Iperiu 7 - Ai Vola Tabu (Vakadewa Makawa Vakavoutaki 2021)（FRV21）

Ko Melikiseteki na Bete

1 Vteki 14.17-20 Ia “ko Melikiseteki oqo, sa tui Selemi, a bete ni Kalou sa Cecere Sara, sa tavaki Eparaama ni sa tale mai na nona mokuti ira na tui, a sa vosavakalougatataki koya”;

2sa solia talega vei koya ko Eparaama “nai katini ni ka kecega.” Nai balebale ni yacana na “Tui ni caka dodonu”; ka o koya talega na Tui Selemi, a kenai balebale, na Tui ni veivakacegui.

3E sega ni tukuni na tamana, se na tinana, se na nona kawa, ka sa sega ni vakatekivu na nona gauna, se oti na nona bula, ia sa vakataka ga na Luve ni Kalou ko koya, ka sa bete tikoga ka sega ni mudu.

4Dou vakasamataka na kena uasivi na tamata oqo, ni sa solia vei koya ko Eparaama na turaga qase nai katini ni kamunaga sa tokitaka!

5Tiko 18.21A sa dina vei ira na luve i Livai era sa bete, ni sa vakaroti vei ira e na vunau, me ra vakaisigana mai vei ira na tamata, io, mai vei ira na wekadra, ia sa dina ga ni ra sa lako mai na kawa i Eparaama.

6Ia ko koya oqo sa vakaisigana mai vei Eparaama, a sa sega ni wili vata kei na nona kawa, a sa vosavakalougatataki koya ka cavuti vua na vosa ni yalayala.

7Ia sa sega ni vakatitiqataki rawa oqo, ni sa vosavakalougatataki koya sa uasivi sobu ko koya sa uasivi cake vei rau.

8Ia eke era sa taura nai sigana ko ira na tamata era sa dui mate; ia mai kea sa tukuni e dua ni sa bula tiko.

9Io, kevaka e tara me'u vosa vakakina, ko Livai talega, o koya sa dautaura nai sigana, erau sa solia kei Eparaama nai sigana;

10ni se bera ni sucu ko koya ni sa tavaki Melikiseteki ko tamana.

E Dua Tale na Bete, Me Vakataki Melikiseteki

11Ia kevaka sa rawa me ra vinaka sara e na vuku ni cakacaka ni bete vaka-Livai—ni sa tukuni vata kaya na vunau vei ira na tamata—ena yaga vakacava me tubu e dua tale na bete me vaka nai valavala i Melikiseteki, ka me sega ni vakatokai me vaka nai valavala i Eroni?

12Ia ni sa qai vakaisosomitaki na bete, sa dodonu sara me vakaisosomitaki talega na vunau.

13Ia ko koya sa tukuni vakaoqo, sa duatani na nona yavusa, sa sega mai kina e dua na tamata sa qarava nai cabocabo-ni-soro.

14Ni sa macala sara sa tubu mai vei ira na Juta na noda Turaga; ia na yavusa ko ya e sega ni vosa kina ko Mosese me ra bete.

E Dua Tale na Bete Vakataki Melikiseteki

15Ia sa macala vakalevu sara; ni sa tubu e duatani tale na bete me vakataki Melikiseteki,

16o koya ka lesi, ka sega ni vaka na vunau vakavuravura, ko ya ga me vaka na kena mana ni bula tawa mudu.

17Same 110.4Ni sa tukuna ko koya,

“O iko na bete tawa mudu,

me vaka nai valavala i Melikiseteki.”

18Sa tiko, e na dua na yasana, na muduki ni vunau sa liu taumada ni sa malumalumu ka sega ni yaga

19(ni sa sega ni vakataucokotaki me vinaka sara e dua na ka e na vuku ni vunau); ka sa tiko, e na yasana kadua, na vakatututaki ni nuinui sa vinaka cake, o koya eda sa toro voleka kina vua na Kalou.

20Ka ni sa vakadeitaki oqo e na bubului; ni ko ira eso sa lesi me bete era sa sega ni bubului,

21Same 110.4ia ko koya oqo sa yaco me bete e na bubului, e na vuku i koya sa kaya vua,

“Sa bubului ko Jiova

ka na sega ni veivutuni,

‘O iko na bete tawa mudu.’ ”

22A ka oqo sa vakayacori Jisu kina me i vakadei ni veiyalayalati sa uasivi cake.

23Ia ko ira oqori era lesi me ra bete, era sa lewe vuqa, ni sa tarova na nodra tiko na mate;

24ia ko koya oqo, sa sega ni vakaisosomitaki na nona cakacaka vakabete, ni sa tiko ga ka tawa mudu.

25O koya oqo sa rawarawa kina vua me vakabulai ira sara era sa lako mai vua na Kalou e na vukuna, ni sa bula tikoga ko koya me masulaki ira.

26Ni sa dodonu me noda e dua na bete sa vakaoqo, sa yalosavasava, sa yalovinaka, sa tawa ca, sa tawase tani mai vei ira na tamata i valavala ca, a sa caka me uasivi cake kei lomalagi e na nona cecere.

27Vsoro 9.7O koya e sega kina ni yaga e na veisiga, me vakacabora taumada nai soro ni nona i valavala ca, ia e muri nai soro ni nodra i valavala ca na tamata, me vakataki ira na bete levu; ni sa cakava oqo vakadua ga ko koya, ni sa vakacabori koya.

28Ia sa buli e na vunau na tamata era sa malumalumu me bete levu; ia na Luve ni Kalou sa caka me vinaka sara ka sega ni mudu e na bubului sa tarava na vunau.