2 Veigauna 25 - Ai Vola Tabu (Vakadewa Makawa Vakavoutaki 2021)（FRV21）

Sa Tui Juta ko Amasaia(2 Tui 14.2-6)

1Sa ruasagavulu ka lima na yabaki i Amasaia ni sa buli me tui, ka sa lewa e Jerusalemi ka yabaki ruasagavulu ka ciwa. Ia na yaca i tinana ko Jioatani mai Jerusalemi.

2A sa cakava na ka dodonu ko koya e na mata i Jiova, ia sa sega ni vinaka taucoko na yalona.

3Ia ni sa vakataudeitaki vua na matanitu, sa qai vakamatei rau na tamata erau a vakamatea na tamana na tui ko koya.

4Vrua 24.16Ia sa sega ni vakamatei iratou na luvedrau, sa muria ga na ka sa volai e na vunau i Mosese, e na tikina sa vosa kina ko Jiova, ka kaya, “Ena sega ni mate ko ira na qase e na vukudra na gone, ena sega ni mate talega ko ira na gone e na vukudra na qase, ia ena mate ga na tamata yadua e na vuku ni nona i valavala ca.”

Na Nodra Valuti na Kai Itomi(2 Tui 14.7)

5A sa vakasoqoni ira vata na Juta ko Amasaia, ka sa lesi ira me ra turaga ni yayaudolu, kei na turaga ni yayadrau, me vaka na nodra veivale na qase e Juta kei Penijamini taucoko. Ka sa wiliki ira sa ruasagavulu na nodra yabaki kei ira sa toro cake, ka sa kunea ni sa le oba vakatolusagavulu (300,000) na tamata bula, sa lako rawa e nai valu, ka dautaura na moto kei nai sasabai.

6Sa tautauri talega ko koya me ra mai veivuke e le tini na oba (100,000) na tamata qaqa mai vei ira na Isireli e na dua na drau na taledi siliva (rauta ni 3,400 na kilokaramu).

7Ia sa lako mai vei koya e dua na tamata ni Kalou, ka sa kaya, “Kemuni na tui, me kakua mada ni lako vata kei kemuni na nodra mataivalu na Isireli, ni sa sega ni tiko vata kei ira na Isireli ko Jiova—na luvei Ifereimi kece oqo.

8Ia kevaka sa lomamuni mo ni lako, mo ni ia ga; mo ni kaukauwa e nai valu, se ena vakabalei kemuni na Kalou e matadra na meca; ni sa rawa vua na Kalou me veivuke, se me veivakabalei.”

9A sa kaya ko Amasaia vua na tamata ni Kalou, “Ia ka na vaka beka evei na taledi e dua na drau au sa solia ki na nodra mataivalu na Isireli?” A sa kaya na tamata ni Kalou, “E rawarawa vua na Kalou me solia vei kemuni me vakalevu cake sara mai na ka oqo.”

10Sa qai tawasei ira ko Amasaia, ka me ra lesu tale ki na nodra veivale, na mataivalu ka lako mai kivei koya mai Ifereimi. Ia sa tubu vakalevu kina na nodra cudru kivei ira na Juta, ka ra sa lesu ki na nodra veivale ka sa ka levu na nodra cudru.

11A sa vakaukauwataki koya ko Amasaia, ka sa liutaki ira yani na nona tamata, ka sa lako ki na buca ni masima, ka mokuta e le tini na udolu vei ira na luve i Sia.

12A sa le tini na udolu era sa taura bula ko ira na Juta, ka kauta ki na dela ni uluvatu, ka viritaki ira sobu mai na dela ni uluvatu, era sa raramusumusu kecega kina.

13Ia ko ira na lewe ni mataivalu sa vakasuka ko Amasaia, me ra kakua ni lako kaya ki nai valu, era sa sikita na nodra veikoro na Juta, sa vakatekivu mai Samaria ka yaco ki Peci-oroni, ka ra sa mokuta e lewe tolu na udolu vei ira, a sa levu nai yau era sa tokitaka.

