Aisea 58 - Ai Vola Tabu (Vakadewa Makawa Vakavoutaki 2021)（FRV21）

Na Lotu Dina kei na Sega ni Lotu Dina

1“Mo kaci vakadomoilevu, kakua ni vakamalumalumu!

Tabalaka i cake na domomu me vaka na davui!

Vakatakila vei ira na noqu tamata na nodra talaidredre,

ki na vale i Jekope na nodra i valavala ca.

2Ia era sa vakasaqarai au tiko e na veisiga;

era sa reki ni ra kila na noqu sala,

me vaka na matanitu sa daucaka dodonu,

ka sa sega ni biuta na lewa ni nodra Kalou;

era sa tarogi au e na vuku ni veilewai dodonu,

era sa marau me ra torovi koya na Kalou.

3Era kaya,

‘A cava keimami sa lolo kina, ka ko ni sa sega ni raica?

Ka vakararawataki keimami kina, ka ko ni sa sega ni kila?’

Raica, e na nomudou siga ni lolo dou sa goleva na marau,

ia dou sa vakasaurarataka na nomudou tamata cakacaka kecega.

4Raica, dou sa lolo ka sa tubu kina na veileti

kei na veicudruvi, ka me veivacu kina e na ligai valavala ca.

Dou na sega ni lolo me vaka e na siga edaidai,

me rogo kina ki cake na domomudou.

5Me vaka li oqo na lolo ka'u sa vinakata,

na siga me vakayalomalumalumutaki koya kina na tamata?

Me sa vakacuva li na uluna me vaka na kuta,

ka tevuka nai sulu taga kei na dravusa me nona i davodavo?

Ko na vakatoka li na ka oqo na lolo,

na siga sa vinakata ko Jiova?

6“Sa sega li ni vakaoqo na lolo ka'u sa vinakata:

mo dou sereka nai vesu ni cakacaka vakatawadodonu,

ka luvata nai vua ni colacola bibi,

ka sereki ira na bobula me ra lalaga,

ka mo dou musuka kece talega nai vua?

7 Maciu 25.34 Sa vaka ne, se segai, me soli madrai vua sa viakana?

Ia ko ira sa rarawa ka luveniyali mo kauta ga ki na nomu vale;

ni ko sa kunea e dua sa luvawale, mo vakasulumi koya,

ia mo kakua ni vunitaki iko mai vua na wekamu dina?

8Ena qai kida mai na nomu rarama me vaka na mataka,

ka na tubu vakasauri mai na nomu bula vinaka;

ena qai liutaki iko na nomu cakacaka dodonu,

ia nai ukuuku i Jiova ena nomu i sasabai.

9Ko na qai masu, ka na rogoci iko ko Jiova;

ko na qai tagi, ka na kaya mai ko Jiova, ‘Koi au oqo!’

Kevaka ko biuta tani e na kemudou maliwa nai vua,

na dusi qaqalo, kei na vosa ca,

10ka kevaka ko daulomasoli vua sa viakana,

ka sa vakamamautaka na yalo i koya sa rarawa,

ena qai cadra na nomu rarama e na butobuto,

kei na nomu bogi loaloa me vaka na siga levu.

11Ia ko Jiova ena tuberi iko tikoga,

ka vakamamautaka na yalomu e na dausiga;

ka vakaukauwataka na suimu;

ia ko na vaka na were sa vakasuasuataki,

ka vaka nai vurevure sa sega ni yali na kena wai.

12Ia ko ira na nomu era na tara tale na veikoro sa lala makawa;

ko na tauyavutaka tale na yavu ni tabatamata eliu sara;

ia ko na vakatokai, O koya ka vakavinakataka na tikina sa kabasu,

O koya ka vakavinakataka tale, na sala me tawa na vanua.

13“Kevaka ko na tarova na yavamu e na Siga ni Vakacecegu,

mo kakua ni cakava na veika ko sa vinakata ga e na noqu siga tabu;

ka sa vakatoka na Siga ni Vakacecegu me ka e rekitaki,

na siga tabu sa nei Jiova na siga me dokai;

ka dokai koya, ka sega ni cakava kina na nomu cakacaka,

se muria kina na ka ko sa vinakata, se vosa wale kina;

14ko na qai rekitaki Jiova,

ia ka'u na kauti iko mo lako voli e na veiyasana cecere kei vuravura;

ka vakani iko e nai votavota i Jekope na tamamu,

ni sa cavuta na ka oqo na gusu i Jiova.”