Same 72 - Ai Vola Tabu (Vakadewa Makawa Vakavoutaki 2021)（FRV21）

Na Masu ni Veidusimaki kei na Veitokoni vua na Tui A nei Solomoni.

1Kemuni na Kalou mo ni solia vua na tui na nomuni lewa dodonu,

kei na nomuni cakacaka dodonu vua na luvena na tui.

2Ena lewai ira vakadodonu na nomuni tamata ko koya,

kei ira na nomuni tamata dravudravua e na lewa vinaka.

3Ena tubura na kedra sautu na tamata na veiulunivanua,

kei na veiulu-ni-koro, e na lewa dodonu.

4Ena lewa ko koya e na vukudra na tamata era vakararawataki,

ena vakabula na luvedra na dravudravua,

ka musuki koya sa dauivalavala vakaukauwa.

5Era na rerevaki kemuni ni sa tikotikoga na mata-ni-siga,

kei na vula, io e nai tabatamata kecega.

6Ena lako sobu mai ko koya me vaka na uca ki na buroro,

me vaka na uca sa vakasuasuataka na qele.

7Ena tubu vinaka mai e na nona gauna ko ira na yalododonu

kei na sautu levu, ka yacova na gauna e oti kina na vula.

8 Saka 9.10 Ena lewa talega mai na dua na wasawasa ka yacova na wasawasa ka dua,

mai na Uciwai talega, ka yacova nai yalayala kei vuravura.

9Era na cuva vua ko ira era tiko mai na vanua lala,

era na dramica na kuvu-ni-soso ko ira na nona meca.

10O ira na tui Tasisi kei na tui ni veiyanuyanu

era na kauta mai nai madrali,

o ira na tui Sipa kei na tui Sepa

era na cabora na ka ni loloma.

11Ia ko ira kecega na tui, era na cuva vua,

era na qaravi koya na veimatanitu kecega.

12Ni na vakabula ko koya na dravudravua ni sa tagi,

kei koya sa vakararawataki ka sa sega e dua me vukei koya.

13Ena lomana ko koya na tamata malumalumu ka dravudravua,

ka vakabula na yalodra na dravudravua.

14Ena vakabula na yalodra mai na lawaki kei nai valavala kaukauwa;

ena ka talei talega e matana na kedra dra.

15Ena bula ko koya,

ka na soli talega vua na koula mai Sipa.

Ena ia tiko talega na masu e na vukuna,

ena vakavinavinakataki talega e na veisiga.

16Ena sautu e na sila na vanua;

ena veisuwayaki e na dela ni veiulunivanua;

ena vuavuai na vuana me vakataki Lepanoni;

era na tubu vinaka talega na lewe ni koro

me vaka na co ni vanua.

17Ena sega ni oti rawa na yacana,

ena tikotikoga na yacana ni sa tu na mata-ni-siga.

Ka ra na vakalougatataki na tamata e na vukuna;

era na vosavakalougatataki koya na lewe ni veivanua kecega.

18Me vakavinavinakataki ko Jiova na Kalou, na Kalou ni Isireli,

o koya duaduaga sa cakava na ka e veivakurabuitaki.

19Ia me vakavinavinakataki na yacana vakaiukuuku ka sega ni mudu;

ia me sinai talega ko vuravura taucoko e na nona i ukuuku.

Emeni, Emeni.

20Sa oti na masu i Tevita na luve i Jese.