2 Veigauna 11 - Ai Vola Tabu (Vakadewa Makawa Vakavoutaki 2021)（FRV21）

Sa Vakaukauwataka na Nona Matanitu ko Reopoama

1Ia ni sa yaco ki Jerusalemi ko Reopoama, sa vakasoqona vata ko koya, mai vei ira na yavusa i Juta kei Penijamini, e le tinikawalu na oba (180,000) na tamata digitaki era dauia nai valu, me la'ki veivala kei ira na Isireli, me vakalesuya tale na matanitu kivei Reopoama.

2A sa yaco mai na vosa i Jiova vei Semaia na tamata ni Kalou, ka kaya,

3Mo vosa vei Reopoama, na luve i Solomoni, na tui Juta, kei ira kecega na Isireli mai Juta kei Penijamini, ka kaya,

4Sa vosa vakaoqo ko Jiova, “Dou kakua ni lako cake, se veivala kei ira na wekamudou; dou lesu yani na tamata yadua ki na nona vale; ni sai au ga na vu ni ka oqo.” A ra sa vakarorogo ki na vosa i Jiova, ka lesu me ra kua ni la'ki vala kei Jeropoama.

Sa Tara na Koro ni Valu ko Reopoama

5A sa tiko mai Jerusalemi ko Reopoama, a sa tara eso na koro-ni-valu mai Juta.

6A sa tarai Peceliema ko koya, kei Etami, kei Tikoa,

7kei Peci-suri, kei Soko, kei Etulama,

8kei Kaca, kei Maresa, kei Sifi,

9kei Etorayimi, kei Lakisi, kei Aseka,

10kei Sora, kei Eijaloni, kei Epironi, sa veikoro vakabai ka sa tu mai Juta kei Penijamini.

11A sa vakaukauwataka ko koya na veikoro ni valu, a sa lesia kina eso na kavetani ni valu, ka sa binia kina na kakana, kei na waiwai, kei na waini.

12A sa vakauta ki na koro yadua nai sasabai kei na moto, ka vakaukauwataka sara. Ka sa totaki koya ko Juta kei Penijamini.

Era sa Tokoni Reopoama na Bete kei na Livai

13A sa lako yani vei koya mai na nodra veiyasana kecega ko ira na bete kei ira na Livai era sa tiko e Isireli taucoko.

14Ni ra a biuta na nodra vanua veico kei na nodra i votavota ko ira na Livai, ka lako ki Juta kei Jerusalemi, ni sa vakasivoi ira ko Jeropoama kei iratou na luvena, me ra kakua ni bete vei Jiova,

151Tui 12.31ka sa lesia eso na nona bete ki na veitikina cecere, kei na me-tevoro, kei rau na luve ni bulumakau ka cakava ko koya.

16A sa muri ira, mai na nodra veiyavusa kecega na Isireli, ko ira sa vagolea na lomadra me ra vakasaqarai Jiova na nodra Kalou na Isireli, era sa lako mai ki Jerusalemi, me ra vakacaboisoro vei Jiova na Kalou ni nodra qase.

17A ra sa vakaukauwataka na matanitu i Juta, ka sa vakaukauwataki Reopoama na luve i Solomoni, ka yabaki tolu, ni sa tolu na yabaki era sa muria nai valavala i Tevita kei Solomoni.

Na Vakawati kei na Vuvale i Reopoama

18Ia ko Reopoama sa vakawati kei Meelaci na luve i Jirimoci na luve i Tevita ka tagane, kei Epaieli na luvena yalewa ko Iliavi na luve i Jese.

19A sa vakasucuma vua na gone tagane eso: ko Jiusi, kei Semaraia, kei Seami.

20Ia e muri sa vakawati kei Meeka na luve i Apisalome; a sa vakasucumi Apaija, kei Atai, kei Sisa, kei Silomeci.

21A sa levu na loloma i Reopoama kivei Meeka na luve i Apisalome, ka lailai vei ira kecega na watina kei ira na watina lalai (ni sa lewe tinikawalu na watina, ka le onosagavulu na watina lalai, ka sa lewe ruasagavulu ka walu na luvena tagane, ka le onosagavulu na luvena yalewa).

22A sa lesi Apaija na luve i Meeka ko Reopoama me turaga, me lewa vei ira na tacina, ni sa lomana me buli koya me tui.

23Ka sai valavala vakavuku ko koya, ka sa lesi ira na luvena kecega me ra dui tiko e na veivanua kecega i Juta kei Penijamini, ki na koro vakabai kecega; a sa soli kakana tiko vei ira, e dua na ka levu. A sa gadreva ko koya me lewe vuqa na watidra.