1Isa na nona tabonaki e na o na goneyalewa ni Saioni
mai na nona cudru na Turaga!
Sa biuta sobu mai lomalagi ki vuravura
na nodra lagilagi na Isireli;
a sa sega ni nanuma nai tutu-ni-yavana
e na siga ni nona cudru!
2Sa tiloma kecega ko koya na Turaga
na nodra i tikotiko na Jekope ka sega ni lomana;
sa talaraka sobu ko koya e na nona cudru
na bai ni valu ni goneyalewa ni Juta;
sa biuta sobu ki na qele,
sa vakacacana na matanitu kei ira na kena turaga.
3Sa muduka laivi sara ko koya e nona cudru waqawaqa
na nodra totoka na Isireli;
a sa vakasuka na ligadra i matau
mai na mata ni meca;
a sa waqa na nona cudru vei ira na Jekope me vaka na bukawaqa caucaudre,
ka sa kania voli na ka e vakavolivolita.
4Sa loqata ko koya na nona dakai me vaka e dua na meca,
sa tu mai ko koya ka sa dodo tu na ligana i matau me vaka e dua na dauvakacaca;
a sa vakamatei ira kece era rairai vinaka e matada
e na nona vale na goneyalewa ni Saioni;
sa sovaraka na nona cudru me vaka na bukawaqa.
5Sa vaka na meca na Turaga;
sa tilomi ira oti na Isireli;
sa tiloma kecega ko koya na nona vale vakaturaga,
ka vakarusa na nodra bai ni valu kecega,
ka sa vakalevutaka vua na goneyalewa ni Juta
na vutugu kei na lele.
6A sa vakacacana na nona vale me vaka sa dua na were,
sa vakarusa na nona vale ni soqosoqo tabu;
sa cakava ko Jiova na solevu
kei na Siga ni Vakacecegu me guileca mai Saioni,
ia ni sa katakata sara na nona cudru,
sa beci rau na tui kei na bete.
7Sa biuta na nona i cabocabo-ni-soro na Turaga,
sa cata na nona vale tabu;
sa solia ki na liga ni meca
na bai ni kena veivale vakaturaga;
era sa tabalaka na domodra e na vale i Jiova,
me vaka e na siga ni solevu tabu.
8Sa nakita ko Jiova me vakarusa
na nona bai na goneyalewa ni Saioni;
sa dreta na kena dali i vakarau;
sa sega ni vakasuka tani ko koya na ligana mai na veivakarusai;
ia sa cakava nai keli kei na bai me tagi;
e rau sa ceguoca vata.
9Sa bulu e na qele nai sogo ni nona matamata-ni-koro;
sa vakacataka ka musuka na kenai sogo lawalawa;
a kena tui kei ira na kena turaga
era sa tiko ga e na veivanua sa sega kina na vunau;
ko ira talega na nona parofita
era sa sega ni kunea e dua na raivotu mai vei Jiova.
10Era sa tiko sobu e na qele,
era sa galu toka na qase kei koya na goneyalewa ni Saioni;
era sa kaburaka na kuvu-ni-soso e uludra
ka ra sa sulumaka nai sulu taga;
era sa cuva ki na qele
ko ira na goneyalewa ni Jerusalemi.
11Sa malumalumu na mataqu ni sa vakawai;
sa rise na bati ni ketequ;
sa sova ki na qele na yatequ
e na vuku ni nona rusa na goneyalewa ni kai noqu,
ni ra sa matabuto mai e na sala ni koro
ko ira na gone lalai kei na gone sa sucu tiko.
12Era sa kaya vei ira na tinadra,
“Sa evei na sila kei na waini?”
ni ra sa matabuto mai me vaka e dua sa vakamavoataki
e na sala ni koro,
ni sa sova yani na nodra bula
ki na lomasere i tinadra.
13A cava me'u tukuna me baleti iko, ka me'u vakatautauvatataki iko kina,
na goneyalewa ni Jerusalemi?
A cava me'u vakatauvatana kei iko, me'u vakacegui iko kina,
na goneyalewa ni Saioni?
Ni sa levu me vaka na wasawasa na nomu vakacacani;
ko cei me na vakabulai iko?
14A nomu parofita era sa raica
na ka lasu ka sesewa me ra tukuna vei iko;
a ra sa sega ni vakavotuya na nomu caka cala
mo vakalesui kina mai na nomu veivakabobulataki,
ia era sa tukuna na parofisai vakailasu ga me nomu
ka mo vakasevi kina.
15Era vakasausau ni ra beci iko
ko ira kece era sa lako voli tiko;
era sa vakasiusiu ka kurea na uludra
vua na goneyalewa ni Jerusalemi, ka vaka,
“Oqo beka na koro era vakatoka
na koro lagilagi sara,
na koro era marautaka ko ira na kai vuravura kece?”
16Era sa dalaga vei iko
ko ira kece na nomu meca;
era sa vakasiusiu ka vakasequruquru bati,
ka ra kaya, “Eda sa tilomi koya!
E dina ga sa kena siga oqo eda a nuitaka tiko;
eda sa qai kunea, eda sa qai raica!”
17Sa cakava ko Jiova na ka sa nakita,
sa vakayacora na nona vosa;
me vaka ka vakarota e na gauna eliu,
sa talaraka sobu ko koya ka sega ni lomana;
a sa cakava ko koya me ra marautaka na kemu ca ko ira na meca,
ka sa vakaceceretaka ko koya na nodra i leu ko ira era veimecaki kei iko.
18Sa tagi na lomadra vua na Turaga, ka kaya,
Ko iko na bai ni goneyalewa ni Saioni!
Me dave sobu na wai ni matamu me vaka na uciwai,
e na siga kei na bogi!
Mo kakua ni cegu,
me kakua ni vakacegu na loa ni matamu!
19Tucake, mo qoqolou e na bogi,
ni sa vakatekivu na veivuke yadra!
Mo qai sovaraka na lomamu me vaka na wai
e na mata ni Turaga!
Dodoka cake vua na ligamu
me ra bula na luvemu lalai,
ko ira era mate e na viakana
e na mua ni sala ni koro kecega.
20Mo ni raica, Jiova, ka nanuma!
Se ko cei ko ni sa cakava vua na ka oqo?
Me ra kania li na luvedra ko ira na yalewa,
na gone lalai era keveta tiko?
Me ra vakamatei li e na vale tabu ni Turaga
ko ira na bete kei na parofita?
21Era davo no e na qele e na sala ni koro
ko ira na gone kei na qase;
ko ira na noqu goneyalewa kei ira na noqu cauravou,
era sa bale e nai seleiwau;
ko ni sa vakamatei ira e na siga ni nomuni cudru,
ko ni sa vakamatea, ka sega ni lomana.
22Ko ni sa kaci yani me vaka sa siga ni solevu tabu,
me mai vakavolivoliti au na veika ka'u sa rerevaka;
a sa sega kina e dua sa dro bula se vo tiko,
e na siga ni cudru i Jiova;
ko ira na gone lalai ka'u sa keveta tiko ka susuga
sa vakawabokotaka ko ira na noqu meca.
Who We AreWhat We EelieveWhat We Do
2025 by iamachristian.org,Inc All rights reserved.
