Jope 34 - Ai Vola Tabu (Vakadewa Makawa Vakavoutaki 2021)（FRV21）

Sa Vakatusa ko Ilaiu ni sa Daulewa Vakadodonu na Kalou

1A sa vosa tiko ko Ilaiu, ka kaya:

2“Dou rogoca na noqu vosa, koi kemudou na tamata vuku,

ka vakarorogo vei au, koi kemudou sa daukila-ka;

3ni sa dauvakalewa na vosa na daliga,

me vaka sa dautovolea na kakana na gusu.

4Tou digitaka me nodatou na lewa dodonu;

me tou kila vakataki kedatou na ka e vinaka.

5Ni sa kaya ko Jope, ‘Sa sega na noqu cala,

ka sa kauta tani na Kalou na noqu dodonu;

6Me'u lasu beka e na vuku ni noqu dodonu?

Na noqu mavoa sa sega ni maca rawa, ka dina ga ni sa sega na noqu cala.’

7Ko cei na tamata sa vakataki Jope,

me gunuva na veivakalialiai me vaka na gunu wai,

8ko koya sa sala vata kei ira na daucaka ca,

ka sa lako voli kei ira na tamata ca?

9Ni sa kaya ko koya, ‘Sa sega ni yaga vua na tamata

me daumarautaki koya na Kalou.’

10“O koya oqo mo dou vakarorogo kina vei au, koi kemudou na tamata yalomatua,

ni sa ka tabu sara vua na Kalou me kitaka na ka vakasisila,

ka sa tabu vua sa Kaukauwa me caka cala.

11 Same 62.12 Ni na sauma lesu vua na tamata me vaka na nona cakacaka,

ka na kitaka talega me ra sotava na tamata yadua na veika e tautauvata kei na nodra i valavala.

12E dina sara ni na sega ni daucaka ca na Kalou,

ka na sega talega ni kauta vakatani na lewa ko Koya sa Kaukauwa.

13Ko cei sa lesi koya me lewa na vanua,

se ko cei sa vakacolata vua na vuravura taucoko?

14Ke sa nanuma na tamata ko koya,

ka kauta tale vua na yalona kei na nona i cegu,

15ke sa na qai ciba vata kecega na tamata,

ka na lesu tale na tamata me kuvu-ni-qele.

16“Kevaka ko sa yalomatua, mo rogoca mada oqo;

mo vakarorogo ki na noqu vosa.

17Me lewa beka ko koya sa cata na ka dodonu?

Ko na vakacalai koya beka sa yalododonu ka kaukauwa,

18ko koya sa kaya vua na tui, ‘Kemuni sa ca!’

ka kaya vei ira na turaga dokai, ‘Dou sai valavala ca!’;

19ko koya sa sega ni vinakati ira loa na turaga,

ka sega ni nanumi ira vakalevu na vutuniyau, ka vakalailai na dravudravua,

me vaka ni ra sa cakacaka ni ligana ko ira kecega?

20Era na mate vakasauri sara;

era na kidroa na tamata e na lomaloma ni bogi ka lako tani yani,

ka ra na kau tani na qaqa ka sega na liga e kauta.

21“Ni sa rai tiko na matana ki nai valavala ni tamata,

ka sa raica kecega na nona i lakolako.

22Sa sega na butobuto se na yaloyalo ni mate

me ra vunitaki ira kina na daucaka ca.

23Ni sa sega ni tauca ko koya vua na tamata na ka e sega ni dodonu

me rau ia kina na veilewai kaya na Kalou.

24Ena vorolaki ira ga na tamata qaqa ka na sega ni tarogi,

ka na lesi ira na tani eso me kedrai sosomi.

25Ni sa kila na nodra cakacaka ko koya,

ka sa vukici ira e na bogi, a ra sa rusa kina.

26Sa yaviti ira e na matanavotu,

me vaka era tamata ca;

27ni ra lesu tani me ra kua ni muri koya,

ka sega ni via nanuma na nona sala,

28ia e na vukudra sa yaco kina vua na nodra tagi na dravudravua,

ka sa rogoca ko koya na nodra tagi era sa rarawa—

29Ni sa tiko vagagalu ko koya, ko cei ena rawa ni veivakacacani?

Ni sa vunia na matana ko koya, ko cei ena rawa ni raici koya,

se sa dua na matanitu se dua na tamata?—

30ka me kakua kina ni lewa na tamata e sega ni kila na Kalou,

se ko ira sa daucoriti ira na tamata.

31“Sa bau dua mada na tamata me kaya vua na Kalou,

‘Au sa vosota nai totogi; au na sega ni ia tale na caka ca;

32mo ni vakavulica mada vei au na veika ka'u sa sega ni kila;

kevaka ka'u sa caka ca, ka'u na sega ni ia tale’?

33Ena qai sauma lesu tale beka ko koya me rauti iko vinaka,

e na vuku ni nomu sa cata?

Ni sa dodonu ga mo digidigi kina, ka sega koi au;

o koya oqo mo tusanaka kina na ka ko kila.

34Era na tukuna vei au ko ira na tamata yalomatua,

ka ra tukuna na tamata vuku era sa rogoca na noqu vosa:

35‘Sa vosa ko Jope ka sa sega vua na kila-ka,

ka sa sega ni vuku na nona vosa.’

36Au sa vinakata me vakatovolei vakaoti mada ko Jope,

ka ni sa totaki ira na tamata ca.

37Ni sa kuria ko koya na nona i valavala ca e na be;

sa vakasausau e na kedatou maliwa,

ka ia vakalevu na nona vosacataki koya na Kalou.”