Tiko mai na Lekutu 5 - Ai Vola Tabu (Vakadewa Makawa Vakavoutaki 2021)（FRV21）

Ko Ira na Tamata Sega ni Savasava

1A sa vosa vei Mosese ko Jiova, ka kaya,

2“Mo vakarota vei ira na Isireli, me ra kauti ira tani mai nai tikotiko ko ira na vukavuka kecega, kei ira kecega sa turi, kei ira kecega sa sega ni savasava e na vuku ni mate.

3Dou kauta tani na tagane kei na yalewa talega, dou kauta ki nai bili ni tikotiko; me ra kakua ni vakadukadukalitaka na nodra i tikotiko, o koya ka'u sa tiko kina.”

4A ra sa kitaka vakakina na Isireli, ka kauti ira ki nai bili ni tikotiko; me vaka ka kaya vei Mosese ko Jiova, era sa kitaka vakakina na Isireli.

Nai Sau ni Cala e Vakayacori

5 Vsoro 6.1-7 Sa vosa talega vei Mosese ko Jiova, ka kaya,

6“Mo kaya vei ira na Isireli: Ke sa dua na tagane se dua na yalewa sa kitaka e dua nai valavala ca sa daukitaka na tamata, me cala kina vei Jiova, a sa cala na tamata ko ya,

7ka me qai tukuna na nona i valavala ca sa cakava. Ka me sauma kece ko koya na nona caka cala, ka me kuria e na dua-nai-kalima, ka solia oqo vua sa caka cala kina.

8Ia kevaka sa sega na wekana me sauma kina na caka cala, me qai kau vei Jiova nai sau ni caka cala, ka me nona na bete; kei na sipi tagane talega mei bulubulu, ena ia kina na veibulubuluti e na vukuna.

9Kei nai madrali lavelaveti kecega mai na nodra ka tabu kecega na Isireli, era kauta vua na bete, ena nona ga.

10Kei na ka sa vakatabuya na tamata yadua, ena nona ga; a ka sa solia na tamata yadua vua na bete, ena nona ga.”

A Veika me Baleta na Yalewa Vakawati e Veibutakoci

11Sa vosa talega vei Mosese ko Jiova, ka kaya,

12“Mo vosa vei ira na Isireli, ka kaya: Kevaka sai valavala ca na watina e dua na tagane,

13ni sa moce kaya e dua na tagane ka sa sega ni kila na watina tagane, ka sa vunia ka dina ga ni sa vakadukadukalitaki ko koya, ka sa sega nai vakadinadina ni cala e vakayacora,

14ka sa rawa na tagane na vuvu, ni sa vuvutaka na watina, o koya ka sa vakadukadukalitaki koya, se sa vuvutaka na watina ka se sega ni vakadukadukalitaki koya,

15me qai kauta na watina vua na bete na tagane ko ya, ka me kauta talega me nona i madrali na yalewa, e dua na omeri madrai barile droka; me kakua ni livia kina na waiwai ko koya, se biuta kina na drega me vakamai; ni sai madrali ni veivuvutaki oqo, nai madrali ni vakananumi, me vakananuma na caka cala.

16“Ia na bete me na kauta yani vakavoleka na yalewa, ka vakatura e na mata i Jiova.

17Me qai kauta na wai tabu na bete e na dua na bilo qele, ka me kauta talega mai na bete eso na kuvu ni qele sa koto e na rara ni vale ni Kalou, ka biuta ki na wai.

18Ia ko koya na bete me vakatura na yalewa e na mata i Jiova, ka luvata nai sala mai na uluna na yalewa, ka solia ki na ligana nai madrali ni vakananumi, ko ya nai madrali ni veivuvutaki. Ia me taura tu e ligana na bete na wai gaga sa vakayarayarataka mai na cudru.

19Ia me vakabubuluitaki koya na yalewa ko koya na bete, ka me kaya vua, “Kevaka sa sega na tagane drau sa moce vata kaya, kevaka ko sa sega talega ni biuta na watimu, mo vakadukadukalitaki iko kei na tagane tani, mo qai kakua ni ca e na wai gaga oqo sai vakayacoyaco ni cudru.

20Ia kevaka ko sa lako tani mai vua na watimu, ia kevaka ko sa vakadukadukalitaki, ni drau sa moce vata kaya e dua na tagane tani,”

21—me qai vakabubuluitaka na yalewa ko koya na bete e na veivatonaki me cudruvi kina, ka me kaya vua na yalewa na bete—“Me lewa vei iko ko Jiova mo daucavuti vei ira na kai nomu, ni sa lewa vei iko ko Jiova me vuca na sagamu, ka me vuvuce na ketemu;

22ia na wai oqo ka sa vakayarayarataka mai na cudru ena curuma na ketemu me vuvuce kina, ka me vuca na sagamu!” Me na qai kaya na yalewa, “Emeni, Emeni.”

23“Me qai vola na vosa ni veicudruvi oqo e nai vola ko koya na bete, ka savata tani tale e na wai gaga.

24Ia ena vagunuva na yalewa ko koya e na wai gaga sai vakayacoyaco ni cudru, ia na wai oqo ena curumi koya, ena qai gaga mai.

25Me taura talega nai madrali ni veivuvutaki na bete mai na ligana na yalewa, ka yalovaka nai madrali e na mata i Jiova, ka cabora e dela ni cabocabo-ni-soro.

26Me qai yakuta eso nai madrali na bete, io na ka me vakananuma, ka vakama e dela ni cabocabo-ni-soro, ka sa oti me qai vagunuva na yalewa e na wai.

27Ia ni sa vagunuvi koya oti e na wai ko koya, ena qai yaco, kevaka sa vakadukadukalitaki ko koya, ka sa caka cala vua na watina, ena qai curumi koya na wai sai yacoyaco ni cudru, ka na gaga mai, ka na vuvuce kina na ketena, ka na vuca na sagana, ena qai daucavuti na yalewa ni sa veivatonaki vei ira na kai nona.

28Ia kevaka sa sega ni vakadukadukalitaki na yalewa, ka sa savasava ga; ena qai sega ni ca ko koya, ia ena kunekune rawa ga.

29“Oqo na vunau ni veivuvutaki, ni sa lako vata kei na tagane tani na yalewa sa vakawati ka sai valavala ca,

30se ni sa vuvutaka na watina e dua na tagane. Me qai vakaturi e na mata i Jiova na yalewa, ka me cakava vua me vaka na vunau taucoko oqo ko koya na bete.

31Sa na qai sega ni cala na tagane e na ka oqo, ka na cudruvi ga na yalewa oqo e na nona i valavala ca.”