14Ia ni sa tale mai ko Amasaia mai na nona mokuti ira na kai Itomi, sa kauta mai ko koya na nodra kalou na luve i Sia, ka vakaduria cake me nona kalou, ka cuva vakatoboicu e matadra, ka vakama kina na ka boi vinaka.

15A sa waqa kina na cudru i Jiova vei Amasaia, ka sa tala vua e dua na parofita, o koya sa kaya vua, “A cava ko sa goleva kina na nodra kalou na tamata era a sega ni vakabulai ira rawa na nodra tamata mai na ligamuni?”

16Ia ni sa veivosaki tiko kaya, sa kaya vua, “O sa lesi beka mo dua vei ira na lewe ni nona bose na tui? Kua so; e na vuku ni cava ko via moku?” A sa kua so na parofita, ka sa kaya, “Au sa kila ni sa nakita na Kalou me vakarusai kemuni, ni kemuni sa kitaka na ka oqo, ka sega ni vakarorogo ki na noqu vosa.”

Sa Vakadrukai Juta ko Isireli(2 Tui 14.8-20)

17Sa qai ia na bose ko Amasaia na tui Juta, ka vakatadu mata kivei Joasa na luve i Jioaasi, na luve i Jeu, na tui Isireli, a sa kaya, “Mo lako mai, me daru veikune mada.”

18A sa talaki ko Joasa na tui Isireli kivei Amasaia na tui Juta, ka kaya, “E dua na wa-vakavotona mai Lepanoni sa talaki ki na dua na vu ni sitari mai Lepanoni, ka kaya, ‘Mo musuka mada na luvemu yalewa vua na luvequ tagane me watina’; a sa lako yani e dua na manumanu kila mai Lepanoni, ka butuka sobu na wa-vakavotona.

19O sa kaya, ‘Raica, ka'u sa mokuti ira oti na kai Itomi;’ ka sa laveti iko cake na lomamu mo dokadokai iko. Ia oqo mo tiko ga e vale. A cava li mo vakayavalata kina na ca mo la'ki bale kina, ko iko kei ira na Juta?”

20Ia sa bese ni rogoca ko Amasaia—ni sa vu mai vua na Kalou, me soli ira kina ki na ligadra na meca, ni ra sa goleva na kalou ni Itomi.

21A sa lako cake ko Joasa na tui Isireli; ka rau sa veikune, o koya kei Amasaia na tui Juta, mai Peci-semesi, ko ya na nodra na Juta.

22A sa mokuti ira na Juta ko ira na Isireli, a ra sa dui dro na tamata yadua ki na nona valelaca.

23Ia ko Joasa na tui Isireli sa tauri Amasaia na tui Juta, na luve i Joasa, na luve i Jioaasi, mai Peci-semesi, ka kauti koya ki Jerusalemi, ka basuka sobu na bai mai Jerusalemi mai na Matamata-ni-koro nei Ifereimi ki na Matamata-ni-koro e Tutuna, e va na drau na kiupiti.

24A sa kau kecega na koula kei na siliva, kei nai yaya kecega sa kune e na vale ni Kalou vei Opeti-itomi, kei nai yau ni vale-ni-tui, kei ira na tamata mei vakadinadina ni sautu, ka sa lesu tale ki Samaria.

Na Mate i Amasaia

25A sa bula tiko ka yabaki tinikalima ko Amasaia, na luve i Joasa na tui Juta, ni sa mate ko Joasa luve i Jioaasi na tui Isireli.

26Ia na kena vo ni cakacaka i Amasaia, a kenai vakatekivu, kei na kenai otioti, raica, sa sega li ni volai e na kedrai vola na tui Juta kei Isireli?

27Ia e na gauna ka lesu tani kina ko Amasaia me kua ni muri Jiova, era sa buki kena vere mai Jerusalemi, ka sa dro ko koya ki Lakisi. A ra sa talai ira eso me muri koya ki Lakisi, ka vakamatei koya mai kea.

28A ra sa kauti koya mai e na daku ni ose, ka buluta vata kei ira na nona qase e na koro nei Juta.