a cakacaka kina. Oqo talega na ka wale.

11Ni sa sega ni cudruvi vakasauri nai valavala ca sa gumatua kina na lomadra na luve ni tamata me ra caka ca.

12Ia kevaka sa vakadrau na nona caka ca na tamata i valavala ca, ka sa vakabalavutaki na nona bula, ia ka'u sa kila dina sara ni ra na vinaka ko ira era sa rerevaka na Kalou, ko ira era sa rere e matana,

13ia ena sega ni vinaka na tamata ca, ena sega talega ni vakabalavutaka na nona bula, ko ya sa vaka na yaloyalo; ni sa sega ni rere ko koya e na mata ni Kalou.

14Sa dua na ka tani sa caka e vuravura; ni sa yaco vei ira na tamata yalododonu eso me vaka na nodra i valavala na tamata ca; ia ka sa yaco vei ira na tamata ca eso me vaka na nodra i valavala na yalododonu. Au a kaya ni sa ka tani talega oqo.

15Au a qai kaya sa vinaka na marau, ni sa sega na ka e vinaka cake vua na tamata e ruku ni mata-ni-siga, ka me kana ga, ka gunu, ka marau, ni na tikotiko ga kaya na ka oqo e na nona oca e na veisiga ni nona bula, o koya sa solia vua na Kalou e ruku ni mata-ni-siga.

16E na noqu tovolea e lomaqu me'u kila na vuku, ka kunea na cakacaka sa ia e vuravura, na kena rawa ki vua na tamata me sega ni moce e na siga se na bogi,

17ka'u sa qai raica na cakacaka kecega ni Kalou, ni sa dredre vua na tamata me kila na cakacaka sa caka e ruku ni mata-ni-siga. Ia ke sa gumatua na tamata ni qara, ena sega ga ni kunea; ia ke sa nanuma ko koya sa vuku me kila, ena sega ga ni kunea rawa.